«ماسەلە از ەمەس»: سەناتتا فارماتسەۆتيكا بويىنشا دوڭگەلەك ۇستەل ءوتتى

جيىنعا قاتىسۋشىلار حالىقتى قاۋىپسىز, ءتيىمدى جانە ساپالى دارىلىك زاتتارمەن, مەديتسينالىق ماقساتتاعى بۇيىمدارمەن قامتاماسىز ەتۋ ماسەلەلەرىن, سونداي-اق وتاندىق فارماتسەۆتيكا سالاسىنىڭ قازىرگى جاعدايى مەن دامۋ كەلەشەگىن تالقىلادى.

كوميتەت توراعاسى نۇرتورە ءجۇسىپ مەملەكەت باسشىسى وتاندىق فارماتسەۆتيكا ونەركاسىبىنىڭ الەۋەتىن دامىتۋعا باسا نازار اۋدارىپ وتىرعانىن جانە ءدارى-دارمەك نارىعىنداعى وتاندىق ءوندىرىستىڭ ۇلەسىن 2025 جىلعا قاراي 50%-عا دەيىن ارتتىرۋدى تاپسىرعانىن اتاپ ءوتتى.

«بۇگىندە فارماتسەۆتيكا ەكونوميكانىڭ قارقىندى دامىپ كەلە جاتقان سەكتورىنا جاتادى. قازاقستاننىڭ فارماتسەۆتيكالىق نارىعىندا 80-نەن استام وتاندىق ءوندىرۋشى جۇمىس ىستەيدى, ولاردىڭ جارتىسىنان ازى دارىلىك زاتتاردى وندىرەدى. وتاندىق كاسىپكەرلەر 900-گە جۋىق ءتۇرلى دارىلىك زاتتاردى جانە مىڭنان استام مەديتسينالىق بۇيىمداردى شىعارادى. الايدا, پروبلەمالار از ەمەس, ولاردىڭ ءبىرى – وتاندىق دارىلىك زاتتار مەن مەديتسينالىق ماقساتتاعى بۇيىمدار ءوندىرىسىن دامىتۋ», دەپ اتاپ ءوتتى نۇرتورە ءجۇسىپ.

دەنساۋلىق ساقتاۋ ءمينيسترىنىڭ ورىنباسارى جاندوس بۇركىتباەۆ دارىلىك زاتتار مەن مەديتسينالىق بۇيىمدار ءومىرىنىڭ بارلىق كەزەڭى قامتىلاتىن فارماتسەۆتيكا سالاسىن مەملەكەتتىك رەتتەۋ تۋرالى سەناتورلارعا ايتىپ بەردى. ول تىزبەكتە ازىرلەۋ, كلينيكاعا دەيىنگى جانە كلينيكالىق زەرتتەۋلەر, تىركەۋ, ءوندىرىس, قاۋىپسىزدىكتى باعالاۋ مەن ءونىمدى قولدانۋ جانە جويۋ قامتىلادى. فارماتسەۆتيكالىق ونىمدەردىڭ ساپاسىن باقىلاۋ وسى پروتسەستىڭ ماڭىزدى قۇرامداس بولىگى بولىپ تابىلادى. ول دارىلىك زاتتاردى تىركەۋ, پارتيالار مەن سەريالاردىڭ ساپاسىن باعالاۋ كەزەڭدەرىندە, سونداي-اق فارماكولوگيالىق قاداعالاۋ جانە فارماتسەۆتيكالىق ينسپەكتسيا جۇيەسى ارقىلى جۇزەگە اسىرىلادى.

«سك-فارماتسيا» جشس وكىلى ءوز كەزەگىندە سوڭعى جىلدارى حالىقتىڭ ناۋقاستانۋى كوبەيىپ كەلە جاتقانىن جەتكىزدى. سىرقاتتار اراسىندا تىنىس الۋ ورگاندارىنىڭ اۋرۋلارى كوبىرەك - 27%, قان اينالىمى جۇيەسى - 17%, نەسەپ - جىنىس جۇيەسى - 8%, اس قورىتۋ جۇيەسى - 8% جانە جۇكتىلىكتىڭ اسقىنۋى - 5% بولىپ وتىر.