سيان قالاسىندا قىتاي - ورتالىق ازيا ازاماتتىق اۆياتسيا سالاسىنداعى ىنتىماقتاستىق جونىندەگى جۇمىس توبىنىڭ ءبىرىنشى كونفەرەنتسياسى شەڭبەرىندە (س5+1) قازاقستان رەسپۋبليكاسىنىڭ اۆياتسيالىق بيلىگى مەن قىتاي حالىق رەسپۋبليكاسى اراسىندا كەلىسسوزدەر جۇرگىزىلدى, دەپ حابارلايدى Egemen.kz قر كولىك مينيسترلىگىنىڭ ءباسپاسوز قىزمەتىنە سىلتەمە جاساپ.
قازاقستان دەلەگاتسياسىن ازاماتتىق اۆياتسيا كوميتەتىنىڭ توراعاسى سالتانات تومپيەۆا, قىتاي دەلەگاتسياسىن قىتاي ازاماتتىق اۆياتسيا اكىمشىلىگى حالىقارالىق قاتىناستار دەپارتامەنتى باس ديرەكتورىنىڭ ورىنباسارى باي ۆەنلي باستادى.
كەلىسسوزدەر بارىسىندا ەكى ەلدىڭ بەكىتىلگەن تاسىمالداۋشىلارىنىڭ رۇقسات ەتىلگەن جيىلىكتەر سانىن اپتاسىنا 124 رەيسكە دەيىن ۇلعايتۋ جانە جيىلىكتەر بويىنشا قانداي دا ءبىر شەكتەۋسىز جۇك رەيستەرىن ورىنداۋ مۇمكىندىگى جونىندە ىنتىماقتاستىققا قول جەتكىزىلدى.
سونىمەن قاتار تاسىمالداۋشىلار سانى ارتىپ, قىتاي اۋماعىندا جاڭا پۋنكتەر قوسىلدى.
ءوز كەزەگىندە وتاندىق اۆياكومپانيالار حاينان ارالىنداعى (سانيا, حايكوۋ جانە تسيۋنحاي قالالارى) پۋنكتترگە, ونىڭ ىشىندە بەسىنشى, التىنشى جانە جەتىنشى «اۋا ەركىندىگىن» پايدالانا وتىرىپ, شەكسىز رەيستەردى ورىندايدى.
كەلىسسوزدەر ناتيجەسىندە ەكى ەل اراسىندا العاش رەت «اشىق اسپان» رەجيمى ورناتىلدى. ونىڭ شەڭبەرىندە ەكى ەلدىڭ تاعايىندالعان تاسىمالداۋشىلارى «اۋا ەركىندىگىنىڭ» بەسىنشى دارەجەسىن پايدالانا وتىرىپ, اپتاسىنا 42 رەيسكە دەيىن ورىنداۋ قۇقىعىنا يە بولدى.
ايتا كەتەرلىگى, قر تاسىمالداۋشىلارى «اۋا ەركىندىگىنىڭ» بەسىنشى دارەجەسىن پايدالانا وتىرىپ, قىتايعا رەيستەردى ورىنداۋ قۇقىعىنا يە بولعان الەمدەگى ساناۋلى ەلدەردىڭ ءبىرى (اقش جانە بىرقاتار ەۋروپا ەلدەرى).
قىتاي قازاقستاننىڭ كوپتەگەن باعىتى بويىنشا ستراتەگيالىق سەرىكتەسى, وسىعان بايلانىستى ەلدەر اراسىنداعى رەيستەردى ورىنداۋ ءۇشىن قۇقىقتىق بازانى كەڭەيتۋ ىنتىماقتاستىقتى ودان ءارى دامىتۋ جولىندا ماڭىزدى قادام بولدى.
قىرمىزى جۇماعاليقىزى,
ەۇۋ ستۋدەنتى