بۇل تۋرالى قر تۋريزم جانە سپورت ۆيتسە-ءمينيسترى سەرىك جاراسباەۆ مالىمدەدى, دەپ حابارلايدى Egemen.kz.
قىركۇيەكتىڭ 8-13 كۇندەرى ارالىعىندا استانادا وتەتىن 5-ءشى دۇنيەجۇزىلىك كوشپەلىلەر ويىندارى باعدارلاماسىنا 21 سپورت ءتۇرى ەندى, ونىڭ جارتىسى - قازاقتىڭ ۇلتتىق سپورت تۇرلەرى, قالعانى - تۇركى ەلدەرىنىڭ ۇلتتىق سپورت تۇرلەرى.
«استاناعا 89 ەلدىڭ دەلەگاتسيالارى كەلەتىنى راستالدى. بيىلعى دۇنيەجۇزىلىك كوشپەلىلەر ويىندارىنا 2500-دەن استام سپورتشى قاتىسادى دەپ جوسپارلانىپ وتىر», دەدى سپيكەر وكق الاڭىندا.
ۆيتسە-مينيستر سپورتتىق ينفراقۇرىلىمعا توقتالا كەلە, بيىلعى دودادا ء«بىر سىزىق» كونتسەپتسياسى قولدانىلاتىنىن ايتتى.
«قابانباي باتىر مەن تۇران داڭعىلدارىندا ورنالاسقان سپورت نىساندارى پايدالانىلادى. «استانا ارەنادا» جارىستىڭ سالتاناتتى اشىلۋ ءراسىمى وتەدى, ج.ۇشكەمپىروۆ اتىنداعى جەكپە-جەك سارايىندا كۇرەس تۇرلەرىنەن جارىس وتەدى, جەڭىل اتلەتيكا مانەجى اككرەديتاتسيالاۋعا ارنالعان. سونداي-اق ۇلتتىق ات سپورتى تۇرلەرىن وتكىزۋ ءۇشىن «قازانات» يپپودرومى رەكونسترۋكتسيادان وتكىزىلىپ جاتىر. «دۋمان» قوناق ۇيىندە توعىزقۇمالاق, مانگالا جانە باسقا دا سپورت تۇرلەرىنەن جارىستار وتەدى», دەپ ناقتىلادى س.جاراسباەۆ.
سونىمەن قاتار ءىس-شارا شەڭبەرىندە حالىقارالىق عىلىمي-تاجىريبەلىك كونفەرەنتسيا ۇيىمداستىرىلادى.