بۇگىندە الەۋمەتتىك قولداۋ قىزمەتىنىڭ 27 ءتۇرى پرواكتيۆتى فورماتتا جۇزەگە اسادى. بۇل تۋرالى ءماجىلىستىڭ جالپى وتىرىسىندا قر پرەمەر-ءمينيسترىنىڭ ورىنباسارى تامارا دۇيسەنوۆا مالىمدەدى, دەپ حابارلايدى Egemen.kz.
«بۇگىندە ءاربىر بەسىنشى ازامات مەملەكەتتەن الەۋمەتتىك قولداۋ الادى. تسيفرلىق ونىمدەردى ەنگىزۋ - قىزمەتتەردىڭ قولجەتىمدىلىگىن ارتتىرادى. وتكەن جىلى بۇل سالاداعى تسيفرلاندىرۋ ناتيجەلەرى حالىقارالىق ينستيتۋتتار, بىرىككەن ۇلتتار ۇيىمى تاراپىنان وڭ باعالانىپ, وزگە ەلدەرگە ۇلگى بولدى. بۇگىندە الەۋمەتتىك قولداۋدىڭ باسىم بولىگى (27 ءتۇرى) پرواكتيۆتى فورماتتا جۇزەگە اسىرىلىپ جاتىر», دەدى تامارا دۇيسەنوۆا.
ۆيتسە-پرەمەر مەملەكەت باسشىسىنىڭ بىلتىرعى جولداۋىندا جاريالانعان جانە دەپۋتاتتاردىڭ قولداۋىنا يە بولعان زياندى ەڭبەك جاعدايلارى بار جۇمىسشىلارعا ارنالعان ارنايى ۇستەماقى جىل باسىنان بەرى تولەنە باستاعانىن ەسكە سالدى.
سونداي-اق ۆيتسە-پرەمەر ساۋالداردىڭ باسىم بولىگى مۇمكىندىگى شەكتەۋلى جاندارعا قاتىستى ەكەنىن ايتتى. بۇل سالادا الەۋمەتتىك تولەمدەردىڭ بارلىق تۇرلەرى, ياعني مۇگەدەكتىك بويىنشا جاردەماقى, مۇگەدەك بالاعا نەمەسە ازاماتقا كۇتىم جاساۋ جاردەماقىسى, وتەماقى جابدىقتارىنا قاراجات تولىعىمەن شەشىلگەنىن اتاپ ءوتتى.
«مەملەكەتتىك بيۋدجەتتەن بولىنگەن قارجى كولەمى - 320 ملرد تەڭگە (273,3 ملرد تەڭگە – رەسپۋبليكالىق بيۋدجەت جانە الەۋمەتتىك ساقتاندىرۋ قورى, 46,3 ملرد تەڭگە – جەرگىلىكتى بيۋدجەت), 800 مىڭعا جۋىق ازاماتقا قولداۋ كورسەتىلىپ جاتىر», دەپ تۇيىندەدى تامارا دۇيسەنوۆا.