بىلتىرعى 1 شىلدەدەن باستاپ ەلىمىزدە الەۋمەتتىك كودەكس كۇشىنە ەنىپ, زەينەتاقى جۇيەسىنە ءبىراز وزگەرىس ەندى. ايەلدەردىڭ زەينەتكە شىعۋ جاسى 2028 جىلعا دەيىن 61 جاس بولىپ بەكىتىلدى. انا مەن بالانى قورعاۋ جۇيەسىندە دە ەلەۋلى وزگەرىس بار. «التىن القا» مەن «كۇمىس القا» يەلەنگەن انالار جاردەماقىلارىنىڭ مولشەرى سارالانىپ, بالا كۇتىمىمەن وتىرعاندار ءبىر جارىم جاسقا دەيىن جاردەماقى الۋعا مۇمكىندىك الدى.
سونداي-اق وسى الەۋمەتتىك كودەكس اياسىندا مۇگەدەكتىگى بار ازاماتتارعا قاتىستى كوپتەگەن جۇيەلى وزگەرىس ەنگىزىلدى. قىزىلوردا وبلىسىنا ساپارمەن كەلگەن ەڭبەك جانە حالىقتى الەۋمەتتىك قورعاۋ ۆيتسە-ءمينيسترى نازگۇل ساعىندىقوۆا وبلىس تۇرعىندارىمەن كەزدەسۋدە الەۋمەتتىك قولداۋدىڭ وسىنداي قادامدارى تۋرالى كەڭىنەن ايتتى.
قازىر اتاۋلى الەۋمەتتىك كومەكتى ەسەپتەگەندە وڭىرلىك ەڭ تومەنگى كۇنكورىس دەڭگەيىنە ءمان بەرسەك, 2025 جىلدان باستاپ بۇل ەسەپتەۋلەردە مەديانالىق تابىس نەگىزگە الىنادى. بۇل ااك مولشەرىن ءبىرشاما كوتەرەدى.
«اتاۋلى الەۋمەتتىك كومەكتى ەسەپتەگەندە تابىس كوزدەرىن عانا ەمەس شىعىستى دا ەسكەرۋ وتە ماڭىزدى. مەملەكەت باسشىسىنىڭ باستاماسىمەن قولعا الىنعان بۇل جاڭالىق كەلەر جىلى جۇزەگە اسىرىلا باستايدى. جالپى, الەۋمەتتىك كودەكس اياسىندا مۇگەدەكتىگى بار ازاماتتاردى قولداۋ جۇيەسىن ترانسفورماتسيالاۋ قاراستىرىلعان. مىسالى, دەنساۋلىق ساقتاۋ, ءبىلىم جان باسىنا شاققانداعى قارجىلاندىرۋعا كوشىپ, ول سالالارعا جەكە بيزنەس كەلە باستادى. وسى ارقىلى جەكە ەمدەۋ مەكەمەلەرى, جەكەمەنشىك مەكتەپتەر مەن بالاباقشالار پايدا بولدى. كودەكس شەڭبەرىندە ەندى جاقسى ناتيجە كورسەتكەن جان باسىنا شاققانداعى قارجىلاندىرۋ ءتاسىلى ءبىزدىڭ سالادا دا قولدانىلا باستايدى. وسى كۇنى اۋىلداردا ينفراقۇرىلىم جوقتىعىنان مۇگەدەكتىگى بار ازاماتتار قالاعا كوشىپ جاتىر عوي. ەندى ءبىزدىڭ تاريفتەردى پايدالانۋ ارقىلى بيزنەس جەرگىلىكتى جەرلەردە ازاماتتارعا قولايلى جاعداي جاسايدى», دەيدى ۆيتسە-مينيستر.
ارناۋلى الەۋمەتتىك قىزمەتتەردىڭ قولجەتىمدىلىگىن ارتتىرۋ جانە الەۋمەتتىك ساقتاندىرۋ جۇيەسىن جاڭعىرتۋ ماسەلەلەرى ءسوز بولعان كەزدەسۋدە مينيستر ورىنباسارى وتكەن جىلعى اتقارىلعان جۇمىستار قورىتىندىسىن دا بايان ەتتى. مىسالى, «وتباسىنىڭ تسيفرلىق كارتاسى» وسى سالاداعى ءتيىمدى قۇرال بولىپ وتىر. كوپبالالى وتباسىلاردى قولداۋ قادامدارى دا ناتيجەسىز ەمەس. مىسالى, 2019 جىلى ەلىمىز بويىنشا وسى قاتاردا 230 مىڭ وتباسى بولسا, بەس جىل ىشىندە ولاردىڭ سانى 2,5 ەسەگە ارتقان.
ۆيتسە-مينيستر بىلتىر جەرگىلىكتى اتقارۋشى بيلىك قىزىلوردا وبلىسىندا 366 نىساندى مۇگەدەكتىگى بار ادامداردىڭ بارلىق ساناتى ءۇشىن بەيىمدەگەنىن اتاپ ءوتتى.
كەزدەسۋدەن كەيىن ۆيتسە-مينيستر تۇرعىنداردى جەكە قابىلدادى. ساپار اياسىندا ول بالالارعا ارنالعان ارناۋلى الەۋمەتتىك قىزمەتتەر كورسەتۋ ورتالىعىنىڭ جۇمىسىمەن تانىسىپ, تۇرمىستىق زورلىق-زومبىلىقتان زارداپ شەككەندەرگە الەۋمەتتىك قىزمەتتەر كورسەتەتىن ورتالىققا باردى.
قىزىلوردا