ون ءبىر جىل پاتەر كەزەگىندە تۇرعان قالا تۇرعىنى الماس تانكەنوۆ بيىل الماتى قالاسى اكىمدىگىنەن جاڭا پاتەردىڭ كىلتىن الدى. قۋانىش يەسىمەن پىكىرلەسكەنىمىزدە مەملەكەتتىك قولداۋدىڭ, اسىرەسە جاستار ءۇشىن ءبىلىم الىپ, جۇمىس ىستەي باستاعان كەزەڭدە جەكە باسپاناسىنىڭ بولعانى ۇلكەن جەڭىلدىك ەكەنىن اتاپ ءوتتى.
«پاتەر كەزەگىندە 2013 جىلدان بەرى تۇرامىن. وسى جولى الماتى قالاسى اكىمدىگىنىڭ قولداۋىمەن ناۋرىزباي اۋدانىنداعى «شۇعىلا» شاعىن اۋدانىنان ءبىر بولمەلى پاتەرگە قول جەتكىزگەندە قۋانىشىمدا شەك بولمادى. بۇگىندە الماتى سياقتى ءىرى مەگاپوليستەردە ءبىلىم الىپ, جۇمىس ىستەپ جاتقان جاستار وتە كوپ. ولاردىڭ ءارى قاراي وتباسىن قۇرىپ, الەۋمەتتىك تۇرعىدان مۇقتاج بولماۋىن قامتاماسىز ەتەتىندەي تۇرعىن ءۇي باعدارلامالارىنىڭ كوپ بولعانى ابزال. ويتكەنى پاتەر الۋعا قاجەتتى العاشقى جارنانى جيناۋ ماسەلەسى جاس ماماندارعا, جاس وتباسىلارعا قيىندىق تۋعىزادى. ءوز باسىم وسى قالادا اگرارلىق كوللەدجدى ءتامامداپ, كاسپي ۋنيۆەرسيتەتىن قارجى ماماندىعى بويىنشا ءبىتىرىپ شىقتىم», دەيدى الماس.
بۇگىندە الماس جەكە كاسىپپەن اينالىسىپ ءجۇر. وسىدان ءتورت جىل بۇرىن وتباسىن قۇرعان. قازىرگى كەزدە جاس شاڭىراقتا ءبىر بالا ءوسىپ كەلەدى.
ء«وز ءۇيىم, ولەڭ توسەگىم» دەگەن ناقىلدىڭ ماڭىزىن ەندى ءتۇسىنىپ جاتقاندايمىن. العان پاتەرىمنىڭ اي سايىنعى تولەمى دە وتباسىنا سالماق تۇسىرمەيدى. بۇگىندە مەن سياقتى پاتەر كەزەگىن كۇتىپ جۇرگەن جاستار قانشاما؟ ولار جاستىق شاعىنىڭ جالدامالى پاتەردە ەمەس, ءوز شاڭىراعىندا وتكەنىن قالايدى. بولاشاقتا الەۋمەتتىك باعىتتا بەرىلگەن پاتەرلەردى جەكەشەلەندىرۋ ماسەلەسى زاڭنامالىق تۇرعىدا رەتتەلىپ جاتسا, قۇبا-قۇپ دەر ەدىم. ويتكەنى جىلدار بويى كەزەك كۇتىپ العان ءۇيىڭدى ءارى قاراي ءوز وتباسىڭنىڭ يگىلىگىنە پايدالانعانعا نە جەتسىن», دەيدى قۋانىشىن جاسىرماعان وتاۋ يەسى.
الماتى