ساۋدا جانە ينتەگراتسيا ءمينيسترى ارمان شاققاليەۆ باستاعان قازاقستان بيزنەس-دەلەگاتسياسى قىتايدىڭ تسزيانسۋ پروۆينتسياسىنىڭ نانكين قالاسىنا بارىپ, «تسزيانسۋ – ورتالىق ازيا» ساۋدا ورتالىعى الاڭىندا بولدى. اۋقىمدى جوبا SOHO Holdings Group كومپانياسىمەن بىرلەسىپ جۇزەگە اسىرىلىپ جاتىر, دەپ حابارلايدى Egemen.kz اتالعان مينيسترلىكتىڭ ءباسپاسوز قىزمەتىنە سىلتەمە جاساپ.
وسى جىلدىڭ ناۋرىز ايىندا قازاقستان مەن قىتاي «ورتالىق ازيا – تسزيانسۋ» كوپفۋنكتسيونالدى ورتالىعىن قۇرۋ تۋرالى كەلىسىمگە كەلگەن ەدى. ەكسپورتتى قولداۋ بويىنشا QazTrade ۇلتتىق وپەراتورى مەن Jiangsu SOHO HoldingsGroup Co Ltd حالىقارالىق كومپانيالار توبى ءتيىستى قۇجاتقا قول قويدى.
تاراپتار قىتايدىڭ تسزيانسۋ پروۆينتسياسىندا ساۋدا ورتالىعىن سالۋ جوباسىن جۇزەگە اسىرۋعا كەلىستى. ساۋدا الاڭىندا قازاقستان ونىمدەرى, ال بولاشاقتا ورتالىق ازيا ەلدەرىنىڭ تاۋارلارى ساتىلىمعا شىعارىلادى.
تسزيانسۋعا ساپارى بارىسىندا ارمان شاققاليەۆ كومپانيا وكىلدەرىمەن بىرقاتار كەزدەسۋ وتكىزىپ, قازاقستان مەن ورتالىق ازيا ەلدەرى ءۇشىن سالىنعان ساۋدا پاۆيلونىن ارالادى.
SOHO HoldingsGroup وكىلىنىڭ ايتۋىنشا, جوبا بويىنشا نانكين قالاسىنىڭ دامىعان اۋدانىندا 11 عيمارات سالۋ جوسپارى بار. اتالعان نىسانداردىڭ بارلىعى بيزنەستىڭ جاڭا تۇرلەرىن, سونىڭ ىشىندە ترانسشەكارالىق نىسانداردى ورنالاستىرۋعا ارنالعان. قازاقستان جانە ورتالىق ازيا مەملەكەتتەرىنىڭ ءونىم وندىرۋشىلەرى ءۇشىن ءتورت قاباتتى بولەك پاۆيلون قاراستىرىلعان.
«قىتاي – ءبىزدىڭ ستراتەگيالىق ساۋدا سەرىكتەسىمىز. قازاقستانمەن ەكىجاقتى ساۋدا اينالىمىندا جەتەكشى ورىن الادى. مەملەكەت باسشىسى قىتايمەن ءوزارا ساۋدانى 100 ميلليارد دوللارعا جەتكىزۋ مىندەتىن قويدى. «ورتالىق ازيا – تسزيانسۋ» جوباسىن جۇزەگە اسىرۋ وتاندىق وندىرۋشىلەردىڭ قىتاي نارىعىنا شىعۋىنا ىقپال ەتىپ, ەكى ەل اراسىنداعى ساۋدا-ەكونوميكالىق قارىم-قاتىناستىڭ كەڭەيۋىنە سەرپىن بەرەدى», دەدى قازاقستاننىڭ ساۋدا جانە ينتەگراتسيا ءمينيسترى.
سونداي-اق ا.شاققاليەۆ ساۋدا پاۆيلونىنىڭ اۋماعى 2 مىڭ شارشى مەتردى قۇرايتىنىن, ونىڭ باسىم بولىگى وتاندىق تاۋارلار كورمەسىنە بولىنەتىنىن اتاپ ءوتتى. جوبانى ازىرلەۋشىلەردىڭ ايتۋىنشا, ساۋدا كەشەنىنىڭ ءبىرىنشى قاباتىندا قىتايلىق كەلۋشىلەر ءۇشىن قازاقستاننىڭ مادەنيەتى مەن ەرەكشەلىكتەرى تۋرالى تانىستىرۋ الاڭى ورنالاسادى. ەكىنشى قاباتتا ءارتۇرلى ساناتتاعى وتاندىق تاۋارلار كورسەتىلەدى. قالعان قاباتتاردا قازاقستان كومپانيالارىنىڭ كەڭسەلەرى ورنالاسادى.
ء«بىز وتاندىق بيزنەستى وتاندىق تاۋارلاردىڭ ەكسپورتتىق الەۋەتىن كورسەتۋ ءۇشىن ورتالىق ازيا – تسزيانسۋ الاڭىندا ءوز ونىمدەرىن بەلسەندى تۇردە كورسەتۋگە شاقىرامىز. بۇل رەتتە قىتاي تاراپى QazTrade كومپانياسىنا قازاقستان ءونىمىن كۆوتا بويىنشا ورنالاستىرۋعا ايرىقشا قۇقىق بەرەدى», دەدى ارمان شاققاليەۆ وندىرۋشىلەرگە.
