«تازالىق تابالدىرىقتان باستالادى» دەمەكشى, ءار ادام ءوزىنىڭ مەكەن ەتەتىن جەرىن ايالاپ, كۇتۋى قاجەت. جىل سايىن الەمدە 300 ملن توننا پلاستيك بوتەلكە وندىرىلەدى. بوتەلكە قالدىقتارىن قايتا وڭدەپ, كادەگە جاراتىپ, پايدالى دۇنيە جاساپ شىعارۋ اركىمنىڭ قولىنان كەلە بەرمەيتىنى راس. وسى ءۇردىستى تاپ باسىپ تانىعان تەحنولوگيالىق فاندوماتتار جۇيەسى ەلوردانىڭ ىرگەسىندە 2023 جىلى ىسكە قوسىلدى. «Sparklo KZ» كومپانياسى بوتەلكەلەردى سۇرىپتاپ, وڭدەۋگە دايىندايدى. قازىرگى تاڭدا, الماتى, استانا, اقتوبە, وسكەمەن قالاسىندا 123 فاندومات قوندىرعىسى حالىققا قىزمەت ەتەدى.
ء«بىز زاۋىتتى 4-5 جىلدا ىسكە قوستىق. العاشىندا شيكىزات تاپشىلىعىنا تاپ بولدىق. زاۋىت قۇرىلعان ۋاقىتتا بىزگە قاتە اقپارات بەرىلدى. 60 مىڭ توننا پلاستيك وندىرە الاتىن زاۋىت ىسكە قوسىلعانىمەن, قازاقستاندا بار-جوعى 25 مىڭ توننا پلاستيك سۇرىپتالىپ, جينالادى ەكەن. سودان ءبىز ساۋد ارابياسى, يندونەزيا ەلدەرىنەن, افريكا مەملەكەتتەرىنەن پلاستيك بوتەلكەلەردى تاسىدىق», دەدى «Sparklo KZ» كومپانياسىنىڭ ديرەكتورى ادىلەت نۇرسيلا.
كومپانيا ديرەكتورىنىڭ ايتۋىنشا, باستاپقى ۋاقىتتا ەلىمىزدە فاندومات قوندىرعىسىن ورناتۋ كەزىندە ءبىراز قيىنشىلىقتار تۋىنداعان. كەيىننەن, رەسەيدە ءدال وسىنداي قوندىرعىلاردى وندىرەتىن كومپانيامەن سەرىكتەستىك ورناتقان. بۇل قوندىرعىنىڭ العاشقىدا ءبىر عانا ءتۇرى وندىرىلگەن. سەرىكتەستىك بارىسىندا قازاقستانعا 10 داناسىنا تاپسىرىس بەرىلگەن. قوندىرعى ەڭ ءبىرىنشى «دوستىق پلازا» ساۋدا ورتالىعىنا ورنالاستىرىلدى. بىراق 2022 جىلى الەمدەگى گەوساياسي جاعدايعا بايلانىستى بۇكىل ينۆەستيتسيالىق جوبا توقتاتىلدى. ال جالپى قازاقستاندى تولىعىمەن قامتاسىز ەتۋگە 20 مىڭ فاندومات قاجەت.
ەكوبەلسەندىنىڭ ايتۋىنشا, 3-4 ايدان كەيىن ءباا كومپانيالارىمەن كەلىسسوز جۇرگىزىلىپ, 2023 جىلدىڭ ناۋرىز ايىندا «Sparklo KZ» كومپانياسىنىڭ فاندوماتتارى قازاقستان اۋماعىندا ىسكە قوسىلدى.
