نەگىزگى ۇلتتىق بىرىڭعاي تەستىلەۋدىڭ (ۇبت) ارالىق قورىتىندىلارى شىقتى. ۇلتتىق تەستىلەۋ ورتالىعىنىڭ حابارلاۋىنشا, وسى ۇبت باستالعاننان بەرى 164 مىڭ رەت تەست تاپسىرىلدى. 266 تالاپكەر 130 بالدان جوعارى ناتيجە كورسەتتى.
ورتالىقتىڭ دەرەگىنە سۇيەنسەك, وسىعان دەيىن نەگىزگى ۇبت-نى تاپسىرعان تالاپكەرلەردىڭ 74%-ى قازاق تىلىندە, 26%-ى ورىس تىلىندە, 115 ادام اعىلشىن تىلىندە تەستىلەۋدەن ءوتتى. تەستىلەۋ باستالعالى شەكتى بالدى 76% تالاپكەر جينادى. ورتاشا بالعا كەلەتىن بولساق, بۇل ازىرگە 68 بالدى قۇرادى. ەڭ جوعارى بالل – 138. ءالى ەشبىر تالاپكەر ۇبت-نىڭ ەڭ جوعارى 140 بالىن جينامادى. ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ناتيجەسىندە ۇبت-عا سوڭعى ءتورت اپتانىڭ ىشىندە 510 تالاپكەر قاتىستى.
بۇگىنگى تاڭدا 315 ەرەجە بۇزۋ فاكتىسى انىقتالدى. ونىڭ ىشىندە 219 تالاپكەر سمارتفون, شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 89 ادام شىعارىلىپ, ولاردىڭ ناتيجەلەرى جويىلدى. بەينەجازبالاردى تەكسەرۋدەن سوڭ, ەرەجە بۇزعان 7 ادامنىڭ ناتيجەسى جويىلدى. بوگدە تۇلعالار انىقتالعان جوق.
قوسا كەتسەك, 2024 جىلعى ۇبت اياقتالعاننان كەيىن دە, انىعىن ايتقاندا, وسى جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى. قايبىر جىلدارى ءتىپتى جوعارى بالل جيناپ, تەگىن وقۋعا تۇسكەن تۇلەكتەردىڭ دە تەستىلەۋ بەينەجازبالارىنا تالداۋ جۇرگىزۋدەن كەيىن گرانتىنان ايىرىلىپ قالعانى بار. سول سەبەپتى وسى تالاپتى تۇلەكتەردىڭ ەسىنە سالا كەتكىمىز كەلەدى.
ايتپاقشى, تاعى ءبىر ەسكەرەتىن دۇنيە ۇبت-عى ناتيجە ۇزدىك اتتەستات پەن «التىن بەلگىگە» اسەر ەتپەيدى. ويتكەنى «التىن بەلگى» – وقۋشىنىڭ, مەكتەپ ءبىتىرۋشىنىڭ 1-11 سىنىپ ارالىعىندا ۇزدىك وقىعانىن كورسەتەتىن بەلگى. بۇل بەلگى يەگەرى باسقا وقۋشىلار سەكىلدى تەستىلەۋ تاپسىرادى. بىراق جوعارى وقۋ ورنىنا تۇسۋدە, گرانتقا ۇمىتكەر كەزىندە ەكى مەكتەپ ءبىتىرۋشىنىڭ ۇبت-دا جيناعان بالى بىردەي بولعان جاعدايدا ەرەكشە بەلگى يەگەرىنە باسىمدىق (مۇنداي باسىمدىق حالىقارالىق جانە رەسپۋبليكالىق وليمپيادالاردىڭ جەڭىمپازدارى, وقۋ ۇزدىكتەرىنە دە بەرىلەدى – رەد.) بەرىلەدى. بيىل 11 سىنىپتى 186 مىڭ تۇلەك اياقتادى, ەرەكشە بەلگىگە ۇمىتكەر بولعان 7 704 تۇلەكتىڭ 7 420-سى «التىن بەلگى» بەلگى يەگەرى اتاندى.