قىزىلوردادا ىشكى ىستەر مينيسترلىگى مەن ۇلتتىق قاۋىپسىزدىك كوميتەتى باس پروكۋراتۋرانىڭ كەلىسىمىمەن وڭىردەگى قىلمىستىق احۋالعا تەرىس ىقپال ەتكەن قىلمىستىق توپتىڭ جەتەكشىسى مەن مۇشەلەرىن ۇستاۋ بويىنشا ارنايى وپەراتسيا جۇرگىزدى, دەپ حابارلايدى Egemen.kz Polisia.kz سايتىنا سىلتەمە جاساپ.
ىشكى ىستەر مينيسترلىگى اتاپ وتكەندەي, قاماۋعا الۋدىڭ الدىندا جەدەل تەرگەۋ جۇرگىزىلگەن. ولاردىڭ قىلمىستىق ارەكەتى تۋرالى ايعاقتاردى جيناۋ قيىنعا تۇسكەن. بارلىق فاكتىلەر تەكسەرىلىپ جاتىر.
«توپ مۇشەلەرى ءوز ماقساتتارىن ىسكە اسىرۋ ءۇشىن ادامداردى ۇرلاپ اكەتىپ, مۇلكىن تارتىپ الىپ, قىلمىستىق قاقتىعىستارعا قاتىسقان. سونداي-اق ولاردىڭ ويىن-ساۋىق مەكەمەلەرىنە قىلمىستىق قامقورلىق كورسەتۋگە, قۇرىلىس جانە اۋىل شارۋاشىلىعى سالاسىندا بوپسالاۋلارعا قاتىسى بار-جوعى تەكسەرىلىپ جاتىر.
توپتىڭ نەگىزگى مۇشەلەرى قاماۋعا الىندى. اتىس جانە تراۆماتيكالىق قارۋ, ءىرى مولشەردە قاراجات تاركىلەندى. تەرگەۋ قىلمىستىق كودەكستىڭ بىرنەشە بابى بويىنشا جۇرگىزىلىپ جاتىر», دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.