قورعانىس مينيسترلىگى سپورت كوميتەتى – ورتالىق سپورت كلۋبى بازاسىندا كەڭەس وداعىنىڭ باتىرى, №1 حالىق قاھارمانى قازاقستاننىڭ تۇڭعىش قورعانىس ءمينيسترى ارميا گەنەرالى ساعادات نۇرماعامبەتوۆتى ەسكە الۋعا ارنالعان بوكستان حالىقارالىق ءتۋرنيردىڭ سالتاناتتى اشىلۋى ءوتتى. ءىس-شارا باستالماس بۇرىن ۇيىمداستىرۋشىلار, سپورتشىلار, كۋرسانتتار قۇرلىق اسكەرلەرى اسكەري ينستيتۋتىنداعى داڭقتى باتىردىڭ ەسكەرتكىشىنە گۇل شوقتارىن قويدى, دەپ حابارلايدى Egemen.kz اتالعان مينيسترلىكتىڭ مالىمەتىنە سىلتەمە جاساپ.
سالتاناتتى اشىلۋىندا قورعانىس مينيسترلىگى سپورت كوميتەتىنىڭ توراعاسى – ورتالىق سپورت كلۋبىنىڭ باستىعى پولكوۆنيك ارمان ابەۋوۆ: «اتاقتى باتىردىڭ قۇرمەتىنە ارنالعان ءداستۇرلى تۋرنير بيىل 27-ءشى رەت وتكىزىلىپ وتىر. ساعادات قوجاحمەت ۇلى ەلىمىزدىڭ قارۋلى كۇشتەرىنىڭ باستاۋىندا تۇرعان تۇلعا. ول ءوز ءومىرىن تۋعان وتانىنا قىزمەت ەتۋگە ارنادى. ءبىز ءۇشىن ول قاھارماندىقتىڭ, جانقيارلىق پەن اسكەري بورىشقا ادالدىقتىڭ ۇلگىسى», دەپ اتاپ ءوتتى.
اكەسىنىڭ قۇرمەتى مەن اعا بۋىننىڭ ەرلىگىن ۇلىقتاۋ ءۇشىن جاسالىپ جاتقان ءىس-شارالارعا باتىردىڭ قىزى ايسۇلۋ نۇرماعامبەتوۆا وتباسىنىڭ اتىنان ريزاشىلىعىن ءبىلدىردى.
«بۇل كۇندەرى ءوتىپ جاتقان ءىس-شارالاردىڭ ءبارىن مايداندا قان توككەن ارداگەرلەر مەن جەڭىستى جاقىنداتۋ جولىندا تىلدا تەر توككەن جانداردىڭ بارلىعىنا قۇرمەت دەپ بىلەمىن. اكەم ءوز ەلىنىڭ ناعىز پاتريوتى بولدى. ول ءۇشىن وتانعا پايداسىن تيگىزۋ ۇلكەن باقىت بولاتىن», دەدى ايسۇلۋ ساعاداتقىزى.
قازاقستان, ارمەنيا, ازەربايجان, قىرعىزستان, تاجىكستان, تۇركىمەنستان, وزبەكستان ەلدەرىنەن بارلىعى 21 كوماندا قۇرامىنداعى 150-دەي بوكسشى جۇدىرىقتاساتىن بايراقتى باسەكە ءتورت كۇنگە سوزىلىپ, 25 مامىردا اياقتالادى.