وبلىستا ورمان قورى 550 مىڭ گەكتار اۋماق پەن «كوكشەتاۋ» ۇلتتىق تابيعي پاركىنە تيەسىلى 134 مىڭ گەكتار جەردى الىپ جاتىر. بۇل – وبلىس اۋماعىنىڭ 5,5 پايىزى. ورماننىڭ 85 پايىزى – اق قايىڭ, 7 پايىزى – تەرەك, 4 پايىزى – قاراعاي, قالعانى شىرشا, تال سياقتى از ساندى اعاشتار.
ورماندى ورتتەن ساقتاۋ – ماڭىزدى مىندەت. كەيبىر قۋاڭشىلىق جىلدارى ورماننىڭ ورتكە قاۋىپتىلىگى ارتا تۇسەدى. اسىرەسە قۋراعان اعاشتارى تازالانباعان, قالىڭ نۋىنىڭ اراسى اشىلماعان ورمانداردا ءورتتىڭ تۇتانۋىنا سەبەپ كوپ. سوندىرىلمەگەن تەمەكى تۇقىلىنىڭ وزىنەن-اق جەل كوتەرسە قۋراعان قالىڭ اعاش بۇرق ەتە قالارى ءسوزسىز. ال ءورت كۇشىنە ءبىر ءمىنىپ السا, قىزۋى ەشكىمدى جاقىنداتپاي, ورتسوندىرۋشىلەرگە قيىندىق تۋدىرادى. ورمان ءورتى وسىمدىك, ءشوپ-شالام, جابايى جانۋارلار مەن اڭداردىڭ ءبارىن كۇيدىرىپ, ميكروكليماتتى بۇزادى, توپىراقتىڭ قۇنارىن جويادى, اۋانىڭ ەكولوگيالىق جانە حيميالىق كورسەتكىشتەرىن بۇلدىرەدى. سوندىقتان ورمانداردىڭ ورتەنۋىنە جول بەرمەۋ – ورمانشىلاردىڭ, ورتسوندىرگىشتەردىڭ عانا ەمەس, جالپى حالىقتىڭ مىندەتى.
وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى ەرلان ءتاشىموۆتىڭ ايتۋىنا قاراعاندا, ورمانداردىڭ ءورت قاۋىپتىلىگى ماۋسىمى قار كەتكەن ساتتەن باستالىپ, كۇزگى جاڭبىر باستالاتىن ۋاقىتقا دەيىن سوزىلادى. سوندىقتان ورماندى ورتتەن قورعاۋ ءىسى شارۋاشىلىقتاردا قار كەتپەي باستالادى. ورتكە قارسى كۇرەسەتىن ماتەريالدىق-تەحنيكالىق بازا نىعايتىلىپ, جاڭا تەحنيكالار مەن اگرەگاتتار الىنادى. قازىر 12 ورمان شارۋاشىلىعىندا 25 ورتسوندىرگىش ماشينا بار. سونىمەن بىرگە ءورتتىڭ تارالۋىن شەكتەۋ ءۇشىن جەر جىرتۋعا پايدالانىلاتىن 87 تراكتور, پاترۋلدىك اۆتوموبيل, 38 سۋ ساقتايتىن سىيىمدىلىق, جەدەل حابار جەتكىزەتىن 810 راديوستانسا بار.
ء«ورت قاۋىپسىزدىگى ماسەلەسىنە وتە ساق قارايمىز. بارلىق شارۋاشىلىق پەن ورماندى پايدالانۋشىلاردىڭ ءورتتىڭ تارالۋىنا جول بەرمەيتىن مينەرالدى جولاقتاردى جۇرگىزۋىن قاتتى قاداعالايمىز. ورتكە قارسى كۇرەستە جاڭادان شىققان تەحنولوگيالاردى ەنگىزۋدى دە ۇنەمى ەسكەرىپ وتىرامىز. قازىر 11 شارۋاشىلىقتا ءورتتى بەينەكورىنىس ارقىلى تابۋ مۇمكىندىگى بار 16 ينتەراكتيۆتىك كەشەن 20-22 مەتر بيىكتىكتەگى مۇنارالارعا ورناتىلعان. سونىمەن بىرگە ورمان قورىن باقىلايتىن 3 درون بار», دەيدى ە.ءتاشىموۆ.
بۇلاردان باسقا بيىل وبلىستىق بيۋدجەتتىڭ ەسەبىنەن ورمان شارۋاشىلىقتارىنا 300 ملن تەڭگەگە 2 ورتسوندىرگىش ماشينا, 8 دوڭگەلەكتى تراكتور جانە 12 كۆادروركوپ الىنىپ, تاراتىلىپ بەرىلگەن. قازىر شارۋاشىلىقتار ماتەريالدىق-تەحنيكالىق جابدىقتاۋ ءنورماتيۆى بويىنشا 87 پايىزعا قامتىلعان.
وبلىستىق تجد باسشىسىنىڭ ورىنباسارى دميتري ءراستيحيننىڭ ايتۋىنا قاراعاندا, بيىل ءورت قاۋىپتىلىگى ماۋسىمى باستالعاننان بەرى 14 رەت قاۋ ءشوپ پەن قوقىستار جانىپ, ءورت 3,4 گەكتار جەردى قامتىعان. الايدا ورمان ءورتى ءالى بولعان جوق. بىلتىر 6 رەت ورمان ءورتى بولىپ, ول 28,6 گەكتار جەرگە جايىلعان.
بيىل تاسقىننىڭ كۇشتىلىگىنەن كوپتەگەن ورماندا ءالى سۋ تۇر. سوندىقتان ۇتقىر توپتاردىڭ ورمانداردى ارالاپ, رەيدتەر جۇرگىزۋى دە تومەندەپ كەتكەن. بيىل ولاردىڭ سانى 209 رەت بولعان, ال بىلتىردىڭ سايكەس مەرزىمىندە جاسالعان رەيدتەر سانى 247 ەدى. ء«ورتتىڭ جايىلۋى وتە قاۋىپتى جانە تۇرعىنداردى اسىرەسە وسىنداي ءورت الاڭداتادى. كەيىنگى ءۇش جىلدا وڭىرىمىزدە بىرنەشە ۇلكەن ءورت بولىپ, 12 تۇرعىن ءۇي مەن 200-دەي ساياجاي قۇرىلىستارىن جوق قىلدى. اسىرەسە بىلتىر مامىر ايىندا بەرەكە شاعىن اۋدانىندا بولعان ءورتتىڭ قاسىرەتى زور بولدى. بۇل ءورت 9 تۇرعىن ءۇيدى قۇرتىپ, 2 ءۇيدى جارامسىز ەتىپ كەتتى. سوندىقتان ءورت قاۋىپسىزدىگىنە جالپى حالىق بولىپ ساقتىق جاساۋىمىز كەرەك», دەدى د.راستيحين.
سولتۇستىك قازاقستان وبلىسى