يران پرەزيدەنتى يبراحيم رايسي مىنگەن تىكۇشاق قۇلاعان جەردەن ءتىرى قالعان جاندار تابىلماعانى حابارلاندى. بۇل تۋرالى يراننىڭ قىزىل جارتى اي قوعامىنىڭ باسشىسى مالىمدەدى, دەپ حابارلايدى Egemen.kz IRNA اگەنتتىگىنە سىلتەمە جاساپ.
يراننىڭ قىزىل جارتى اي قوعامىنىڭ باسشىسى پير-حوسەين كوليۆاند دۇيسەنبى كۇنى تاڭەرتەڭ «Tasnim» جارتىلاي رەسمي اقپارات اگەنتتىگىنە بەرگەن سۇحباتىندا: «تىكۇشاق اپاتقا ۇشىراعان جەر مۇقيات زەرتتەلدى, ءتىرى قالعاندار تابىلعان جوق», دەدى.
شەتەلدىك اقپارات قۇرالدارىنىڭ جازۋىنشا, تىكۇشاقتا يران پرەزيدەنتى يبراحيم رايسي, سىرتقى ىستەر ءمينيسترى حوسەين ابدوللاحيان, يراننىڭ شىعىس ازەربايجان پروۆينتسياسىنىڭ گۋبەرناتورى ماليك راحمەتي جانە تەبريز پروۆينتسياسىنىڭ اياتوللاسى الي حاشيم بولعان.
ايتا كەتسەك, تىكۇشاق جەكسەنبى, 19 مامىردا يراننىڭ سولتۇستىك-باتىسىنداعى ازەربايجان مەن تۇركيا شەكاراسىنا جاقىن تاۋلى ايماقتا قۇلادى.