قىتايلىق سەرىكتەستەردىڭ ايتۋىنشا, نانكيندەگى ورتالىق ازيا – تسزيانسۋ ساۋدا ورتالىعىنىڭ رەسمي اشىلۋى قىركۇيەك ايىنا جوسپارلانعان. وسىعان وراي ساۋدا جانە ينتەگراتسيا ءمينيسترى ارمان شاققاليەۆ وتاندىق تاۋار ۇلگىلەرىن قىتايدىڭ تسزيانسۋ پروۆينتسياسىنا جونەلتۋ ءۇشىن جەدەل دايىندىقتى باستاۋدى اتاپ ءوتتى. قازاقستاننىڭ ىسكەر توپتارىنىڭ قاتىسۋىمەن وتكەن كەزدەسۋدە Jiangsu SOHO HoldingsGroup Co. Ltd كومپانياسىنىڭ پرەزيدەنتى كومانيانىڭ دامۋ جولى تۋرالى ايتىپ بەردى. سونداي-اق بىرلەسكەن جوبانى جۇزەگە اسىرۋ اياسىندا ىنتىماقتاستىقتى كەڭەيتۋ پەرسپەكتيۆالارىن بەلگىلەدى. تسزيانسۋ پروۆينتسياسىنداعى ەڭ ءىرى كاسىپورىن «بەلدەۋ جانە جول» باستاماسىنا قىزمەت ەتەدى.
كومپانيا التى باعىت بويىنشا دامىپ كەلەدى. ولاردىڭ ءبىرى ءوندىرىس پەن جەتكىزۋ تىزبەگىنىڭ قاۋىپسىزدىگىن قامتاماسىز ەتەدى, سونداي-اق اۋقىمدى ساۋدا الاڭىن قۇرۋدا تاجىريبەسى مول. حالىقارالىق توپتىڭ باسىم باعىتتارىنىڭ قاتارىندا ساۋدا لوگيستيكاسىن دامىتۋدى كوزدەپ وتىر.
نانكيندەگى وتاندىق پاۆيلونمەن قاتار قازاقستاندا دا وسىنداي كوپفۋنكتسيونالدى ورتالىق قۇرۋ جوسپارلانىپ جاتىر. كەشەندى الاڭ قىتايلىق جانە وتاندىق تاۋارلاردىڭ ۆيتريناسىنىڭ ءرولىن اتقارىپ قانا قويمايدى, سونىمەن قاتار مۇندا بيزنەس وكىلدەرى حالىقارالىق سەرىكتەستەرمەن كەلىسىم-شارتقا وتىرا الادى, ىسكەرلىك كەلىسسوزدەر جۇرگىزەدى, قارجىلىق جانە كەڭەس بەرۋ قىزمەتتەرىن الا الادى, ساۋدا وپەراتسيالارىن راسىمدەۋگە مۇمكىن بولادى.
ءىرى ساۋدا ورتالىقتارىن قۇرۋ قىتاي-ەۋروپا باعىتى بويىنشا باتىس باعىتتا قويما ينفراقۇرىلىمىن سالۋمەن قاتار جۇرەدى. «QazTrade» اق باس ديرەكتورى جەڭىس وسەرباي قىتايلىق سەرىكتەستەرگە قازاقستاندا شەتەلدىك قويمالار سالۋ ءۇشىن «قورعاستىڭ» مۇمكىندىكتەرىن پايدالانۋدى ۇسىندى.
ء«بىز SOHO HoldingsGroup-تىڭ ايماقتارداعى قۇرىلىس جوسپارلارىن, اسىرەسە قازاقستانداعى باستاماسىن قولدايمىز. وسى جەرگە ۇشپاس بۇرىن ءبىز قورعاستا بولىپ, ەكى ارنايى ەكونوميكالىق ايماقتىڭ اكىمشىلىگىمەن كەلىسكەن بولاتىنبىز. لوگيستيكالىق قويمالاردى دامىتۋ ءۇشىن قاجەتتى اۋماق بار. ءبىز ۇلكەن الەۋەت پەن مۇمكىندىكتەردى كورىپ وتىرعاندىقتان, جوبانى جۇزەگە اسىرۋعا بار كۇش-جىگەرىمىزدى سالامىز», دەدى QazTrade باسشىسى.
سونداي-اق ول نانكين قالاسىندا اشىلاتىن وتاندىق پاۆيلوندى تولتىرۋ ءۇشىن جۇرگىزىلىپ جاتقان جۇمىستار جايىندا, ورتالىق ازيا ەلدەرىنىڭ سەرىكتەستەرىنىڭ تسزيانسۋداعى كوپفۋنكتسيونالدى ورتالىقتى دامىتۋعا قاتىسۋعا قىزىعۋشىلىقتارى تۋرالى باياندادى.
ايتا كەتۋ كەرەك, قازاقستان بيزنەسكە جان-جاقتى قىزمەت كورسەتۋ الاڭىنا اينالاتىن جانە ساۋدا-ەكونوميكالىق بايلانىستاردى كەڭەيتۋگە سەرپىن بەرەتىن, ورتالىق ازيا ەلدەرى اراسىنداعى مادەني الماسۋدى كۇشەيتەتىن «ورتالىق ازيا – تسزيانسۋ» كەشەندى الاڭىنىڭ جۇمىسىن ۇيلەستىرەتىن بولادى.