ۇكىمەتتە «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىنىڭ جۇزەگە اسۋ بارىسى تالقىلاندى. پرەمەر-ءمينيستردىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەسكە مۇددەلى ورتالىق مەملەكەتتىك ورگان وكىلدەرىمەن بىرگە, وبلىس اكىمدەرىنىڭ ورىنباسارلارى قاتىستى.
ۇلتتىق جوبا اياسىندا جالپى سانى 655 العاشقى مەديتسينالىق-سانيتارلىق كومەك بەرۋ نىسانىن سالۋ كوزدەلگەن بولاتىن. بىلتىردان بەرى جۇزەگە اسىپ كەلە جاتقان باعدارلاما اياسىندا 95 نىسان پايدالانۋعا بەرىلگەن. جوبا اياسىندا اتقارىلىپ جاتقان شارالار تۋرالى دەنساۋلىق ساقتاۋ ۆيتسە-ءمينيسترى جاندوس بۇركىتباەۆ باياندادى. ونىڭ سوزىنشە, بۇگىندە 483 نىسان بويىنشا جوبالىق-سمەتالىق قۇجات دايىن. 355-ىنە قاتىستى ءتيىستى قارجى ءبولىندى.
«قازىردە وڭىرلەردە قۇرىلىس جۇمىستارى ءجۇرىپ جاتىر. سونىمەن قاتار ءبىز قالعان نىساندارعا قاتىستى جوبالىق قۇجاتتاردى بەكىتۋ, اۆتورلىق, تەحنيكالىق باقىلاۋ بويىنشا كەلىسىمشارتتاردى جاساۋ ءۇردىسىن دە باقىلاپ وتىرمىز», دەدى جاندوس بۇركىتباەۆ.
ۇلتتىق جوبا اۋىلداعى اعايىننىڭ مەديتسينالىق كومەككە قولجەتىمدىلىگىن ارتتىرۋدى كوزدەيدى. ونىڭ ازاماتتار ءۇشىن ماڭىزى اسا جوعارى ەكەنىن اتاپ وتكەن ۆيتسە-پرەمەر بىرقاتار تاپسىرما بەردى.
«قۇرىلىسى جۇرۋگە ءتيىس نىسانداردىڭ قاتارى كوپ ەكەنىن ەسكەرسەك, بۇل ماسەلە تۇراقتى ءارى جان-جاقتى قاداعالاۋدى قاجەت ەتەدى. جۇمىستاردىڭ ساپاسىنا باسا ءمان بەرىلۋگە ءتيىس. جوبانىڭ حالىق ءۇشىن الەۋمەتتىك ماڭىزى زور, سايكەسىنشە ارتىلار جاۋاپكەرشىلىك تە جوعارى. سول سەبەپتى بارلىق مۇددەلى مەملەكەتتىك ورگان, وبلىس اكىمدىگى جۇمىلا وتىرىپ, باقىلاۋدى كۇشەيتۋى قاجەت», دەپ اتاپ ءوتتى تامارا دۇيسەنوۆا.
ايتا كەتەيىك, جوبانىڭ جۇزەگە اسۋ بارىسىنا قاتىستى ەسەپ ۆيتسە-پرەمەر دەڭگەيىندە اپتا سايىن قاراستىرىلىپ وتىرماق.