ۆيتسە-پرەمەر سەرىك جۇمانعارين جەتىسۋ وبلىسىنا جۇمىس ساپارى اياسىندا ەگىس ناۋقانىنىڭ قورىتىندىلارىمەن جانە شەگىرتكەگە قارسى كۇرەس بارىسىمەن تانىستى.
بيىلدىڭ وزىندە وبلىستا 12,6 مىڭ گا جەرگە قانت قىزىلشاسى ەگىلدى, بۇل 2023 جىلمەن سالىستىرعاندا 2,6 مىڭ گەكتارعا ارتىق. 2026 جىلعا قاراي ەگىستىك القاپتارىن 15 مىڭ گا دەيىن جەتكىزۋ جوسپارلانعان, بۇل 2022 جىلعى كورسەتكىشتەن 3,6 ەسە ارتىق.
بۇگىنگى تاڭدا قۇنارلى جەرلەرىمەن تانىمال ايماق ەگىس القاپتارىن بەلسەندى تۇردە كەڭەيتىپ جاتىر. مۇندا كوكتەمگى ەگىس جۇمىستارى تولىق اياقتالدى: 432,5 مىڭ گا جازدىق داقىلدار, 309,3 مىڭ گا ءداندى داقىلدار, 90,4 مىڭ گا مايلى داقىلدار, 12,6 مىڭ گا قانت قىزىلشاسى جانە باسقا دا داقىلدار ەگىلدى.
جالپى, بيىل وبلىستا 2 ملن توننا ءونىم جيناۋ جوسپارلانىپ وتىر. ونىڭ ىشىندە تەك قانت قىزىلشاسى – 550 مىڭ توننا (2023 جىلى – 370 مىڭ توننا).
شەگىرتكە تەكتەس زيانكەستەرگە قارسى حيميالىق وڭدەۋ 109 مىڭ گا الاڭدا جوسپارلانعان. يتاليالىق پرۋسقا قارسى 21,6 مىڭ گا وڭدەلدى. وڭدەۋ جۇمىسىنا 17 بىرلىك جەرۇستى تەحنيكاسى جانە اۋىل شارۋاشىلىعى اۆياتسياسىنىڭ 4 ۇشاعى تارتىلعان. اۋماقتى زەرتتەۋمەن 136 ەرىكتى جانە 76 مامان اينالىسىپ جاتىر.
سەرىك جۇمانعارين قانت قىزىلشاسى سەبىلگەن «حيلنيچەنكو جانە ك» كوممانديتتىك سەرىكتەستىگىنىڭ (كس) ەگىس القابىن تەكسەردى. كاسىپورىن ءداندى جانە بۇرشاقتى داقىلداردى وسىرۋگە ماماندانعان, مال شارۋاشىلىعىمەن اينالىسادى. وڭدەلەتىن جەردىڭ جالپى اۋدانى – 11 000 گەكتار, ونىڭ 264 گەكتارى – سۋارمالى ۋچاسكەلەر. نەگىزگى داقىلدار – قانت قىزىلشاسى, سويا, ءداندى جانە جەمشوپ داقىلدارى. كس باسقارما توراعاسىنىڭ ورىنباسارى الەكساندر حيلنيچەنكونىڭ ايتۋىنشا, مەملەكەت قولداۋىنىڭ ارقاسىندا ولار قىزىلشا سالاسىن ءىس جۇزىندە قايتا دامىتۋعا قول جەتكىزگەن.
«بىلتىر وبلىس بويىنشا ورتاشا ءونىم گەكتارىنا 450 تسەنتنەر قانت قىزىلشاسى بولسا, ءبىزدىڭ شارۋاشىلىقتا ونىمدىلىك گەكتارىنا 700 تسەنتنەردى قۇرادى. بيىل ءبىزدىڭ شارۋاشىلىق قانت قىزىلشاسىنىڭ ەگىس القابىن تاعى 100 گەكتارعا ۇلعايتتى. ءبىز وتكەن جىلدان كەم ەمەس ءونىم الامىز دەپ كۇتىپ وتىرمىز», دەيدى فەرمەر.
سەرىك جۇمانعارين ەگىستىك باسىندا ءوڭىردىڭ اگرارشىلارىمەن كەزدەسىپ, ولارعا اۋىل شارۋاشىلىعىنداعى مەملەكەتتى قولداۋ شارالارى تۋرالى باياندادى. اتاپ ايتقاندا, قانت قىزىلشاسىن ءوندىرۋدى قولداۋ جونىندە توقتالدى.
«بۇگىندە قىزىلشا ءوسىرۋ وتە ءتيىمدى. وتكەن جىلى ءبىز قانت قىزىلشاسى تۇقىمىن سۋبسيديالاۋ نورماتيۆتەرىن جانە وڭدەۋگە تاپسىرىلعان قىزىلشا كولەمى ءۇشىن كيلوگرامىنا 15 تەڭگەدەن 25 تەڭگەگە دەيىن ارتتىردىق. زاۋىتتار ساتىپ الۋ باعاسىن 15 تەڭگەگە دەيىن كوتەردى. وسىلايشا, ءبىر توننا قانت قىزىلشاسىنىڭ جالپى قۇنى 40 مىڭ تەڭگەنى قۇرادى. گەكتارىنا 500 تسەنتنەر ونىمدىلىكپەن فەرمەردىڭ تابىسى شامامەن 2 ملن تەڭگەنى قۇرايدى. بۇگىندە قىزىلشا – ەڭ جوعارى مارجينالدى داقىل», دەپ اتاپ ءوتتى ۆيتسە-پرەمەر.
كەزدەسۋ بارىسىندا فەرمەرلەردىڭ ءبىرى سويا داقىلىن ساتىپ الۋ قۇنى تومەن ەكەنىن جەتكىزدى.
«بيىل اۋىسپالى ەگىستە سويانىڭ كولەمى ۇلكەن. ون جىل بۇرىن بىزدە سويانى كيلوگرامىنا 180 تەڭگەدەن قابىلدايتىن, بىراق سول كەزدە تراكتوردىڭ قۇنى 4 ميلليون تەڭگە بولاتىن. قازىر ساتىپ الۋ باعاسى وزگەرگەن جوق, ال تراكتورلاردىڭ قۇنى بىرنەشە ەسە قىمبات. سويانى شەتەلگە قالاي جىبەرەمىز؟» دەپ سۇرادى ول.
سەرىك جۇمانعارين ساۋدا جانە ينتەگراتسيا مينيسترلىگىنە اۋىل شارۋاشىلىعى مينيسترلىگىمەن بىرلەسىپ قىتايعا سويا ەكسپورتىنىڭ مۇمكىندىكتەرىن پىسىقتاۋدى تاپسىردى.
سونداي-اق جەتىسۋعا جۇمىس ساپارىنىڭ ءبىرىنشى كۇنى ۆيتسە-پرەمەر سالىنىپ جاتقان كوكونىس قويماسىنا جانە ءىرى جوبا بويىنشا جەڭىلدەتىلگەن نەسيەنىڭ ارقاسىندا ءوندىرىس كولەمىن ارتتىراتىن, روبوتتاندىرىلعان ساۋ جۇيەسىن ەنگىزەتىن تاۋارلى-ءسۇت فەرماسىنا باردى.
سەرىك جۇمانعارين سونداي-اق «اۋىل اماناتى» باعدارلاماسى بويىنشا بيزنەستى باستاعان شاعىن كاسىپكەرلەردىڭ جانە وتاندىق بيولوگيالىق تازا تىڭايتقىشتار وندىرۋشىلەردىڭ ونىمدەرىمەن تانىستى.