بىزدە عانا ەمەس, الەمدە تۋريستەر اعىنى كوبەيىپ, سالاعا سۇرانىس ارتتى. سايكەسىنشە, ءبىزدىڭ تۋريزمدەگى كەم-كەتىگىمىز دە كورىنە باستادى. پرەزيدەنت قاسىم-جومارت توقاەۆ ءتۋريزمدى دامىتۋ جونىندەگى كەڭەستە وسى ولقىلىقتىڭ ورنىن تولتىراتىن ماسەلەلەرگە جەكە-جەكە توقتالدى.
ءيا, راسىندا تۋريزم سوزبەن عانا ايتىپ, جىلى جاۋىپ قويا سالاتىن سالا ەمەس. مەملەكەت باسشىسى وسىنى مەڭزەپ وتىر. پرەزيدەنت ەسكەرگەن ماسەلەلەردىڭ ىشىندە لوگيستيكانى ايتالىق. تۋريستىك ورىندار شەتەلدىك تۋريستەر ءۇشىن عانا ەمەس, ءوزىمىزدىڭ ەل ازاماتتارىنا دا جايلى بولۋى كەرەك. ولاردىڭ دەمالىس ايماقتارىنا ىڭعايلى كولىكپەن الاڭسىز جەتىپ, جاقسى ورىندى سايلاۋىنا مول مۇمكىندىك بولسا جاقسى. تاعى ءبىر ماسەلە, ەلدە تۋريستىك نىسانداردىڭ سانىن كوبەيتۋ ءۇشىن ينۆەستورلارعا قولداۋ كورسەتۋ جاعى اقساماۋى ءتيىس.
كەيىنگى جىلدارى ءوڭىر باسشىلارى بىرنەشە نەگىزگى سالاعا ينۆەستور تارتۋعا باسىمدىق بەرە باستاعان ەدى. ەندى وسى قاتارعا تۋريزم سالاسى دا قوسىلعالى تۇر. بۇعان قوسا تۋريزم ينفراقۇرلىمىن دامىتۋ ءۇشىن جەكە باعدارلاما, جۇيەلى جوسپار قاجەت. كەڭەستە ۆيزا, ميگراتسيا ماسەلەلەرىن شەشۋمەن قاتار, ەلىمىزدى حالىقارالىق دەڭگەيدە ناسيحاتتاۋ جاعى نازاردان تىس قالمادى. شىنى كەرەك, بىزگە جاقىن ازەربايجان, گرۋزيا, وزبەكستان مەملەكەتىن الىپ قاراساق, ولار وسى جۇمىسقا بىزدەن ەرتە كىرىسىپ, قازىر تۋريزمگە قولايلى ەل رەتىندە تانىلىپ ۇلگەردى. بىزگە دە كورشىلەرىمىزدىڭ بەلسەندىلىگى وڭ اسەر ەتەدى. بىراق ءبىز بۇل يگىلىكتى كورۋ ءۇشىن ولارمەن وسى سالادا تىعىز بايلانىس ورناتىپ, ەلىمىزدى حالىقارالىق دەيگەيدە تانىتۋعا كۇش سالۋىمىز قاجەت. وسى ماسەلەلەر كوپ كەشىكپەي رەتتەلسە, تۋريزمگە سەرپىن بەرەرى انىق.
دانيەل سەرجان ۇلى,
«Kazakh Tourism» ۇك» اكتسيونەرلىك قوعامى باسقارما توراعاسىنىڭ ورىنباسارى