ۆيتسە-پرەمەر قانات بوزىمباەۆ, «Astana Group» نەگىزىن قالاۋشىسى جانە توراعاسى نۇرلان سماعۇلوۆ, «بانك تسەنتركرەديت» ديرەكتورلار كەڭەسىنىڭ توراعاسى باقىتبەك بايسەيىتوۆ, «Jusan Bank» ديرەكتورلار كەڭەسىنىڭ توراعاسى جانە اكتسيونەرى عالىمجان ەسەنوۆ, «قازازوت» ديرەكتورلار كەڭەسىنىڭ مۇشەسى رۇستەم ايازباەۆ, «Qazaq Stroy» قۇرىلتايشىسى نۇرلان ارتىقباەۆ, «Alageum Electric» ديرەكتورلار كەڭەسىنىڭ توراعاسى ەركەبۇلان ءىلياسوۆ باتىس قازاقستان وبلىسىندا بولدى.
ولار ورال قالاسىنىڭ سۋ باسقان ساياجاي ماسسيۆتەرىن ارالاپ, سۋ تاسقىنىنان زارداپ شەككەندەرگە ارنالعان ۇيلەر سالىنىپ جاتقان تەرەكتى اۋدانىنىڭ پودستەپنوە اۋلىنا باردى, سونداي-اق ەۆاكۋاتسيالىق پۋنكتتەگى جەرگىلىكتى تۇرعىندارمەن كەزدەستى.
وڭىردەگى سۋ تاسقىنى جاعدايى ايتارلىقتاي تۇراقتاندى. 8,5 مىڭنان استام ادام ۇيىنە ورالدى. كوميسسيا ۇيلەردى تەكسەرۋدى جانە زالالدى باعالاۋدى جالعاستىرىپ كەلەدى. الدىن الا مالىمەتتەر بويىنشا 466 جتق جانە جالعىز تۇرعىن ءۇي بولىپ تابىلاتىن 2,5 مىڭنان اسا ساياجاي ءۇيى جوندەۋگە جاتپايدى.
قانات بوزىمباەۆ ۇيلەر مەن ساياجايلاردى باعالاۋ مەن تەحنيكالىق تەكسەرۋدى ايدىڭ سوڭىنا دەيىن اياقتاۋدى تاپسىردى.
سىرىم, قاراتوبە, تەرەكتى, ءبورلى جانە بايتەرەك اۋداندارىندا 357 ءۇيدىڭ قۇرىلىسى باستالدى. اكىمدىك مەردىگەرلىك ۇيىمداردى انىقتادى. ۇيلەر تامىز ايىنىڭ سوڭىنا دەيىن اياقتالادى دەپ جوسپارلانىپ وتىر. سىرىم اۋدانىندا جالپى سوماسى 3,2 ملرد تەڭگەگە 114 ءۇيدىڭ قۇرىلىسىن «قازاقستان حالقىنا» قورى قارجىلاندىرادى. 75 ءۇيدى جەرگىلىكتى جەر قويناۋىن پايدالانۋشى كومپانيالار سالادى: «جايىقمۇناي», «كوندەنسات» جانە «اقسايگازسەرۆيس». تاعى 71 تۇرعىن ءۇيدى «قاراشىعاناق پەترولەۋم وپەرەيتينگ» كومپانياسى «اقجايىق» قورى ارقىلى سالادى.
جالعىز باسپاناسىنان ايىرىلعان ساياجاي تۇرعىندارىنىڭ ماسەلەسىنە ەرەكشە نازار اۋدارىلدى.
«قالا اكىمدىگىنە جاز بىتكەنشە ساياجاي تۇرعىندارىنا ارناپ تۇرعىن ءۇي سالۋ نەمەسە ساتىپ الۋ تاپسىرىلدى. ايتا كەتەيىك, بۇرىنعى جەردە ۇيلەر سالىنبايدى. ويپاتتى جەرلەردە جتق سالۋعا تىيىم سالىنادى», دەدى باتىس قازاقستان وبلىسىنىڭ اكىمى ن.تورەعاليەۆ.
قانات بوزىمباەۆ جۇرگىزىلىپ جاتقان جۇمىستاردى جەدەلدەتۋدى تاپسىردى.
«وڭىرگە كورسەتىلەتىن كومەكتى ەسكەرە وتىرىپ, زارداپ شەككەن ءاربىر وتباسىن قولداۋ شارالارىمەن دەرەۋ جانە ارتىق اۋرە-سارساڭسىز قامتىپ, بارلىق ءتيىستى تولەمدەردى جۇزەگە اسىرىپ, تۇرعىن ءۇي قۇرىلىسىن باستاۋعا كىرىسۋ قاجەت», دەپ تاپسىردى ق.بوزىمباەۆ وبلىس اكىمدىگىندە وتكەن كەڭەس بارىسىندا.
سونداي-اق كەڭەستە مەملەكەت تاراپىنان قارجىلاي قولداۋ كورسەتۋ ماسەلەسى قارالدى.