جاقىن ارادا استانادا تۇرىكمەنستان مادەنيەتى كۇنىن, تۇرىكمەنستاندا قازاقستان مادەنيەتى كۇنىن وتكىزۋ جوسپارلانىپ وتىر. بۇل تۋرالى پرەمەر-ءمينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋ ارىپتەسى راشيد مەرەدوۆپەن جۇرگىزگەن كەلىسسوزدەر قورىتىندىسى بويىنشا مالىمدەدى, دەپ حابارلايدى Egemen.kz
— مادەني-گۋمانيتارلىق ىنتىماقتاستىق ءداستۇرلى تۇردە بىرقاتار باسىم باعىتتاردى تولتىرادى. وسى مۇمكىندىكتى پايدالانىپ, تۇركىمەن دەلەگاتسياسىن الەمگە ايگىلى اقىن ماقتىمق ۇلى فراگيدىڭ 300 جىلدىق مەرەيتويىمەن قۇتتىقتايمىن. بۇل تاريحي تۇلعانىڭ ادەبي مۇراسى تۇركى مادەنيەتىنىڭ ورتاق رۋحاني قازىناسى مەن ءداستۇرىن ساقتاپ قالعان تۇركىمەن حالقىنىڭ دانالىعى مەن قايتالانباس دۇنيەتانىمىن كورسەتەدى. ەلوردامىزدا ۇلى اقىن ەسكەرتكىشىنىڭ سالتاناتتى اشىلۋىن اسىعا كۇتەمىز», دەدى مۇرات نۇرتىلەۋ.
سىرتقى ىستەر مينيسترلىگىنىڭ باسشىسى ەكى مەملەكەت باسشىلارىنىڭ باستامالارى اياسىندا استانادا تۇرىكمەنستان مادەنيەتى كۇنىن جانە قازاقستان مادەنيەتى كۇنىن تۇرىكمەنستاندا وتكىزۋدى جوسپارلانىپ وتىرعانىن ايتتى.
— بيىلعى كۇزدە تۇرىكمەنستاندا مادەنيەت كۇندەرىن وتكىزۋگە دايىنبىز. اشحاباد قالاسىندا كۇيشى قۇرمانعازى مەن دانىشپان, ويشىل ابايدىڭ ەسكەرتكىشتەرىن ورناتۋ تۋرالى باستاما كوتەرگەن تۇرىكمەن تاراپىنا ۇلكەن العىسىمدى بىلدىرەمىن. تۇرىكمەنستاننىڭ اناۋ قالاسى بيىل تۇركى الەمىنىڭ مادەني استاناسى اتاندى. ءبىز ءبىلىم جانە عىلىم سالاسىنداعى بايلانىستاردى كەڭەيتۋ ماقساتىندا جوعارى وقۋ ورىندارىنىڭ ءوزارا ارەكەتتەسۋىنە كومەك كورسەتۋگە كەلىسىم ءبىلدىردى. قازاقستانداعى 28 جوعارى وقۋ ورنىندا ءبىلىم الىپ جاتقان 2600-دەن استام تۇرىكمەنستاندىق ستۋدەنتتەر ەكى ەلدىڭ جاقىنداسۋىنا ۇلەس قوسۋدا, - دەپ قوستى مۇرات نۇرتىلەۋ.