شەندىلەر دامۋدىڭ شەشىمىن تابا الا ما؟

سولتۇستىك قازاقستان وبلىسى اكىم­دىگىنىڭ ءبىرىنشى توقساننىڭ الەۋمەت­تىك-ەكونو­ميكالىق دامۋىنىڭ قورىتىن­دىلارىن قاراعان وتىرىسىندا ەكونوميكا باسقارماسىنىڭ باسشىسى قۋانىشبەك قاليجانوۆ قالا مەن اۋدان اكىمدىكتەرىنە وسى ماسەلە بويىنشا ينۆەستيتسيالىق جوبالاردى ىسكە اسىرۋ جانە ساۋدا نارىعىن جاڭعىرتۋ, قۇرىلىس ينفراقۇرىلىمىن جەتىلدىرۋ, تۇرعىن-ءۇي قۇرىلىسى كولەمىن ارتتىرۋ بويىنشا مىندەتتەر بەكىتىلگەنىن ايتتى. الايدا وسى مىندەتتەرگە اكىمدەر سالعىرت قارايتىن سەكىلدى. سوندىقتان بولار, قۋانىشبەك قاليجانوۆ وبلىس اكىمى عاۋەز نۇرمۇحامەتوۆكە: «ۇكىمەتتىڭ تاپسىرماسىن ساپالى ورىنداۋعا ءتيىستى باسقارمالار مەن اكىمدەرگە جۇمىستى جانداندىرۋ تۋرالى تاپسىرما بەرۋىڭىزدى سۇرايمىن. سونىمەن بىرگە اكىمدەرگە ەكونوميكانىڭ ءوسىمىن قامتاماسىز ەتەتىن قوسالقى ادىستەر تابۋدى تاپسىرۋ كەرەك», دەدى. ق.قاليجانوۆتىڭ بارلىق جۇرتتىڭ كوزىنشە جۇمسارتىپ ايتقانداعى ءوتىنىشى وسىنداي بولسا, باسشىلاردىڭ بولبىر ارەكەتى ءبىلىنىپ تۇر.

ودان ءارى قۋانىشبەك قاليجانوۆ ەكونوميكا سالالارى بويىنشا ءبىرىنشى توقساننىڭ قورىتىندىلارىنا توقتالدى. سونىڭ ىشىندە اۋىل شارۋاشىلىعى ونىمدەرى بويىنشا وبلىس بىلتىرمەن سالىستىرعاندا 3,4% وسىمگە قول جەتكىزگەن. رەسپۋبليكا بويىنشا وسى كورسەتكىش 1,6% بولىپتى. دەگەنمەن بۇل ءوسىم بىلتىرمەن سالىستىرعاندا تومەن, اتالعان مەرزىمدە بىلتىرعى ءوسىم 4,6% بولعان ەكەن. سونىڭ ىشىندە مال شارۋاشىلىعى ونىمدەرىنىڭ ءوسىمى دە وتكەن جىلمەن سالىستىرعاندا 1,2%-عا تومەن بولعان. ەت ءوندىرۋدىڭ ءوزى 4,4%-عا تومەندەپ كەتكەن. ال ءسۇت پەن جۇمىرتقانىڭ ءوسىمى جاقسى, العاشقىسى 12,6%, سوڭعىسى 7,8%-عا ارتقان.

ءۇش ايدا ونەركاسىپ ونىمدەرىنىڭ كولەمى 177,1 ملرد تەڭگەگە جەتىپ, 112,1%-عا ورىندالعان. سونىڭ ىشىندە وڭدەۋ ونەركاسىبى ءونىمىنىڭ ءوسىمى 14,7% بولعان. ياعني وتكەن جىلدىڭ سايكەس مەرزىمىندە 112,2 ملرد تەڭگەنىڭ ءونىمى شىعارىلسا, بيىل ول 143,9 ملرد تەڭگەگە جەتكەن.

ونەركاسىپ ونىمدەرىنىڭ نەگىزگى بولىگى پەتروپاۆل قالاسىندا جاسالادى (بارلىق ءونىمنىڭ 71,7% پايىزى). ونەركاسىپتى ورگە سۇيرەپ تۇرعان كاسىپورىندار قاتارىندا «زيكستو» اق, «ماسلو دەل» جشس, «ەۆرازيان ميلك» جشس, «رادۋگا» جشس, «زەلەنىي سەۆەر» جشس, «ست Assembly» جشس, «پەتروپاۆلدىڭ ەلەكتروتەحنيكالىق زاۋىتى» جشس بار. 

وسى توقساندا ەكونوميكاعا تارتىلعان ينۆەستيتسيا كولەمى 94,6 ملرد تەڭگە بولعان. بۇل بىلتىرعىدان 48,8%-عا ارتىق. قۇرىلىس سالاسىنداعى ءوسىم دە قارقىندى. ىستەلگەن جۇمىس كولەمى بىلتىرمەن سالىستىرعاندا 4,8%-عا جوعارى.

سولتۇستىك قازاقستان وبلىسىنىڭ بيىل ادەپكى توقسانىنداعى جالپى ەكونوميكالىق جاعدايى تۇراقتى بولىپ, جەرگىلىكتى بيۋدجەتكە تۇسكەن تابىس 110,5%-عا ورىندالىپ, 31,8 ملرد تەڭگەگە جەتكەن. جوسپاردان تىس الىنعان تابىس 3,8 ملرد تەڭگە بولىپ وتىر. بۇل تۋرالى وبلىستىڭ قارجى باسقارماسىنىڭ باسشىسى ناتاليا دىشكانت جاريالادى. وسىناۋ قاراجاتتىڭ 17,8 ملرد تەڭگەسى وبلىستىق بيۋدجەتتىڭ كىرىس بولىگىنە الىنعان. قالعان 13,9 ملرد تەڭگەسى قالا جانە اۋداندار بيۋدجەتىنە قۇيىلعان. دىشكانتتىڭ ايتۋىنشا, 2024 جىلدىڭ ءبىرىنشى توقسانىنداعى شىعىس جوسپارى 100%-عا ورىندالعان. الايدا ول ءوزىنىڭ سوزىنە ءوزى قارسى كەلىپ, 34,5 ملن تەڭگەنىڭ يگەرىلمەگەنىن ايتتى. سونىڭ 8 ملن تەڭگەسى رەسپۋبليكالىق بيۋدجەتتەن بەرىلگەن ماقساتتى ترانسفەرت ەكەن. قارجىگەر بايانداماسىن: «وسى جىلدىڭ ءبىرىنشى توقسانىنداعى قورىتىندى بو­يىنشا ءبىزدىڭ وبلىس بيۋدجەتتىڭ ورىندالۋى رەسپۋبليكا بويىنشا ەڭ الدىڭعى قاتاردا», دەپ اياقتادى.

سولتۇستىك قازاقستان وبلىسى