سۋ رەسۋرستارى جانە يرريگاتسيا مينيسترلىگى اباي وبلىسىندا جاڭادان 5 سۋ قويماسىن سالۋدى جوسپارلاپ وتىر. بۇل تۋرالى وبلىس تۇرعىندارىمەن كەزدەسۋدە مينيستر نۇرجان نۇرجىگىتوۆ مالىمدەدى. جاڭا سۋ قويمالارى ءوڭىر قاجەتتىلىگى ءۇشىن 156 ملن تەكشە مەتردەن استام سۋ جيناي الادى, دەپ حابارلايدى Egemen.kz اتالعان ۆەدومستۆو ءباسپاسوز قىزمەتىنە سىلتەمە جاساپ.
اتاپ ايتقاندا, ءۇرجار اۋدانىندا كەلدىمۇرات (30 ملن.م3) جانە كوكتەرەك وزەندەرىندە (31,4 ملن.م3) سۋ قويمالارى بوي كوتەرەدى. ال كوكپەكتى اۋدانىنداعى كىشى بوكەن وزەنىندە (30 ملن.م3) جانە اقسۋات اۋدانىندا قارعىبا (20 ملن.م3) مەن بازار (45 ملن.م3) وزەندەرىندە جاڭا سۋ قويمالارى سالىنادى. قۇرىلىس جۇمىستارى 2024-2030 جىلدارى ىسكە اسىرىلۋى ءتيىس.
بۇگىنگى تاڭدا قارعىبا سۋ قويماسىنىڭ تەحنيكالىق-ەكونوميكالىق نەگىزدەمەسى دايىن. قالعان 4 جوبا بويىنشا مينيسترلىككە قاراستى سۋ شارۋاشىلىعى كوميتەتى ينۆەستيتسيالىق ۇسىنىس ازىرلەپ جاتىر.
«جاڭا سۋ قويمالارىنىڭ قۇرىلىسى حالىقتىڭ ءومىر ساپاسىن جاقسارتىپ, ءوڭىردىڭ ەكونوميكالىق دامۋىنا ەلەۋلى ۇلەس قوسادى جانە جەرگىلىكتى شارۋالاردى تۇراقتى سۋمەن قامتاماسىز ەتۋگە ءتيىمدى ىقپال ەتەدى. وسىعان دەيىن مينيسترلىك قازاقستان رەسپۋبليكاسىنىڭ سۋ سالاسىن دامىتۋدىڭ 2028 جىلعا دەيىنگى كەشەندى جوسپارىن ازىرلەدى. اتالعان جۇمىستار وسى قۇجات شەڭبەرىندە جۇرگىزىلەدى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.