جاس وتورينولارينگولوگتەردىڭ استانا مەديتسينا ۋنيۆەرسيتەتىندە وتكەن «پلۋجنيكوۆ وقۋلارى» العاشقى ەۋرازيا حالىقارالىق مەكتەبىندە» بىلگىر ماماندار باس قوستى. وقۋ ورنىنىڭ 60 جىلدىعىنا وراي ۇيىمداستىرىلعان ءىس-شاراعا زەرتتەۋشىلەر, عالىمدار, رەزيدەنتتەر, ماگيسترانتتار, دوكتورانتتار قاتىستى.
باسقوسۋدا استانا مەديتسينا ۋنيۆەرسيتەتىنىڭ باسقارما توراعاسى-رەكتور كامالجان نادىروۆ ەۋرازيا حالىقارالىق مەكتەبىنىڭ ەلدەگى وتورينولارينگولوگيا باعىتىنا وڭ اسەر ەتەتىنىن جەتكىزدى. ول جاس مامانداردى وسى مۇمكىندىكتى بارىنشا ءتيىمدى پايدالانۋعا شاقىردى.
«ۋنيۆەرسيتەتتىڭ 60 جىلدىق مەرەيتويى اياسىندا ءوتىپ وتىرعان «پلۋجنيكوۆ وقۋلارىنىڭ» ءمانى بولەك. ويتكەنى, جاس وتورينولارينگولوگتەردىڭ الدىندا ەۋروپا, مىسىر, سينگاپۋر, ورتالىق ازيا ەلدەرى مەن رەسەيدىڭ بەلگىلى عالىمدارى بايانداما وقيدى. تاجىريبەسىن بولىسەدى. شەتەلدىك ساراپشىلاردىڭ كاسىبي كوزقاراسى قازاقستانعا پايداسىن تيگىزەدى دەپ سەنەمىز. وسى ارقىلى ماڭىزدى سالا دامىپ, بىلىكتى دارىگەرلەردىڭ قاتارى ارتادى دەگەن ويدامىن», دەدى كامالجان تالعات ۇلى.
جيىندا ەلىمىزدىڭ دارىگەرلەرى شەتەلدىك تانىمال عالىمدار مەن ساراپشىلاردىڭ باياندامالارىن تىڭدادى. عالىمداردىڭ سالاداعى وزىق جەتىستىكتەرىمەن تانىسىپ, بىلىكتى ماماندارمەن ەمەن-جارقىن پىكىر الىستى. سونىمەن بىرگە وسى ءىس-شارا بارىسىندا پرەزيدەنت ءىس باسقارماسى مەديتسينالىق ورتالىعى اۋرۋحاناسىنىڭ وتولارينگولوگيالىق كلينيكاسىندا, استانا قالاسى اكىمدىگىنىڭ №1 كوپسالالى قالالىق اۋرۋحاناسىنىڭ وتورينولارينگولوگيا ورتالىعىندا لور اعزالارىنىڭ زاماناۋي ەندوسكوپيالىق حيرۋرگياسى جونىندە كاسىبي كەڭەس بەرىلىپ, شەبەرلىك ساعاتى ءوتتى.