قوستانايدا ەرەكشە بالالاردى بەيىمدەۋ ورتالىعى اشىلدى

بۇل – ەلىمىزدە «Samruk-Kazyna Trust» قورى مەن «قازاقستان حالقىنا» قورىنىڭ قولداۋىمەن اشىلىپ وتىرعان ون جەتىنشى مەملەكەتتىك ورتالىق. ەمدەۋ-وڭالتۋ مەكەمەسى كەمتارلىعى بار بالالاردىڭ ەمىنە قاجەت بەيىمدەۋ جانە دياگنوستيكالىق مەديتسينالىق قۇرىلعىلار, ارنايى تەحنيكالىق قۇرالدار, ترەناجەرلەر مەن باعدارلامالى قۇرىلعى كەشەندەرىمەن جابدىقتالعان. سونداي-اق ورتالىقتا ۆەرتيكاليزاتور, يمپرەسسوندى ۆاننا, سەنسورلىق, شۋنگيت جانە تۇز بولمەسى, ەەگ, اۋديومەتريالىق مودۋل, وزگە دە زاماناۋي مەديتسينالىق قۇرىلعىلار بار. ەرتە بەيىمدەۋ ورتالىعى نەيرو-ورتوپەديالىق ناۋقاسقا شالدىققان جانە وسى اۋرۋدىڭ بەلگىلەرى بار ءۇش جاسقا دەيىنگى سابيلەرگە كومەك كورسەتۋدى كوزدەيدى.

ورتالىق وبلىستىق بالالار اۋرۋحاناسىنىڭ بەيىمدەۋ ءبولىمىنىڭ قۇرامىندا جۇمىس ىستەيتىن بولادى. «قامقورلىق قورىنىڭ» بالالارعا ارنالعان وسىنداي ەمدەۋ مەكەمەسىن اشۋ تۋرالى ۇسىنىسىنان كەيىن, وبلىس اكىمدىگى اۋدانى 500 شارشى مەتر بولاتىن عيماراتتى جونگە كەلتىرىپ, دايىندىق جۇمىستارىن جۇرگىزۋ ءۇشىن 55 ملن تەڭگە قارجى بولگەن. بۇعان «قامقورلىق  قورى» دا 124,6 ملن تەڭگە ءبولىپ وتىر. سونىمەن قاتار اكىمدىك ورتالىققا جىلىنا 256 ملن تەڭگە كولەمىندە قارجى ءبولىپ وتىرادى.

بەيىمدەۋ ءبولىمىنىڭ مەڭگەرۋشىسى گۇلبارام نۇرحانوۆانىڭ ايتۋىنشا, ورتالىققا نەۆرولوگ, رەابيليتولوگ دارىگەرلەر, ەدش نۇسقاۋشىلارى, لوگوپەد, دەفەكتولوگ, پسيحولوگ ماماندار جۇمىسقا الىنعان. ماماندار  بىلىكتىلىكتى ارتتىرۋدىڭ بىرنەشە كەزەڭىنەن وتەدى.

«ارينە, ءالى دە ماماندار كەرەك بولادى. مۇندا بالالار 21 كۇن بويى بەيىمدەۋ كۋرسىنان وتەدى. بىزدە 60 ورىن بار. ەمدەلۋشىلەر پەدكوررەكتسيا, يپپوترەناجەر, بالانىڭ تابانى مەن وكشەسىن, ءجۇرىسىن تۇزەيتىن كورۆيت اپپاراتى بار. بەيىمدەۋ ءبولىمى 10 جىلدان بەرى جۇمىس ىستەپ جاتىر. ەندى بۇگىنگى ورتالىقتىڭ اشىلۋى – بالالاردى ەرتە جاستان قولداۋ باعىتىنداعى مۇمكىندىگىمىزدى كەڭەيتە تۇسەدى», دەيدى ءبولىم مەڭگەرۋشىسى.       

ورتالىقتىڭ اشىلۋ سالتاناتىنا وبلىس اكىمىنىڭ ورىنباسارى رينات مۇحامەتقالي, دەنساۋلىق ساقتاۋ سالاسىنىڭ ماماندارى, «Samruk-Kazyna Trust», «قامقورلىق قورىنىڭ» وكىلدەرى قاتىستى. جالپى, بۇگىندە وڭىردە شامامەن 28 مىڭداي مۇمكىندىگى شەكتەۋلى ادام بار. ونىڭ 300-دەن استامى – ءۇش جاسقا تولماعان بالالار.

«اتالعان ورتالىق ەرەكشە قاجەتتىلىگى بار بالالاردىڭ ءومىر ءسۇرۋ ساپاسىن جاقسارتا تۇسەدى. اكىمدىك ورتالىققا ءاردايىم قولداۋ كورسەتىپ وتىراتىن بولادى. ورتالىقتى ۇستاپ تۇرۋعا جىلىنا 250 ملن تەڭگە ءبولىپ وتىراتىن بولامىز», دەدى رينات مۇحامەتقالي.

