ءى.جانسۇگىروۆ اتىنداعى جەتىسۋ ۋنيۆەرسيتەتى كەيىنگى جىلدارى شەتەلدىك ارىپتەستەرىمەن تىعىز قارىم-قاتىناس ورناتا باستادى. ونداعى ماقسات – بىلىمگەرلەردىڭ بىلىكتىلىگىن شىڭداۋ. وسى رەتتە وقۋ ورداسىنا پولشانىڭ سلۋپسك قالاسىنداعى پومور ۋنيۆەرسيتەتىنىڭ رەكتورى زبيگنەۆ وسادوۆسكي مەن پرورەكتورى دانۋتا گەرچينسكا كەلدى.
كەزدەسۋ بارىسىندا جەتىسۋ ۋنيۆەرسيتەتىنىڭ باسقارما توراعاسى – رەكتور ەرمەك بورىباەۆ پەن پومور ۋنيۆەرسيتەتىنىڭ رەكتورى زبيگنەۆ وسادوۆسكي ەكى ۋنيۆەرسيتەت اراسىنداعى ىنتىماقتاستىق جونىندەگى مەموراندۋمعا قول قويدى. پولشالىق دەلەگاتسيا ۋنيۆەرسيتەتتىڭ وقىتۋشى-پروفەسسورلىق قۇرامىمەن پىكىر الماسىپ, ەكى ەلدىڭ ءبىلىم جانە عىلىم سالاسىنىڭ دامۋى تۋرالى وي ءبولىستى.
«بۇگىنگى كەزدەسۋ ەكى جوعارى وقۋ ورنى اراسىنداعى بايلانىستى رەسمي تۇردە بەكىتىپ, الداعى ۋاقىتتا ءبىلىم جانە عىلىم سالاسىنداعى بىرلەسكەن قىزمەتىمىزگە جول اشادى. ستۋدەنتتەر, ماگيسترانتتار, وقىتۋشىلار مەن قىزمەتكەرلەر وقۋ جانە عىلىمي-ادىستەمەلىك جۇمىستار ءۇشىن بىرلەسكەن جوبالار, زەرتتەۋلەر مەن ازىرلەمەلەردى ىسكە اسىرۋعا كىرىسەدى. ءبىزدىڭ ءوزارا ىنتىماقتاستىعىمىز جەمىستى بولادى دەپ سەنەمىن», دەدى رەكتور ە.بورىباەۆ.
مەموراندۋم اياسىندا ەكى تاراپ اكادەميالىق ۇتقىرلىق باعدارلاماسىمەن وقىتۋشىلار مەن ستۋدەنتتەردى الماسۋ, بىرلەسكەن زەرتتەۋلەر جۇرگىزۋ جانە ۋنيۆەرسيتەتتىڭ باسقا دا اكادەميالىق باعىتتارى بويىنشا جۇمىستار جۇرگىزۋگە كەلىستى.
جەتىسۋ وبلىسى