وڭتۇستىك افريكادا فۋتبول دوداسى ابدەن قىزدى. “تويدىڭ بولعانىنان بولادىسى قىزىق” دەگەن قاناتتى ءسوز بار عوي. وسى قيسىنعا سالساڭ, اياقدوپتىڭ وتىمەن كىرىپ, ك ۇلىمەن شىققاندار مۋنديالدىڭ باس بايگەسىن الەم چەمپيوناتى باستالماي جاتىپ يسپانيانىڭ قانجىعاسىنا بايلاپ جىبەرگەن ەدى. 2008 جىلدىڭ ەۋروپا چەمپيونى ەكەنىن ەسكەرگەن شىعار. سونداعى ويناعان مىقتى ويىنشىلاردىڭ ءبارى قۇراماداعى ورنىن ساقتاپ كەلىپ وتىر مىنا دوداعا. الەمدەگى ەڭ ۇزدىك سانالاتىن ەكى گولكيپەرى جانە بار. قورعانىس شەبى تاسقامال. شابۋىلدا حاۆي, ينەستا, سيلۆا, الونسومەن تىزە قوسىپ ۆيليا مەن توررەستىڭ جاي وعىنداي جارقىلداپ اتوي سالۋى قاي مىقتىنىڭ دا جۇرەگىن شايلىقتىرار ەدى.
سول يسپانيا شۆەيتساريادان 0:1 ەسەبىمەن جەڭىلىس تاپتى.
سوڭعىسىندا يسپانيا قۇراماسىنداعىداي “سەن تۇر مەن اتايىن” سايىپقىراندار جوق بولعانىمەن, ەرىك-جىگەرلەرى مىقتى بولىپ شىقتى. باس باپكەر وتتمار حيلتسفەلد كوماندانى نەمىستەردىڭ تەمىر تارتىبىنە كوشىرىپتى. ەڭسەگەي بويلى شۆەيتساريالىقتار يسپاندىقتاردىڭ شۋ دەگەننەن شابۋىلعا شىعارىن ءبىلىپ, قاقپا الدىندا تاپجىلماي تۇرىپ الدى. دەل بوسكە شۆەيتساريالىقتاردىڭ قورعانىسىن قيقىمداپ سوگۋدىڭ بار امالىن جاسادى. ءسويتىپ, ول مۇمكىندىگىنشە بار مىقتىلارىن ايقاس وتىنە سالدى.
جاراقاتىنان ءالى تولىق ايىقپاعن ينەستاعا دا سالماق سالعان. جاعداي قيىنداعاندا سۇرمەرگەن توررەستى دە شابۋىلعا شىعاردى. العاشقى تايمدا ينەستادان ادەمى پاس العان ورتالىق قورعاۋشى پيكەنىڭ گول سوعاتىنداي-اق مۇمكىندىگى تۋىپ ەدى. الايدا, قاقپاشى ديەگو بەنالو الدىن وراپ كەتتى.
ءبىر قاراعانىمىزدا يسپان قاقپاشىسى كاسيلياس الدىنا دوپ بارماي زەرىگىپ تۇرعانداي كورىنگەن. مىنە, سول تۇستان شي شىقتى. بەنالو دوپتى دەرديوكقا ۇزاتقان. ول ونى نكۋفوعا, ال بۇل سايىپقىران كولدەنەڭدەپ ۇزاعان تۇرىك جىگىتى دەرديوكتىڭ اياعىنا بايلاپ بەردى. قاقپا الدىنداعى قاربالاس. تۇرىك جامپوزىنان دوپ العان جەلسون فەرناندەس قۇلاعان يسپان قورعاۋشىسىن باسا-ماسا قاقپاعا اتوي سالدى. گول!
ەستەرىنەن ايىرىلىپ قالا جازداعان يسپاندىقتار شابۋىل ۇيىمداستىرىپ, ويىندى تەڭ جاعدايدا اياقتاۋعا تىرىسقاندارىمەن ناتيجەگە جەتە المادى. حابي الونسونىڭ شىرەنە تەپكەن دوبى قاقپا جاقتاۋىنا ءتيىپ كەيىن سەرپىلدى دە بار ءۇمىت سونىمەن كەتكەندەي بولدى.
ءبىر قىزىعى, يسپاندىقتارمەن بۇعان دەيىن 18 رەت جاسىل الاڭدا كەزدەسكەن شۆەيتساريالىقتار ولاردى ءبىر رەت جەڭىپ كورمەپتى. ءۇش مارتە تەڭ تۇسكەنىن قوسقاندا, دوپ ايىرماشىلىعى 15:45. الەم چەمپيوناتىندا ەكى رەت جولدارى ءتۇيىسىپ, ەكەۋىندە دە يسپاندىقتار جەڭگەن. دوپ ايىرماشىلىعى 5:1. سوندىقتان, يسپاندىقتاردىڭ بۇل كەزدەسۋگە قالپاقپەن ۇرىپ الارداي سەنىمدە شىققاندىعى زاڭدى ەدى. بىراق, ءومىر كەيدە ماقتاۋلى قۇرامانى دا جەڭۋگە بولاتىندىعىن بايقاتىپ كەتتى.