«Samruk-Kazyna Trust»  قورىنىڭ باس ديرەكتورى ءالفيا اديەۆانىڭ ايتۋىنشا, جاڭا ورتالىق قوزعالىس داعدىلارىن دامىتۋدىڭ زاماناۋي تەحنولوگيالارىمەن, ارنايى تەحنيكالىق قۇرالدارمەن, ترەناجەرلارمەن, اپپاراتتىق-باعدارلامالىق كەشەندەرمەن جابدىقتالعان.

«ەرتە قولعا الۋ ورتالىعى بالالارعا الەۋمەتتەنۋگە, قاجەتتى وڭالتۋ ەمىن الۋعا, ومىرلىك ماڭىزدى داعدىلاردى مەڭگەرۋگە جانە بىلىكتى كومەك الۋعا مۇمكىندىك بەرەدى. ورتالىققا 46 بالا كەلىپ, وڭالتۋ كۋرسىنان ءوتىپ جاتىر. ەرتە قولعا الۋ ورتالىقتارىن قۇرۋ جوباسى ەرەكشە بالالاردىڭ ءوز تۇرعىلاستارىنان دامۋ الشاقتىعىن ازايتۋعا ىقپال ەتەدى جانە ولاردىڭ بالاباقشادا, مەكتەپتە, جالپى ومىرگە بەيىمدەلۋ مۇمكىندىگىن ارتتىرادى. تۋىلعاننان ءۇش جاسقا دەيىنگى كەزەڭ بالانىڭ دامۋىنداعى ەڭ ماڭىزدى كەزەڭدەردىڭ ءبىرى. جالپى, ينكليۋزيانى دامىتۋ اياسىندا «سامۇرىق-قازىنا» قورىنىڭ قولداۋىمەن, ونىڭ ىشىندە سەرىكتەستەرمەن بىرلەسە وتىرىپ, ءتۇرلى باعىتتاعى 38 وڭالتۋ ورتالىعى اشىلدى. سونداي-اق سەرىكتەستەرمەن بىرلەسىپ, جاڭا وڭالتۋ ورتالىقتارىن جانە اۋتيزمگە شالدىققان بالالارعا ارنالعان ورتالىقتاردى ىسكە قوسۋ ماسەلەسىن پىسىقتاپ جاتىرمىز», دەگەن ءالفيا اديەۆا جاڭا دەنساۋلىق ساقتاۋ ۇيىمىنىڭ ماڭىزدىلىعىن جەتكىزدى.

جالپى, «قازاقستان حالقىنا» قورى دەنساۋلىق ساقتاۋ جانە الەۋمەتتىك كومەك سالاسىنداعى كوپتەگەن جوبالارعا مۇرىندىق بولىپ وتىرعانىن ايتا كەتۋ كەرەك. قوردىڭ باسىم باعىتتارىنىڭ ءبىرى – بالالارعا وڭالتۋ كومەگىن كورسەتۋگە باعىتتالعان ينفراقۇرىلىمدى دامىتۋ.

«سوڭعى جىلدارى ەل كولەمىندە  قانشاما اۋتيزمگە شالدىققان بالالارعا ارنالعان ورتالىقتار مەن بالالارعا ارنالعان وڭالتۋ ورتالىقتارىن ۇيىمداستىرۋ جوبالارى جۇزەگە اسىرىلدى. ماسەلەن, قوستانايداعى جاڭا ورتالىققا جىل سايىن 600-دەن استام بالا كەلىپ, ۋاقتىلى كومەك الىپ, دياگنوستيكادان وتە الادى. بۇل ولاردىڭ ءومىر ساپاسىن جاقسارتادى. جوبا اياسىندا جاڭا جابدىقتار ساتىپ الىندى, ماماندار وقۋ كۋرستارىن ءتامامدادى», دەيدى «قازاقستان حالقىنا» قق دەنساۋلىق ساقتاۋ سالاسىنداعى باعدارلامالار مەن جوبالاردى باسقارۋ ورتالىعىنىڭ باسشىسى گۇلزيا بيداتوۆا.

«قامقورلىق قورى» كورپوراتيۆتىك قورىنىڭ ديرەكتورى ارايلىم ەركىنوۆانىڭ ايتۋىنشا, قوستانايدا اشىلعان جاڭا ورتالىق وڭىردەگى ەرەكشە بالالاردى ساپالى جانە جان-جاقتى وڭالتۋعا, ولاردىڭ مەيلىنشە دامۋىنا جانە قوعامنان ءوز ورنىن تابۋىنا ىقپال ەتەدى. بۇگىنگى تاڭدا ەلىمىزدە قر ۇكىمەتى, وڭىرلەردەگى اكىمدىكتەر, «قازاقستان حالقىنا» قورى, «سامۇرىق-قازىنا» ۇاق ءتارىزدى جوبا سەرىكتەستەرىنىڭ بىرلەسكەن كۇشىمەن 17 مەملەكەتتىك ەرتە قولعا الۋ ورتالىعى اشىلعان. بيىل تاعى 3 ورتالىق اشىلماق. ەرەكشە بالالارعا ارنالعان ەرەكشە ورتالىقتار جىل سايىن شامامەن 12000 بالا قابىلدايدى.