اقتوبە قالالىق №2 سوتىندا «سافينا» قۇرىلىس كومپانياسىنىڭ ەكى باسشىسىنا قاتىستى قىلمىستىق ءىس قارالىپ جاتىر. وسى كومپانيانىڭ ديرەكتورى جاراسحانوۆ پەن ۇلەسكەرلىك قۇرىلىس ينۆەستورى كاريموۆ قىلمىستىق كودەكستىڭ الاياقتىق جانە ءىرى كولەمدەگى بوتەننىڭ مۇلكىن يەلەنۋ بابىمەن ايىپتالىپ وتىر.
ولار 2020 جىلدان بەرى 507 ۇلەسكەردەن اقشا جيناپ, اقتوبە قالاسىنىڭ №12 جانە «باتىس-2» شاعىن اۋداندارىندا كوپقاباتتى بەس ءۇي سالۋعا ۋادە ەتكەن. تۇرعىندار ۇيلەرىنە بىلتىر كىرۋ كەرەك ەدى. الايدا جۇرت قارجى سالعان ۇيلەردىڭ كوبىنىڭ ىرگەتاسى عانا قۇيىلسا, كەيبىرىنىڭ قابىرعالارى جارتىلاي بىتكەن. سوتتا جاراسحانوۆ پەن كاريموۆ جۇرتقا 2,5 ملرد تەڭگە زيان كەلتىرگەنى بەلگىلى بولدى.
پروكۋروردىڭ ايىپتاۋ پاراعىندا, «بوگدە ادامنىڭ مۇلكىن الداۋ جولىمەن يەلەنۋ ماقساتىندا جاراسحانوۆ 2022 جىلدىڭ تامىزىنان 2023 جىلدىڭ ماۋسىمىنا دەيىن ءوزى باسقاراتىن تۇرعىن ءۇي قۇرىلىسىنا قارجى سالۋعا ۇگىتتەگەن» دەپ جازىلعان. بۇل جەردەگى الاياقتىقتىڭ شەگى دە كورىنبەيدى. تۇرعىن ءۇي قۇرىلىسى ءجۇرىپ جاتقان جەر ۋچاسكەسى دە باسقا ادامنىڭ مەنشىگىندە بولىپ شىقتى.
وسىدان ءتورت جىل بۇرىن اقتوبە قالاسىنىڭ تۇرعىنى ءمارزيا ەسەناليەۆا «سافينا» قۇرىلىس كومپانياسىنا ءۇش بولمەلى پاتەر الۋ ءۇشىن 9 ملن 200 مىڭ تەڭگە قارجى سالعان. ەگدە جاستاعى كىسى كومپانيا ۇزاق جىلدان بەرى قۇرىلىس سالاسىندا جۇمىس ىستەپ كەلە جاتقان سوڭ سەنگەنىن ايتادى. سودان بەرى نە اقشا, نە پاتەر جوق. تاعى ءبىر ۇلەسكەر عاليا قابدىراحمانوۆا ايىپتالۋشى جاراسحانوۆتىڭ سوتقا دەيىن ءتۇرلى ايلا-ارەكەتتەرگە بارىپ, قورعاۋشىلارىن ءجيى اۋىستىرىپ, ىسپەن تانىسۋدى سوزىپ كەلگەنىن ايتتى. «قۇرىلىس باستالدى دا, كوپ كەشىكپەي توقتادى. ءبىز دابىل قاعا باستادىق. باسىندا جاراسحانوۆ كەزدەسۋدەن قاشىپ ءجۇردى. سودان پروكۋراتۋراعا شاعىمداندىق. وتباسىم – 2020 جىلى ەڭ ءبىرىنشى بولىپ ءۇيدىڭ تولىق قۇنىن تولەگەندەردىڭ ءبىرى. كومپانيا ديرەكتورىمەن كەلىسىمشارت جاساستىق. سول ۋاقىتتا ءار ۇلەسكەر كەم دەگەندە 9 ميلليون تەڭگەدەن استام قارجى قۇيدى. بۇل ءۇش بولمەلى پاتەردىڭ باعاسى ەدى. ەندىگى ءۇمىتىمىز – جەرگىلىكتى بيلىك قۇرىلىستى سوت وسى قىلمىستىق ىسكە قاتىستى شەشىم شىعارعان سوڭ بيۋدجەت ەسەبىنەن اياقتايمىز دەپ ۋادە بەرىپ وتىر. الايدا جۇرت كۇتۋدەن شارشادى. تۇرىپ جاتقان ۇيلەرىن ساتىپ, بارلىق قارجىسىن «سافينا» تۇرعىن ءۇي كەشەنىنە سالعان وتباسىلار ءتورت جىلدان بەرى بالا-شاعاسىمەن پاتەر جالداپ ءجۇر», دەيدى عاليا قابدىراحمانوۆا.
سوت «سافينا» كومپانياسى باسشىلارىنا قاتىستى شەشىم شىعارسا, ۇلەسكەرلەردىڭ ۇيلەرى جەرگىلىكتى بيۋدجەت قارجىسى ەسەبىنەن تۇرعىزىلماقشى. وسى ماقساتتا قالالىق اكىمشىلىك جانىنان قۇرىلىس كومپانياسى قۇرىلدى. جەرگىلىكتى بيلىك ۇلەسكەرلەرگە جۇمسالعان بيۋدجەت قارجىسىنىڭ ورنىن بوس پاتەرلەردى ساتۋ جولىمەن تولتىرۋدى جوسپارلاپ وتىر.
اقتوبە وبلىسى