«Eurasian Journal of Physics and Functional Materials» اتتى وتاندىق عىلىمي جۋرنال العاش رەت ورتالىق ازيا مەن تمد كولەمىندە «Digital Commons Elsevier» پلاتفورماسىندا شىعا باستادى. «Elsevier» – الەمدەگى ەڭ ءىرى عىلىمي باسپالاردىڭ ءبىرى. وندا دۇنيەجۇزىندەگى عىلىمي جۋرنالداردىڭ بارلىق ماقالاسىنىڭ تورتتەن ءبىرى باسىلادى.
اتالعان جۋرنال ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە 2017 جىلدان بەرى اعىلشىن تىلىندە جارىق كورەدى. عىلىمي باسىلىمنىڭ بارلىق ماقالاسى «Scopus» حالىقارالىق عىلىمي دەرەكتەر بازاسىنا ەنگىزىلگەن.
جۋرنالدا يادرولىق فيزيكا, جوعارى ەنەرگيا فيزيكاسى, بالامالى جانە سۋتەگى ەنەرگەتيكاسى سەكىلدى ءتۇرلى سالاداعى عىلىمي زەرتتەۋلەردىڭ ناتيجەلەرى تۋرالى ماتەريالدار قامتىلعان.
باسىلىمنىڭ حالىقارالىق رەداكتسيا القاسىنىڭ قۇرامىنا قازاقستان, رەسەي, اقش, فرانتسيا, جاپونيا, فينليانديا, شۆەتسيا, يتاليا, وزبەكستان, انگليا عالىمدارى, سونداي-اق CERN جانە بىرىككەن يادرولىق زەرتتەۋلەر ينستيتۋتى سياقتى الەمدىك دەڭگەيدەگى عىلىمي ۇيىمدار كىرەدى.
«Elsevier» كومپانياسى جۋرنالدى بازاعا قوسۋ جانە ەلەكتروندىق نۇسقاسىن شىعارۋ تۋرالى ۇسىنىسپەن شىقتى. «Elsevier» پلاتفورماسىندا «Eurasian Journal of Physics and Functional Materials» جۋرنالىنىڭ جاريالانۋى باسىلىمنىڭ عانا ەمەس, وتاندىق عىلىمنىڭ دامۋىنا دا جاڭا مۇمكىندىك اشادى. بۇل ەۋرازيا ۇلتتىق ۋنيۆەرسيتەتىمەن بىرگە ەلىمىزدە جۇرگىزىلىپ وتىرعان عىلىمي زەرتتەۋلەر ساپاسىنىڭ حالىقارالىق دەڭگەيىن مويىنداۋ», دەيدى جۋرنالدىڭ باس رەداكتورى, ەۇۋ «ەۋرازيالىق فيزيكا-ەنەرگەتيكالىق زەرتتەۋلەر جانە جوعارى تەحنولوگيالار ينستيتۋتى» عزي ديرەكتورى قايرات كۇتەربەكوۆ.