«دارا» پرەزيدەنتتىك باستامالارى قورى «Karga Seven Pictures» كومپانياسىمەن بىرلەسە وتىرىپ, شىڭعىس حاننىڭ ۇلكەن ۇلى جوشى حاننىڭ ومىرىنە ارنالعان التى بولىمنەن تۇراتىن اعىلشىن تىلىندەگى گيبريدتى دەرەكتى درامانى ءتۇسىرۋدى باستادى, دەپ حابارلايدى Egemen.kz «Dara» پرەزيدەنتتىك باستامالار قورىنىڭ ءباسپاسوز قىزمەتىنە سىلتەمە جاساپ.
سەريال جوشى حاننىڭ ءومىر تاريحى پريزماسى ارقىلى التىن وردا يمپەرياسىنىڭ دامۋ كەزەڭدەرىن كورسەتەدى.
دەرەكتى-درامالىق تەلەحيكايانىڭ پروديۋسەرى كرەاتيۆتى ديرەكتورى ەمرە شاحين جەتەكشىلىك ەتەتىن «Karga Seven Pictures» كومپانياسى. ءتۇسىرىلىم 2024 جىلدىڭ كۇزىندە قازاقستان مەن تۇركيادا باستالادى دەپ جوسپارلانىپ وتىر.
«جوشى حاننىڭ ءومىر تاريحى كەرەمەت ەپيكالىق, ول دۇنيە جۇزىندەگى كورەرمەندەردى قىزىقتىرارى ءسوزسىز. وسى اۋقىمدى تاريحي جوبانى جۇزەگە اسىرۋدا «Dara» قورىمەن بىرلەسىپ, جۇمىس ىستەۋ ءبىز ءۇشىن ۇلكەن مارتەبە», دەيدى «Karga Seven Pictures» كرەاتيۆتى ديرەكتورى ەمرە شاحين.
ەسكە سالا كەتەيىك, بيىل جوشى ۇلىسىنىڭ قۇرىلعانىنا 800 جىل تولادى.
«وسى اتاۋلى كۇنگە ارنالعان تاريحي دەرەكتى جوبا مەملەكەتتىگىمىزدىڭ سان عاسىرلىق تامىرىن كورسەتەدى. جاپپاي اۋديتورياعا ارنالعان دەرەكتى-دراما ۇلتتىق تاريحتى كەڭىنەن ناسيحاتتاۋعا, قازاق حالقىنىڭ ۇلى تاريحىن تانۋعا, حالىقارالىق اۋديتوريانىڭ قازاقستانعا دەگەن قىزىعۋشىلىعىن ارتتىرۋعا سەپتىگىن تيگىزەدى», دەپ اتاپ ءوتتى «Dara» پرەزيدەنتتىك باستامالار قورىنىڭ ءباسپاسوز قىزمەتى.
قىرمىزى جۇماعاليقىزى,
ەۇۋ ستۋدەنتى