وبلىس اكىمدىگى ىشكى ساياسات باسقارماسىنىڭ الەۋمەتتىك مەملەكەتتىك تاپسىرىسى اياسىندا تاراز قالاسىندا «سىبايلاس جەمقورلىققا قارسى كومپلاەنس مەكتەبى» اتتى سەمينار ءوتتى. ءىس-شاراعا سىبايلاس جەمقورلىققا قارسى ءىس-قيمىل اگەنتتىگى وبلىس بويىنشا دەپارتامەنتى باسشىسى ءبىرىنشى ورىنباسارىنىڭ مىندەتىن اتقارۋشى قايرات بايگەباەۆ, وبلىس اكىمى اپپاراتى باسشىسىنىڭ ورىنباسارى ەربولات بايبولات قاتىسىپ, باسقوسۋدىڭ ماڭىزدىلىعىنا توقتالدى.
– «سىبايلاس جەمقورلىققا قارسى ءىس-قيمىل تۋرالى» زاڭداعى سوڭعى وزگەرىستەرمەن كۆازيمەملەكەتتىك جانە جەكە سەكتور ۇيىمدارىندا كورپوراتيۆتىك پاراساتتىلىق ستاندارتتارىن ساقتاۋعا جاۋاپتى سىبايلاس جەمقورلىققا قارسى كومپلاەنس-قىزمەتتەر ينستيتۋتى ەنگىزىلدى. جەمقورلىققا قارسى كومپلاەنس-قىزمەتتى قۇرۋ ءۇشىن ماڭىزدى دالەل – سىبايلاس جەمقورلىق سۋبەكتىلەرى. وسى كۆازيمەملەكەتتىك سەكتور لاۋازىمدى ادامداردىڭ اياسىن كەڭەيتۋدى كوزدەيدى, – دەدى قايرات بايگەباەۆ.
سەميناردا رەسپۋبليكالىق دەڭگەيدەگى ساراپشىلار ءوز تاجىريبەسىمەن ءبولىستى. سىبايلاس جەمقورلىققا قارسى ءىس-قيمىل اگەنتتىگى پرەۆەنتسيا قىزمەتىنىڭ ساراپشىسى اسان ايدارحانوۆ كومپلاەنس باعدارلاماسىن قۇرۋدىڭ ءادىس-تاسىلدەرى جونىندە بايانداما جاساسا, ەنەرگەتيكا ءمينيسترىنىڭ كومپلاەنس جونىندەگى كەڭەسشىسى, كومپلاەنس جانە ىسكەرلىك ەتيكا قاۋىمداستىعىنىڭ توراعاسى داۋرەن اقشالوۆ پەن «فريدومتەلەكوم» اق كومپلاەنس وفيتسەرى داۋرەن تۋلين مەكەمەدەگى كومپلاەنس تاۋەكەلدەرىن باسقارۋ تەتىكتەرىنە توقتالىپ ءوتتى.
پرەزيدەنت جانىنداعى مەملەكەتتىك باسقارۋ اكادەمياسىنىڭ وبلىس بويىنشا فيليالىنىڭ پروفەسسورى بەكماحان احمەتوۆ كومپلاەنس قىزمەتىنىڭ ساياساتىن ەگجەي-تەگجەي تۇسىندىرسە, وبلىس بويىنشا ىشكى مەملەكەتتىك اۋديت دەپارتامەنتىنىڭ باس مامانى باۋىرجان كاباشەۆ مەملەكەتتىك ساتىپ الۋ ۇدەرىسىندە سىبايلاس جەمقورلىق تاۋەكەلدەرىن انىقتاۋ جولدارىنا توقتالىپ ءوتتى.
تاراز قالاسى مەن اۋدانداردان قاتىسقان 80-گە جۋىق قاتىسۋشىعا ادىستەمەلىك باعىت-باعدار بەرىلىپ, ءىس-شارا ناتيجەسى بويىنشا ارنايى سەرتيفيكاتتار تابىستالدى.