«كىتاپتى ورتەگەننەن دە اۋىر قىلمىس بار. ول – كىتاپ وقىماۋ», دەيدى اعىلشىن جازۋشىسى رەي برەدبەري. راسىمەن بۇرىن دا, قازىر دە, ينتەللەكتۋالدىق ورەنى كوتەرەتىن, مىنەزدى بەرىك قىلاتىن – كىتاپ قانا, كلاسسيكالىق ەڭبەكتەر عانا. كوزىقاراقتى ادام بۇل اقيقاتتى جوققا شىعارا المايدى. وسى ماقساتتا پاۆلودار وبلىسىنىڭ باياناۋىل اۋدانىندا «تابيعات اياسىندا كىتاپ وقۋ» رەسپۋبليكالىق سەمينارى ءوتتى.
سەمينارعا 200-دەن اسا ادىسكەر, مەكتەپ كىتاپحاناشىلارى, عىلىمي-پەداگوگيكالىق كىتاپحانانىڭ قىزمەتكەرلەرى, سونداي-اق اقىن-جازۋشىلار مەن وبلىستىق ءبىلىم باسقارماسىنىڭ وكىلدەرى قاتىستى. استانا, الماتى, شىمكەنت قالالارىنان جانە قاراعاندى وبلىسىنان كەلگەن ادىسكەرلەر مەن مەكتەپ كىتاپحاناشىلارى وزدەرىنىڭ جۇمىس تاسىلدەرىن كورسەتىپ, قىزىقتى كۆەست-ويىندار وتكىزدى. سونداي-اق اباي ولەڭدەرىن جاتقا وقىپ, بەلگىلى شىعارمالار جەلىسى بويىنشا تاپسىرمالار ورىندادى.
«بۇگىندە ءاربىر ادامنىڭ باستى مىندەتى – ساۋاتتى ۇرپاق تاربيەلەۋ. ءبىز كىتاپ وقۋ داعدىسىن بالالارىمىزعا ءسىڭىرۋىمىز كەرەك. مۇنى بالاباقشادان باستاۋ كەرەك», دەيدى رەسپۋبليكالىق عىلىمي-ادىستەمەلىك كىتاپحانانىڭ باس ادىسكەرى امانگۇل ەشىموۆا.
ال اباي, الماتى, اتىراۋ, جامبىل, تۇركىستان وبلىستارىنىڭ ادىسكەرلەرى «اتى اڭىزعا اينالعان جاسىباي كولىنىڭ جاعاسىندا كىتاپ وقۋ» سەكتسياسىندا ءوز جۇمىس تاسىلدەرىن ورتاعا سالدى. «اقبەت تاۋىنىڭ بوكتەرىندەگى تورايعىر كولىنىڭ جاعاسىندا كىتاپ وقۋ» سەكتسياسىندا باتىس قازاقستان وبلىسى, شىعىس قازاقستان وبلىسى, جەتىسۋ, ۇلىتاۋ, قىزىلوردا, پاۆلودار وبلىستارىنان كەلگەن ادىسكەرلەر مەن كىتاپحاناشىلار كىتاپحانا جۇمىسىندا جاڭا تەحنولوگيالاردى قولدانۋ ادىستەرىن كورسەتتى.
سەميناردى قورىتىندىلاۋ كەزىندە ءار وڭىردەن كەلگەن ۇزدىك كىتاپحاناشىلار توبى كورسەتكەن جۇمىسىنىڭ باعاسى بەرىلىپ, ديپلومدارمەن ماراپاتتالدى, ال قاتىسۋشىلارعا سەرتيفيكاتتار تابىستالدى.