بۇگىن تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ماجىلىستە ەل ازاماتتارى جۇرگىزۋشى كۋالىگىنە ەمتيحاندى ونلاين تاپسىرۋ مۇمكىندىگى قاراستىرىلىپ جاتقانىن ايتتى, دەپ جازادى Egemen.kz.
دەپۋتات ەكاتەرينا سمىشلياەۆا جۇرگىزۋشى كۋالىگىن الۋ ماقساتىندا تاپسىراتىن ەمتيحان بارىسىندا جەمقورلىق تاۋەكەلدەرىن ازايتىپ, سونىمەن بىرگە وسى ماقساتتا جۇزدەگەن شاقىرىم ءجۇرىپ, ورتالىققا باراتىن ازاماتتاردىڭ ماسەلەسىن كوتەردى.
«كەيىنگى كەزدە جۇرگىزۋشى كۋالىگىنە ەمتيحان تاپسىراتىن ادامداردىڭ سانى ارتىپ كەلەدى. ويتكەنى كولىك قۇرالدارىنىڭ جاڭا تۇرلەرى كوبەيىپ, جاڭا ەرەجەلەر ەنگىزىلىپ جاتىر. وسى قاتاردا موپەد جۇرگىزۋشىلەرىنە ارنالعان قاعيدالار دا بار. بۇل پروتسەدۋرانى بارىنشا ورتالىقتاندىرۋ ەمتيحان تاپسىرۋ نۇكتەلەرىنىڭ الۋان تۇرلىلىگى بولعان كەزدە وركەندەگەن سىبايلاس جەمقورلىقتى جەڭۋ ءۇشىن جاسالعانى تۇسىنىكتى. الايدا, بۇل جەردە ءبىز باسقا سالدارلارعا تاپ بولدىق, ونىڭ ىشىندە: كەزەك كۇتۋ, ەمتيحان تاپسىرۋ ءۇشىن اۋماقتىق بولىمشەلەردىڭ بولماۋى, ءجيى قولدانىلاتىن جابدىقتىڭ تەحنيكالىق اقاۋى, ت.ب. ءبىزدىڭ وبلىستا ادامدار تەوريالىق جانە پراكتيكالىق قۇقىقتار ەمتيحانىن تاپسىرۋ ءۇشىن جۇزدەگەن شاقىرىم جول جۇرۋگە ءماجبۇر», دەدى دەپۋتات.
ءوز كەزەگىندە تسيفرلىق دامۋ ءمينيسترى ازاماتتارعا جۇرگىزۋشى كۋالىگىنە ەمتيحاندى ونلاين تاپسىرۋعا مۇمكىندىك بەرۋ مۇمكىندىگى قاراستىرىلىپ جاتقانىن تىلگە تيەك ەتتى.
«جۇيەلى شارالارعا كەلەتىن بولساق, بۇگىندە ءبىز ونلاين-ەمتيحانداعى باقىلاۋ راسىمدەرىن قولدانا وتىرىپ, ونلاين-تەستىلەۋدى ەنگىزۋ مۇمكىندىگىن قاراستىرامىز. مۇنداي مەحانيزمدەر دامىعان اقش, ۇلىبريتانيا, اۆستراليادا قولدانىلادى. بۇل تەوريالىق بولىمگە قاتىستى. پراكتيكالىق بولىمگە كەلەتىن بولساق, IT-كومپانيالارمەن بۇگىن ءبىز ەمتيحان تاپسىرۋدى تىركەيتىن ءتيىستى كومپيۋتەرلىك كورۋ الگوريتمدەرىن (Computer vision) ەنگىزۋ نۇسقالارىن قاراستىرامىز. ياعني, بۇل جابدىققا, سەنسورلارعا شىعىنداردى ازايتۋعا كومەكتەسەدى. مۇنداي شارالاردى قاراستىرامىز», دەدى جاسلان ماديەۆ.