بۇگىنگى قوعامدى الاڭداتىپ وتىرعان قىلمىستىڭ ءبىرى – الاياقتىق. ارامزا ىسكە بەل بۋىپ, وزگەنىڭ ماڭداي تەرىمەن تاپقان تابىسىن ءوز پايداسىنا جاراتاتىن الاياقتار ايىلىن جيماي تۇر.
اتىراۋ قالالىق پوليتسيا باسقارماسى تەرگەۋ ءبولىمى باستىعىنىڭ ورىنباسارى ايبەك ناسيەۆتىڭ دەرەگىنە قاراعاندا, جىل باسىنان بەرى الاياقتاردىڭ زاڭسىز ارەكەتىنەن جەرگىلىكتى جانە وزگە وڭىرلەردىڭ 200-گە جۋىق تۇرعىنى الاياقتاردىڭ قۇربانى بولعان. تەرگەۋ كەزىندە الاياقتىق قىلمىسقا بايلانىستى قۇقىق بۇزۋشىلىقتىڭ بىرنەشە ءتۇرى انىقتالىپ وتىر.
«بىرىنشىدەن, الاياقتار ارزان باعاعا مەملەكەتتىك باعدارلامالار ارقىلى كوپقاباتتى ۇيلەردەن پاتەر مەن جەر تەلىمدەرىن الىپ بەرۋدى ۇسىنادى. ەكىنشىدەن, جەكە كاسىپورىندارعا, ونىڭ ىشىندە مۇناي ءوندىرۋ كومپانيالارىنا, مەردىگەرلىك مەكەمەلەرگە جۇمىسقا ورنالاستىرۋعا ۋادە بەرەدى. ۇشىنشىدەن, زەينەتاقى قورىندا جينالعان قارجىنى الىپ بەرۋ تۋرالى ۇسىنىسپەن شىعادى. تورتىنشىدەن, مەملەكەتتەن سۋبسيديا الۋ ماقساتىندا «دامۋ» قورى ارقىلى قوماقتى نەسيە الىپ بەرەتىنىنە سەندىرەدى. وسىنداي الاياقتىق قۇقىق بۇزۋشىلىققا قاتىستى 300-گە جۋىق قىلمىستىق ءىس سوتقا جولداندى», دەيدى ا.ناسيەۆ.
ونىڭ ايتۋىنشا, تۇرعىندار الاقتاردىڭ ارباۋىنا تۇسپەۋ ءۇشىن بىرنەشە كەڭەستى ەسكەرۋگە ءتيىس. بىرىنشىدەن, جوعارىدا كورسەتىلگەن سىلتاۋلارمەن اقشا سۇراعان بەيتانىس جانداردىڭ بانكتىك ەسەپشوتىنا قارجى اۋدارماعان ءجون. ەكىنشىدەن, عالامتور جەلىسىندەگى جارنامالاردى الدىمەن تەكسەرىپ, زاڭدىلىعىنا كوز جەتكىزۋ كەرەك. ۇشىنشىدەن, ەلىمىزدە جۇمىسقا ورنالاستىراتىن رەسمي ورگاندار ازاماتتاردان اقشا المايتىنىن ۇدايى جادىدا ۇستاۋ قاجەت.
ال وبلىستىق پوليتسيا دەپارتامەنتى تەرگەۋ باسقارماسىنىڭ اسا ماڭىزدى ىستەر جونىندەگى اعا تەرگەۋشىسى مۇراتباي قادىروۆتىڭ ايتۋىنشا, اتىراۋلىق ۇلەسكەرلەر 3 جىلدا ءۇي قۇرىلىسىنا 5 ملرد تەڭگەگە جۋىق اقشا سالعان. بىراق ۇلەسكەرلەرگە پاتەر دە بەرىلمەگەن, اقشاسى دا قايتارىلماعان. دەمەك ولار الاياقتىق ارەكەتتىڭ كەسىرىنەن الدانىپ وتىر.
«تەرگەۋ باسقارماسىنىڭ وندىرىسىندە ىستەردى زەردەلەگەندە, سوڭعى 3 جىلدا تۇرعىن ءۇي قۇرىلىسىنا پاي جانە ۇلەسكەرلىك قاتىسۋ ارقىلى پاتەر الۋعا 500-گە جۋىق تۇرعىننىڭ قىزىعۋشىلىق تانىتقانىن بايقادىق. تۇرعىندار «جىبەك جولى», «اقمارجان-اتىراۋ», «Baisanat Residence», «Saraishyq», «Qazanat», «Family Town» تۇرعىن ءۇي كەشەندەرىنىڭ قۇرىلىسىنا سالىمشى بولعانى انىقتالدى. سالىمشىلارعا 5 ملرد تەڭگەگە جۋىق ماتەريالدىق شىعىن كەلتىرىلگەن. وكىنىشكە قاراي, ۇلەسكەر بولعان تۇرعىندار وسى كۇنگە دەيىن قۇرىلىسى اياقتالعان پاتەردى نەمەسە اقشا قاراجاتىن الا الماي ءجۇر. ۇلەسكەرلەردىڭ الدانۋ دەرەگىمەن 6 قىلمىستىق ءىس تىركەلدى», دەدى م.قادىروۆ.
