ەلوردادا «تازا قازاقستان: استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسياسى جالعاسىپ جاتىر. ەكولوگيالىق ءىس-شارا اياسىندا «ەسىرتكىسىز قالا» جوباسى ۇيىمداستىرىلدى. يگىلىكتى ىسكە ۇكىمەتتىك ەمەس جانە جاستار ۇيىمدارىنىڭ وكىلدەرى, مەملەكەتتىك, قۇقىق قورعاۋ ورگاندارىنىڭ قىزمەتكەرلەرى قاتىستى.
وكىنىشكە قاراي, قازاقستان بۇگىندە ەسىرتكى قابىلداۋ جاعىنان الەمنىڭ الدىڭعى 10 ەلىنىڭ قاتارىنا كىرەدى. رەسمي ستاتيستيكا بويىنشا, ەلىمىزدە 18 200 ەسىرتكىگە تاۋەلدى ازامات بار. ونىڭ 1 500-ءى ايەل بولسا, 66-سى كامەلەت جاسىنا تولماعان بالا. ءىىم-ءنىڭ مالىمەتىنشە, قازىر ەسىرتكى الەمىنىڭ «ساۋداگەرلەرى» بۇل جات قىلىققا 13 پەن 15 جاس ارالىعىنداعى بالالاردى ءجيى تارتادى ەكەن. سوندىقتان قوعام جاناشىرلارى ناشاقورلىققا قارسى ەكولوگيالىق اكتسيالاردى ءجيى وتكىزىپ ءجۇر.
– ەلوردامىزدا «تازا قازاقستان» اۋقىمدى ەكواكتسياسى ءوتىپ جاتىر. ءىس-شارا اياسىندا ەكومادەنيەتتى قالىپتاستىرۋعا باعىتتالعان سەنبىلىكتەر, اكتسيالار سەكىلدى ءتۇرلى باستامالار ۇيىمداستىرىلادى. سول سياقتى «ەسىرتكىسىز قالا» جوباسى بارىسىندا سينتەتيكالىق ەسىرتكىلەر جارنامالانعان سايتتار كورسەتىلگەن تۇستاردى ءوشىرىپ جاتىرمىز. بۇل جوبانىڭ نەگىزگى ماقساتى – ناشاقورلىقتىڭ الدىن الۋ, جاستار اراسىندا ەسىرتكى ىندەتىنە قارسى ۇستانىمدى قالىپتاستىرۋ, – دەدى «جاستار جانە بالالار ۇيىمدارى وداعى» ۇكىمەتتىك ەمەس ۇيىمىنىڭ وكىلى جومارت ابىشەۆ.
ءوز كەزەگىندە پوليتسيا دەپار-تامەنتىنىڭ ەسىرتكىمەن كۇرەس باسقارماسىنىڭ باسشىسى سەرگەي يلينىح ەسىرتكى ءۇشىن قىلمىستىق كودەكستە قاتاڭ جازا بەلگىلەنگەنىن ايتىپ, جاستاردى قۇلاعدار ەتتى. اكتسيا ەسىرتكىگە قارسى كۇرەستەگى الدىن الۋ شارالارىن ءتۇسىندىرۋ جونىندەگى الەۋمەتتىك جوبا اياسىندا استانا قالاسى ىشكى ساياسات باسقارماسىنىڭ باستاماسىمەن ىسكە اسىرىلعان.
– ارينە, ەسىرتكى ساۋداسىمەن اينالىساتىندار تەك ءبىر قالانىڭ توڭىرەگىندە شوعىرلانىپ قالمايتىنى بەلگىلى. ءارى ولار تەك قابىرعالارعا جازۋدان بولەك, نەشە ءتۇرلى ادىسپەن ايلاسىن جۇزەگە اسىرىپ وتىر. سوندىقتان ناشاقورلىققا قارسى كۇرەستىڭ قانداي ءتۇرى بولماسىن قالا تۇرعىندارى, جاستارى قولداۋعا ءتيىس. بارىنشا الەۋمەتتىك جەلىلەردە ءبولىسىپ, عاسىر دەرتىنە اينالعان ەسىرتكىنى تۇتىنۋدان, ساۋداسىنان اۋلاق بولۋعا ۇگىتتەۋىمىز قاجەت. ويتكەنى جاستار – ەندىگى ەل تۇتقاسىن ۇستار ازاماتتار, – دەدى بەلسەندى ءاليا بەكنازارقىزى.
سونداي-اق «تازا قازاقستان: استانا – تازالىق پەن ءتارتىپتىڭ ۇلگىسى» جوباسىن ءبىلىم بەرۋ ۇيىمدارىنىڭ وقۋشىلارى قولداپ, «ۆەيپسىز جاستار» دەنساۋلىق شەرۋىن وتكىزدى. ءمان-ماڭىزى ەرەكشە باستاماعا 97 استانالىق ءبىلىم بەرۋ ۇيىمى قاتىستى.
– جوبا وقۋشىلاردى سالاماتتى ءومىر سالتىنا ىنتالاندىرۋ, دەنەشىنىقتىرۋ مەن سپورتتى ناسيحاتتاۋ ماقساتىندا 21 جاسقا دەيىنگى جاستار اراسىندا ۆەيپتەردى قولدانۋمەن كۇرەسكە باعىتتالعان. مۇنداي ءىس-شارالار اپتا سايىن وتكىزىلەدى. سونىمەن قاتار قالادا مەكتەپتىڭ ءوزىن-ءوزى باسقارۋى, «مەنىڭ باۋىرىم» ەرىكتىلەر قوزعالىسى, سپورتتىق ەستافەتالار, ەكوفەستتەر ۇيىمداستىرىلادى. تاياۋدا قالانىڭ جىلىجايلارىندا دا ءىس-شارالار وتكىزەمىز. مۇنىڭ ءبارى جاستاردىڭ بويىندا مىنەز-ق ۇلىق مادەنيەتىن تاربيەلەۋگە جانە ولارعا دۇرىس ادەتتەردى, بورىش پەن جاۋاپكەرشىلىك سەزىمىن وياتۋعا ىقپال ەتەدى, – دەدى استانا قالاسى قوسىمشا ءبىلىم بەرۋ جانە تاربيە جۇمىسى ءبولىمىنىڭ باسشىسى گۇلفارا سارامبەتوۆا.
وعان قوسا 23 مىڭنان استام ادام «دەنى ساۋ «مەن» – دەنى ساۋ ەل!» فلەش-جاتتىعۋىنا قاتىسىپ, سالاماتتى ءومىر سالتى مەن جەر شارىنداعى تازالىققا وتاندىق جاۋاپكەرشىلىكپەن قاراۋدىڭ ماڭىزدىلىعىن اتاپ ءوتتى.