تاسقىننىڭ جالعىز قۇربانى

سول كۇندەرى كۇن رايى دا ازداپ جىلى بولعان. اعايىندى ەكى جىگىت قاننەن-قاپەرسىز ءۇيدىڭ توبەسىندە دەم الىپ, جاتا بەرگەن. سول كۇنى 3 مىڭداي ادام كۇندىز-ءتۇنى جۇمىس ىستەپ, ىرگەسىن بەكىتىپ, ءۇستىن بيىكتەتكەن دامبانى تاسقىن سۋ جارىپ كەتىپ, قالاعا اعىلدى. ۇيىنە سۇپ-سۋىق, مۇزدى سۋدىڭ كوتەرىلىپ كەلە جاتقانىنان شوشىپ ويانعان ەكى جىگىتتىڭ ءبىرى جان داۋسى شىعىپ ايعاي سالادى. سول كەزدە رەزەڭكە قايىقپەن جۇرگەن قۇتقارۋشىلار ونى وزدە­رىنە مىنگىزىپ الىپ, اجالدان قۇت­قا­رادى. اعاسىنىڭ دا وسىندا بول­عانىن ايتقانىمەن, ەكىنشىسى تابىلمايدى. ول, بالكي, ويانعان بەتتە سۋعا قۇلاپ, تۇنشىعىپ قال­عان بولۋى كەرەك. قۇتقارىلعان جىگىتتىڭ ايتۋىنا قاراعاندا, ولار سۋ ءالى كەلە قويمايدى دەپ ويلاپ, دەمالىپ الماق بولعان ەكەن. سول كەزدە وسى ماڭداعى سۋدىڭ بيىكتىگى 1,5-2 مەترگە دەيىن كوتەرىلىپ, ءۇيدىڭ شاتىرىنا جەتكەن.

جوعالعان جىگىتتىڭ ءمايىتى تەك 13 مامىر كۇنى, سۋ قايتقان سوڭ عانا تابىلىپ وتىر. پوليتسيا ونىڭ اجالىنا سىرتتان قانداي دا ءبىر كۇشتىڭ اسەر ەتپەگەنىن ايتادى. دەگەنمەن ءمايىت قازىر سوت-مەديتسينالىق ساراپتاماعا جىبەرىلگەن. 

قازىر قالانىڭ كاسىپورىن-مەكەمەلەرىنىڭ ءبارى سەنبىلىكتەر وتكىزىپ, سۋدان قۇرعاعان شاعىن اۋداندارداعى قالىڭ قوقىستاردى تازالاپ جاتىر. مۇندا سۋ بۇزعان شاعىن ۇيلەرمەن قاتار تاسقىن اعىزىپ اكەلگەن نەشە ءتۇرلى قوقىس­تار شىعىپ جاتىر. ويقالا شاعىن اۋدانىندا پد اكىمشىلىك پوليتسيا باسقارماسىنىڭ قىزمەت­كەر­لەرى دەمالىس كۇنى جالعىز تۇرا­تىن زەينەتكەردىڭ ۋچاسكەسىندە شاعىن سەنبىلىك وتكىزدى.

«پوليتسيا قىزمەتكەرلەرىنە رياسىز كومەك كورسەتكەنى ءۇشىن العىسىمدى بىلدىرگىم كەلەدى, پوگون تاققان ادامدار بوس ۋاقى­تىن­دا كەلىپ, ب ۇلىنگەن جيھازدى شى­عارۋعا كومەكتەستى, قوقىستى بولشەكتەدى, اۋماقتى تازالادى. سىزدەرگە راحمەت!» دەدى زەينەتكەر.

سونداي-اق ۇزاق ۋاقىت بويى ارالعا اينالعان پريبرەجنوە اۋىلىنىڭ تۇرعىندارىنىڭ ءبىرى قايتارىلعان مال ءۇشىن ۋچاسكەلىك ينسپەكتورعا شىن جۇرەكتەن العىس ايتتى. سۋدىڭ تەز كەلۋىنە بايلانىستى ەر ادام باسپانادان اسىعىس تۇردە كەتۋگە ءماجبۇر بولىپ, قوراداعى بورداقىعا قويعان قوشقارلارىن قۇتقارۋعا ۋاقىت بولماپتى. ءماجبۇرلى ەۆاكۋاتسيا­دان ءبىر اي وتكەن سوڭ عانا اۋىل تۇر­عىنى ۋچاسكەلىك ينسپەكتور قايىرتاي نۇرعاليەۆتىڭ كومە­گى­مەن ەۆاكۋاتسيالانعان مالدار اراسىنان ءوز قويلارىن تاپتى.

«كوپتەگەن ادامدار مالدارىن تاستاپ كەتۋگە ءماجبۇر بولدى. ولاردى امان ساقتاپ قالۋ باستى مىندەتتەرىمىزدىڭ ءبىرى بولدى. جۇمىس ۇيىمداسقان تۇردە جۇرگىزىلدى, ۇلكەن سۋمەن ارپالىس كەزىندە اۋىلدا قالعان جەرگىلىكتى تۇرعىندار دا بىزگە بەلسەندى تۇردە كومەك كورسەتتى. ءبارىمىزدىڭ كۇش-جىگەرىمىزبەن مال ۇرلىعىنا جول بەرمەدىك, قۇقىقتىق ءتارتىپ ءتيىستى دەڭگەيدە قامتاماسىز ەتىلدى», دەيدى پوليتسيا اعا لەيتەنانتى ق.نۇرعاليەۆ.

ال وبلىس اكىمى عاۋەز نۇرمۇحامبەتوۆ قىزىلجار اۋدا­نىن­­­داعى سۋ تاسقىنىنان زارداپ شەك­كەن اۋىلداردىڭ ءبارىن ارالاپ شىقتى. ءوڭىر باسشىسى بوگوليۋبوۆو, پريبرەجنوە, نادەجكا, تەپليچنوە, سوكو­لوۆ­كا اۋىلدارىنىڭ تۇرعىن­دا­رىمەن كەزدەستى. اۋىلدىق­تار­عا ءۇيدى جوندەۋ, ساتىپ الۋ بويىنشا ەرەجەلەردى ءتۇسىن­دىردى. قىزىلجار اۋدانىندا 1,5 مىڭ ءۇيدى سۋ باستى, بۇگىنگە دەيىن 500-گە جۋىق ءۇي تەكسە­رىلدى. تۇرعىن ۇيلەردىڭ پايدا­لانۋعا جارامدىلىعىن انىقتاۋ ءۇشىن تەحنيكالىق زەرتتەۋ جۇرگىزىلىپ جاتىر. ۇيلەردى قالپىنا كەلتىرۋ, جوندەۋ جۇمىس­تارىمەن قىزىلجار, اق­قايىڭ اۋداندارىنىڭ مەحاني­كا­لان­دى­رىلعان جاساقتارى اينالىسىپ ءجۇر. كەيبىر باسپانالاردى ءۇي يەلەرى وزدەرى دە جوندەي الادى. بۇل ءۇشىن مەملەكەت ءۇي يەسىنىڭ شوتىنا اقشا اۋدارادى, سوماسى باعالاۋ كوميسسياسىنىڭ شەشى­مىنە بايلانىستى بولادى.

سولتۇستىك قازاقستان وبلىسى