قازاقستاننىڭ سىرتقى قارىز مولشەرى بەلگىلى بولدى

قارجى ءمينيسترى بايانداماسىندا قازاقستان شەت مەملەكەتتەرگە قانشا قارىزى بار ەكەنىن ءمالىم ەتتى.

وتكەن جىلى بيۋدجەت تاپشىلىعى 3,1 ترلن تەڭگەنى قۇراعان. بۇل ناتيجە جالپى ىشكى ءونىمنىڭ 2,6 پايىزىن قۇرايدى. بيۋدجەت تاپشىلىعى ىشكى كوزدەردەن, ونىڭ ىشىندە, قارىز تۇسىمدەرى 5 348,1 ملرد تەڭگە, بيۋدجەت قاراجاتىنىڭ قالدىقتارىن پايدالانۋ 222,3 ملرد تەڭگە, قارىزداردى وتەۋ 2 449,6 ملرد تەڭگە ەسەبىنەن قارجىلاندىرىلعان. 

2024 جىلدىڭ 1 قاڭتارىنداعى جاعداي بويىنشا مەملەكەتتىك بورىش 27,2 ترلن تەڭگە نەمەسە جالپى ىشكى ونىمگە 22,8 پايىزىن (119 251,1657 ملرد. تەڭگە) قۇرادى. ونىڭ ىشىندە ۇكىمەتتىڭ بورىشى - 24,9 ترلن تەڭگە ەكەنى بەلگىلى بولدى.

«مەملەكەتتىك بورىشتىڭ جوعارعى شەگى ەۋرازيالىق ەكونوميكالىق وداققا مۇشە ەلدەر ءۇشىن جالپى ىشكى ونىمگە 50%-دان اسپايتىن دەڭگەيدە بەلگىلەنگەن. قازىرگى ۋاقىتتا مەملەكەتتىك قارجىنى باسقارۋ تۇجىرىمداماسىندا بەلگىلەنگەن بورىشتىق ينديكاتورلار رۇقسات ەتىلگەن ماندەر ايماعىندا تۇر. 2024-2028 جىلدارعا ارنالعان بولجامدار مەملەكەتتىك بورىش كورسەتىلگەن جىلدارى ليميتتەن اسپايتىنىن جانە جالپى ىشكى ونىمگە 25%, ال ۇكىمەتتىك بورىش جالپى ىشكى ونىمگە 21% دەڭگەيىندە بولاتىنىن كورسەتتى», دەدى ءمادي تاكيەۆ.

«سىرتقى قارىز» دەگەن ۇعىمعا ەلىمىزگە كىرگەن بارلىق ينۆەستيتسيالار, فيرماارالىق اقشا قاتىناستارى, بىزدەگى شەتەلدىك كومپانيالار باس كەڭسەلەرىنىڭ قازاقستانداعى فيليالدارىنا جىبەرگەن قارجىسى, ۇكىمەت پەن كۆازيمەملەكەتتىك كومپانيالار العان قارىز جانە ت.ب. بەرەشەكتەر كىرەدى.