بۇل قوندىرعى پلاستيك جانە اليۋميني بوتەلكەلەردى قابىلداپ, سۇرىپتايدى. ال سۇرىپتالعان بوتەلكەلەر ءباا-دە وڭدەلەدى. قوندىرعىنىڭ ءبىر كۇندە 200 بوتەلكەنى قابىلداۋعا مۇمكىندىگى بار. فاندوماتتىڭ ارنايى «Sparklo Rewards Club» قوسىمشاسىندا 60 مىڭعا جۋىق ادام تىركەلگەن. ونىڭ 70 پايىزى بەلسەندى, ياعني قۇرىلعىنى ايىنا 3-4 رەت قولدانادى. قوندىرعى ەكى فاكتورلى اۋديفيكاتسيا بويىنشا جۇمىس ىستەيدى. ءبىرىنشىسى, بوتەلكەلەردى شتريح-كود ارقىلى تانۋ. ەكىنشىسى, جاساندى ينتەللەكتىنىڭ كومەگىمەن بوتەلكەنى ىشىندەگى سۇيىقتىققا بايلانىستى تانۋ ۇدەرىسى. ەگەر قوندىرعىعا بوتەلكەدەن باسقا زاتتار سالىناتىن بولسا, ەكراننان «قابىلداي المايمىز, الىپ تاستاڭىز» دەگەن جازۋ شىعادى.
قايتا وڭدەلگەن پلاستيك بوتەلكەلەردەن توقىما, ياعني ءتۇرلى ماتالاردى, كيىمگە جانە جيھازداردى قاپتاۋعا ارنالعان پوليەفيرلى ماتالاردى جاساۋعا بولادى. سونداي-اق پلاستيك قۇبىرلار, تاقتايشالار جانە باسقا دا قۇرىلىس ماتەريالدارى وندىرىلەدى. ۇساقتالعان پلاستيك اسفالت جانە جول توسەمدەرىن وندىرۋدە كومپونەنت رەتىندە پايدالانىلادى. كەيبىر جاعدايلاردا قايتا وڭدەۋگە كەلمەيتىن پلاستيك بوتەلكەلەردى ەنەرگيا ءوندىرۋ ءۇشىن وتىن رەتىندە قولدانادى.
«تەگىن نارسەنىڭ قۇنى جوق. وسى قۇرىلعىنىڭ قوسىمشاسى ارقىلى تىركەلگەن ادامداردىڭ جەكە كابينەتتەرىنە بونۋستاردى تىركەيمىز. ءار بوتەلكەگە 10 بونۋس بەرەمىز. ءارتۇرلى كومپانيالاردىڭ بونۋستىق جۇيەسىمەن ينتەگراتسيا جاسالعان. بونۋستاردى ءدامحانالار, ويىن ورتالىقتارى, «Magnum», «ياندەكس», «Gorilla» جانە «Jet» كومپانياسىنا جۇمساۋعا بولادى. وسىنداي قوندىرعى ارقىلى پايدالى ەكولوگيالىق ادەتتەردى جۇزەگە اسىرامىز», دەيدى كومپانيا باسشىسى.
بۇگىندە اتالعان قوندىرعىعا جاساندى ينتەللەكتىنىڭ كومەگىمەن تۇرمىستىق-حيميالىق زاتتاردىڭ قالىبىن قابىلدايتىن جۇيەنى ەنگىزۋ جوسپارلانعان. سونداي-اق كومپانيا بۇل قوندىرعىلاردىڭ سانىن جىلدىڭ اياعىنا دەيىن ادام كوپ شوعىرلاناتىن جەرلەردە 500-1000-عا دەيىن كولەمدە ۇلعايتۋدى كوزدەيدى. قازىرگى تاڭدا بۇل قوندىرعىلار الەمنىڭ 12 مەملەكەتىندە ورناتىلعان. كومپانيا الداعى 3-5 جىلدا الەم مەملەكەتتەرىنە ورناتۋدى ماقسات ەتىپ وتىر.
وسىلايشا, پلاستيكالىق بوتەلكەلەردى كادەگە جاراتىپ, قايتا وڭدەلەتىن قالىپتارى بار ونىمدەردى وتكىزۋ ەكولوگيانى لاستاۋدىڭ الدىن الادى. پلاستيك بوتەلكەلەردى قايتا وڭدەۋ تازا پلاستيك شيكىزاتتى تۇتىنۋدى جانە قالدىقتاردىڭ كولەمىن ازايتا وتىرىپ, جاڭا پايدالى ونىمدەردىڭ كەڭ اۋقىمىن جاساۋعا مۇمكىندىك بەرەدى.
قىرمىزى جۇماعاليقىزى,
ەۇۋ ستۋدەنتى