جاقىندا تاشكەنت قالاسىندا «كوكونىس باقشا داقىلدارى مەن كارتوپتى ىرىكتەۋ, تۇقىم شارۋاشىلىعىندا جانە ءونىم وندىرۋدە رەسۋرستاردى ۇنەمدەيتىن جانە قارقىندى تەحنولوگيالاردى قولدانۋدىڭ عىلىمي نەگىزدەرى مەن كەلەشەگى» اتتى حالىقارالىق عىلىمي-كونفەرەنتسيا ءوتتى. وعان قورقىت اتا اتىنداعى قىزىلوردا ۋنيۆەرسيتەتىنىڭ عالىمدارى قاتىستى. ءبىزدىڭ عالىمدار وندا اتالعان جوعارى وقۋ ورنى مەن «وزبەك كوكونىس, باقشا جانە كارتوپ شارۋاشىلىعى» عىلىمي زەرتتەۋ ينستيتۋتىمەن ەكىجاقتى مەموراندۋم اياسىندا اتقارىلىپ جاتقان جۇمىستارعا توقتالدى.
كونفەرەنتسيادا قورقىت اتا اتىنداعى قىزىلوردا ۋنيۆەرسيتەتىنىڭ بوتانيكالىق باعى مەن جىلىجاي مەڭگەرۋشىسى, اۋىل شارۋاشىلىعى عىلىمدارىنىڭ كانديداتى سامالبەك قوسانوۆ بايانداما جاسادى. عالىم ءوز بايانداماسىندا ەلىمىزدەگى قاۋىن شارۋاشىلىعىن دامىتۋ ماقساتىندا ءامۋداريا مەن سىرداريا وزەندەرى ارالىعىنداعى وسەتىن قاۋىن سورتتارىنىڭ قۇرامىن تالدادى. سونداي-اق وسى سالاداعى وزەكتى ماسەلەلەر مەن كليماتتىق وزگەرىستەر, قاۋىندى قايتا وڭدەۋدە سورتتىق ەرەكشەلىكتەرىنە ءمان بەرۋ, عالىمدار مەن ديقاندار اراسىنداعى بايلانىستى ودان ءارى دامىتۋ جونىندەگى ويلارىن ورتاعا سالدى.
قىزىلوردالىق عالىمدار وزدەرى دايىنداعان بەس ءتۇرلى قاۋىن سورتىن سىناقتان وتكىزۋدى وزبەك عالىمدارىنا بەردى. ال ولاردىڭ ەرتە, ورتاشا, كەش پىسەتىن قاۋىن سورتتارىن سىر بويىندا تاجىريبەدەن وتكىزەدى. بۇدان بولەك, س.قوسانوۆ ۇلكەن عىلىمي ىزدەنىستەن كەيىن باسەكەگە قابىلەتتى, تاسىمالداۋعا ءتوزىمدى, ساقتاۋعا جارامدى, ءتاتتى قاۋىننىڭ جاڭا سورتتارىن شىعاراتىنىن جەتكىزدى.
وتاندىق عالىمداردىڭ عىلىمي ەڭبەكتەرىن «وزبەك كوكونىس, باقشا جانە كارتوپ شارۋاشىلىعى» عىلىمي زەرتتەۋ ينستيتۋتىنىڭ باس ديرەكتورى, اۋىل شارۋاشىلىعى عىلىمدارىنىڭ دوكتورى, پروفەسسور رۋستام نيزوموۆ جوعارى باعالادى.
الداعى تامىزدا وزبەكستان عالىمدارى قىزىلوردا وبلىسىنا كەلىپ, قاۋىن شارۋاشىلىعىمەن تانىسپاق.