ايماقتاردا بالالاردىڭ جازعى دەمالىسىن ۇيىمداستىرۋ ءىس-شارالارى اياقتالدى. بۇل تۋرالى پرەمەر-ءمينيستردىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەستە وبلىس اكىمدەرىنىڭ ورىنباسارلارى باياندادى.
بيىل 3 ملن-نان اسا بالانى بەلسەندى جازعى دەمالىسپەن قامتۋ جوسپارلانعان. وقۋشىلارعا 10 مىڭنان اسا لاگەر قىزمەت كورسەتپەك. بالالارعا دەمالىستان بولەك جاس ەرەكشەلىكتەرىنە قاراي ءتۇرلى تانىمدىق شارالاردىڭ ۇيىمداستىرىلۋى بيىلعى جاز مەزگىلىنىڭ باستى وزگەشەلىگى بولماق.
باستاۋىش سىنىپ وقۋشىلارىنىڭ جان-جاقتى دامۋىنا مەكتەپ جانىنداعى لاگەرلەر جۇمىس ىستەمەك. ودان بولەك, ءارتۇرلى تانىمدىق شارالار قاراستىرىلىپ وتىر. ماسەلەن, اتىراۋ وبلىسىندا «Kids university» جوباسى شەڭبەرىندە بالالار ۋاقىتشا «ستۋدەنتتىك بيلەت» الىپ, بىرنەشە كۇن ەرەكشە ساباقتار ارقىلى عىلىم الەمىنە بويلاماق.
ورتا سىنىپ وقۋشىلارىنا ەكسكۋرسيالىق-تۋريستىك باعدارلامالار ۇسىنىلاتىن بولادى. بالالار تۋعان ولكەسىنىڭ تاريحي, مادەني مۇرالارىمەن تانىسۋ مۇمكىندىگىنە يە بولادى.
مىسالى, سولتۇستىك قازاقستان وبلىسى اۋىل مەكتەپتەرىنىڭ وقۋشىلارىنا پەتروپاۆل قالاسىنا ساپارلارى ۇيىمداستىرىلادى. مۇندا ولارعا شاھاردىڭ كورنەكى ورىندارى كورسەتىلىپ, تاريحي ەسكەرتكىشتەر مەن مۇراجايلارعا تانىمدىق ساياحاتتار قاراستىرىلادى.
شىعىس قازاقستان وڭىرىندە بالالارعا «قوناقجاي وتباسى» جوباسى ۇسىنىلادى. ونىڭ اياسىندا نيەت بىلدىرگەندەر قازاق ءتىلىن مەڭگەرۋگە, ايماقتىڭ اسەم تابيعاتى مەن مادەنيەتىمەن تانىسۋعا مۇمكىندىك الادى. جوباعا قاتىسۋشىلار 20 كۇن بويى اۋىلدىق ەلدى مەكەندەردەگى وتباسىلاردا تۇرادى.
جوعارى سىنىپ وقۋشىلارى ءۇشىن كوللەدج بەن جوعارى وقۋ ورىندارى بازاسىندا مامانداندىرۋ باعىتىنداعى بىرقاتار شارالار جۇزەگە اسىرىلادى. وقۋ-اعارتۋ مينيسترلىگىنىڭ دەرەگىنشە, الەۋمەتتىك جاعىنان از قامتىلعان وتباسىلاردان شىققان بالالاردىڭ 94%-ى قامتىلادى.
سۋ تاسقىنى سالدارىنان زارداپ شەككەن ايماقتاردىڭ بالالارى ەرەكشە نازاردا بولادى. تاسقىن باستالعان كەزدەن باستاپ 614 بالا وقۋ-ساۋىقتىرۋ ورتالىقتارىندا دەمالعان. قازىرگى تاڭدا ول نىسانداردا 629 بالا دەمالىپ جاتىر. جازعى دەمالىس كەزىندە 3 833 بالانى دەمالىس جانە ساۋىقتىرۋ شارالارىمەن قامتۋ جوسپارلانعان.
«وقۋ-اعارتۋ مينيسترلىگى ايماقتارداعى وڭ تاجىريبەلەردىڭ كەڭىنەن تارالۋىن قولعا الۋعا ءتيىس. شارالاردى ۇيىمداستىرۋ كەزىندە بالالاردىڭ قاۋىپسىزدىگىنە باسا ءمان بەرىلگەنى ءجون. بۇگىندە دەمالىس, ساۋىقتىرۋ ورىندارىن تەكسەرۋ, قابىلداۋ كەستەسى بەكىتىلگەن. ونىڭ ساقتالۋىن مۇددەلى مەملەكەتتىك ورگاندار مەن ءوڭىر اكىمدىكتەرى تۇراقتى باقىلاۋدا ۇستاۋى قاجەت», دەپ اتاپ ءوتتى ت.دۇيسەنوۆا.