پوليتسيا قىزمەتكەرلەرى الاياقتىق ارەكەتتىڭ كوبەيۋىنە بايلانىستى اتىراۋ تۇرعىندارىنا تۇرعىن ءۇي كەشەندەرىنەن پاتەر الۋ ءۇشىن قاراجات سالۋ كەزىندە ەسكەرەتىن بىرنەشە كەڭەستى ۇسىنىپ وتىر. بىرىنشىدەن, تۇرعىن ءۇي كەشەنىنىڭ قۇرىلىسىن جۇرگىزەتىن كومپانيادا مەملەكەتتىك ورگانداردىڭ رۇقسات قۇجاتى بار-جوعىنا كوز جەتكىزۋ كەرەك. ەكىنشىدەن, كۇماندى شارتتاردان باس تارتقان ءجون.
الاياقتىق جاسقا قارامايتىن قىلمىس تۇرىنە اينالىپ بارادى. بۇعان مىسال رەتىندە قارجى پيراميداسىن قۇرعان اتىراۋلىق زەينەتكەر ايەلدىڭ ارەكەتىن ايتۋعا بولادى. زەينەتكەر قارجى پيراميداسىن قۇرىپ, 5 جابىرلەنۋشىگە 4 ملن تەڭگە شىعىن كەلتىرگەن. جاقىندا اتىراۋ قالاسىنىڭ №2 سوتىندا قىلمىستىق كودەكستىڭ 217-بابى 2-بولىگىنىڭ 1-تارماعىمەن ايىپ تاعىلعان زەينەتكەرگە قاتىستى قىلمىستىق ءىس قارالدى.
«سوتتالۋشى ادامدار توبىنىڭ الدىن الا ءسوز بايلاسۋىمەن قارجى پيراميداسىنىڭ قۇرىلىمدىق بولىمشەسىن قۇرعان. سالىمشىلاردى تارتۋ ماقساتىندا كەڭسەنى جالعا الىپ, وندا كۇن سايىن ۇگىت-ناسيحات جۇرگىزىپ, جارنامالىق باننەرلەر ىلگەن. وسىلايشا, كاسىپكەرلىككە قاراجات تارتپاي, باسقالاردىڭ جارناسى ەسەبىنەن كەيبىر قاتىسۋشىلاردى بايىتۋ جولىمەن وسى اكتيۆتەردى تارتۋدان م ۇلىكتىك پايدا الۋ قىزمەتىن ۇيىمداستىرىپ, باسقارعانى انىقتالدى», دەپ حابارلادى وبلىستىق سوتتىڭ ءباسپاسوز قىزمەتى.
زەينەتكەر كىناسىن تولىق مويىنداپ, جابىرلەنۋشىلەرمەن تاتۋلاسۋىنا بايلانىستى ءوزىن قىلمىستىق جاۋاپتىلىقتان بوساتۋدى سۇرادى. ال جابىرلەنۋشىلەر سوتتالۋشىنى قىلمىستىق جاۋاپتىلىقتان بوساتىپ, قىلمىستىق ءىستى توقتاتۋدى ۇسىندى.
«قىلمىستىق جاۋاپتىلىق پەن جازانى جەڭىلدەتەتىن ءمان-جايلار رەتىندە سوتتالۋشىنىڭ زەينەتكەرلىك جاسى, جابىرلەنۋشىلەرگە كەلتىرىلگەن زالالدى ءوز ەركىمەن تولىقتاي وتەگەنى ەسكەرىلدى. جازانى اۋىرلاتاتىن ءمان-جايلار انىقتالمادى. سوتتالۋشى قىلمىستىق كودەكستىڭ 217-بابىنىڭ 2-بولىگىنىڭ 1-تارماعىمەن كىنالى دەپ تانىلدى. وعان بەلگىلى ءبىر قىزمەتپەن اينالىسۋ قۇقىعىن 3 جىل مەرزىمگە, باس بوستاندىعىن 3 جىل مەرزىمگە شەكتەۋ تۇرىندەگى جازا تاعايىندالدى», دەپ ءمالىم ەتتى سوتتىڭ ءباسپاسوز قىزمەتىنەن.
اتىراۋ وبلىسى