گوندۋراس-چيلي كەزدەسۋىندە چيليلىكتەر 0:1 ەسەبىمەن جەڭىسكە جەتتى.
ال, الاڭ يەلەرى وڭتۇستىك افريكا رەسپۋبليكاسى قۇراماسىنىڭ ۋرۋگۆايدان 0:3 ەسەبىمەن جەڭىلۋى ءادىل تورەشىلەرگە دەگەن كوڭىلدەگى كوپ كۇدىكتىڭ شوعىن كوسەپ كەتتى. وبالى كانە, ۋرۋگۆاي ەشكىمنەن دوپ ساۋعالامايتىن كوماندا. مىقتى. العا فورلان مەن سۋارەسكە سيتسيالىق كۆانيدى قوساقتاعان باس باپكەر تابارەس قورعانىستان گورى شابۋىلدى قولاي كورەتىنىن اڭعارتقان ەدى. ديەگو فورلان ءبىرىنشى تايمنىڭ ورتاسىندا ادەمى گول سوقتى. وڭتۇستىك افريكا قۇراماسىنىڭ كاپيتانىنا سوعىلىپ كىرگەن گولدىڭ وكىنىشى كەتپەي جاتىپ, تورەشى ماسسيمو بازۋككا ءوزىنىڭ كومەكشىلەرىمەن وار قۇراماسىن ءبىرجولا تۇيىققا تىرەدى. پەنالتي بەلگىلەگەنى ازداي, بەلدى قاقپاشىسى كحۋنەنى الاڭنان قۋدى.
بۇل جونىندە ۇلكەن ايقاي بولادى ءالى. ويتكەنى, دوپ سۋارەستىڭ اياعىنا جەتكەنگە دەيىن ول وفسايدتا تۇرعان كاۆانيدىڭ الدىنان قايتقان. مۇنداي جاعدايدا پەنالتي بەلگىلەۋ قيسىنسىز. ەكىنشىدەن, قاقپاشى قاقتى دەگەن سۋارەستىڭ قۇلاۋى كۇمان تۋدىرادى. قايتالاپ كورسەتۋ كەزىندە قارسىلاسىنىڭ قاقپاشىنى ادەيى قۇلاتپاعاندىعى بايقالادى. وندا نەگە بۋزاككا بۇزاقىلىق جاساۋعا تىرىستى؟
ماسەلەنىڭ ءۇشىنشى جاعى دا بار. ەندى وار قۇراماسىنا ءوز توبىنان شىعۋ ءۇشىن فرانتسۋزداردى قالايدا ۇتۋى كەرەك. ال, فرانتسۋزداردىڭ وڭاي شاعىلاتىن جاڭعاق ەمەس ەكەندىگىن ەسكەرسەك, وڭتۇستىك افريكالىقتاردىڭ جاعدايى مۇشكىل. ءوز ەلىندە ءوتىپ جاتقان الەم چەمپيوناتىندا ءوز توبىنان شىعا الماي قالعان قۇراما رەتىندە تاريح جىلناماسىنا تىركەلەدى.
برازيليا قۇراماسى سولتۇستىك كورەيا كومانداسىن اۋپىرىمدەپ 2:1 ەسەبىمەن جەڭدى. اندريانۋ, پاتۋ جانە قاسقا ءتىسى جارقىراپ ويىنشىلاردى ءبىر ماقساتقا جۇمىلدىرىپ جۇرەتىن قارا مارجان رونالدينو سياقتى جامپوزداردى “سەندەر الەم چەمپيوناتىن تەلەديداردان كورىڭدەر” دەپ قۇراماعا الماي كەتكەن باپكەر دۋنگۋ اسا بىلگىرلىك كورسەتپەدى. ويتكەنى, ماقتاۋلى برازيليالىقتاردان گورى سولتۇستىك كورەي ويىنشىلارىنىڭ كەيبىر ساتتەردە مىقتىلىق تانىتقانىن بۇكىل الەم كورىپ وتىردى.
كۇشتەرى تەڭ پورتۋگاليا مەن كوت-د' يۆۋار اراسىنداعى ويىن 0:0 ەسەبىمەن اياقتالدى. پورتۋگاليالىق الەمگە ايگىلى سۇرمەرگەن كريشتيانۋ رونالدۋ بۇل كەزدەسۋدە دوپ سوعۋ ءۇشىن بار مۇمكىندىكتى جاسادى-اق. ماسەلەن, رونالدۋدىڭ وتىز مەتردەن زەڭبىرەكتىڭ وعىنداي اتقان دوبى قاقپانىڭ باعانىن ج ۇلىپ كەتە جازدادى. جانى قىل ۇشىندا وتىرعان ديدە دروگبا كوكتەگى قۇدايعا اقسارىباس اتادى بىلەم. ورنىنان ءۇش تۇرىپ, ءۇش وتىردى. “جالعىز اعاش ورمان ەمەس”. قورعاۋشىلار رونالدۋدى ماتاپ تاستادى. ەكى جاقتا دا گول سوعاتىنداي ساتتەر بولعانىمەن ءساتى تۇسپەي, بەيبىت تارقاستى.
جان الىسىپ, جان بەرىسەتىن ويىندار وسىلايشا جالعاسىپ جاتىر.
باقتيار تايجان.