بۇل تۋرالى مەملەكەت باسشىسى قاسىم-جومارت توقاەۆ ۇقشۇ-عا مۇشە ەلدەر پارلامەنتتەرى پالاتالارىنىڭ سپيكەرلەرىمەن كەزدەسۋ بارىسىندا ايتتى, دەپ حابارلايدى Egemen.kz.
قازاقستان ۇقشۇ-عا توراعالىعى اياسىندا قاۋىپسىزدىكتى قامتاماسىز ەتۋدى كوزدەيتىن حالىقارالىق ۇيىمدارمەن جانە قۇرىلىمدارمەن ىقپالداستىقتى نىعايتۋعا نيەتتى.
«بۇۇ, تمد جانە شىۇ-نىڭ سالالىق قۇرىلىمدارىمەن ىنتىماقتاستىقتى كەڭەيتۋ اسا ماڭىزدى دەپ سانايمىز. بيىل قاڭتار ايىندا ۇقشۇ حاتشىلىعى مەن تمد تەرروريزمگە قارسى كۇرەس ورتالىعى اراسىنداعى ىنتىماقتاستىق تۋرالى مەموراندۋمعا قول قويىلدى. ءبىز مۇنى قۇپتايمىز», دەدى پرەزيدەنت.
مەملەكەت باسشىسى سپيكەرلەرگە قازاقستاندا جۇرگىزىلىپ جاتقان رەفورمالار قوعامنىڭ بارلىق سالاسىن, سونىڭ ىشىندە ساياسات, ەكونوميكا جانە يدەولوگيا باعىتتارىن جۇيەلى تۇردە جاڭعىرتۋدى كوزدەيتىنىن ايتتى.
قاسىم-جومارت توقاەۆ ەكونوميكا سالاسىنا توقتالا كەلىپ, ەلىمىزدىڭ ءىجو كولەمى 265 ميلليارد دوللارعا جەتكەنىن مالىمدەدى.
«2023 جىلى شەتەلدەن 23 ميلليارد دوللاردان استام تىكەلەي ينۆەستيتسيا تارتىلدى. ەلىمىزدىڭ حالىقارالىق رەزەرۆتەرى 100 ميلليارد دوللارعا جۋىقتادى. حالىقارالىق ۆاليۋتا قورىنىڭ بولجامى بويىنشا بيىل قازاقستاننىڭ جان باسىنا شاققانداعى ىشكى جالپى ءونىمى 13 پايىزعا ءوسىپ, شامامەن 15 ميلليارد دوللاردى قۇراۋعا ءتيىس. جاقىندا مەن كاسىپكەرلىك ەركىندىك پەن باسەكەلەستىكتىڭ دامۋىن قامتاماسىز ەتۋ, مەملەكەتتىڭ ەكونوميكاداعى ۇلەسىن قىسقارتۋ جانە بيزنەس شىعىندارىن ازايتۋ ارقىلى ەكونوميكانى ىرىقتاندىرۋعا نەگىز قالايتىن جارلىققا قول قويدىم. ەكونوميكالىق قىزمەت سالاسىنداعى قىلمىستىق قۇقىقبۇزۋشىلىقتاردى دەكريميناليزاتسيالاۋ ارقاسىندا بيزنەستىڭ قۇقىقتارى مەن زاڭدى مۇددەلەرىن قورعاۋ ءىسى ايتارلىقتاي كۇشەيدى», دەدى پرەزيدەنت.