ۇلىتاۋ وبلىسى جاڭاارقا اۋدانىنىڭ ورتالىعىندا جازۋشى, ەتنوگراف اقسەلەۋ سەيدىمبەكتىڭ ەسكەرتكىشى ورناتىلدى. تۇلعانى تۇعىرىنا قوندىرۋ جوباسى حالىقتىڭ نيەتىمەن جانە مۇددەلى ازاماتتاردىڭ قولداۋىمەن جۇزەگە استى. ءىس-شارانىڭ اشىلۋ سالتاناتىنا ەلىمىزگە بەلگىلى زيالى قاۋىم وكىلدەرى, عالىمدار مەن اقىن-جازۋشىلار قاتىستى.
ەسكەرتىش قولادان قۇيىلعان. بيىكتىگى – 3.9 مەتر. تۋىندىنىڭ اۆتورى – ەلىمىزگە بەلگىلى ءمۇسىنشى تالاپحان ازامات. الاشتىڭ ابىز اقساقالىنىڭ ايبىنى اسقاقتاپ تۇرعان سوم تۇلعاسى كورگەن حالىقتىڭ كوڭىلىن تولتىردى.
اقسەلەۋ سلان ۇلى – سانالى عۇمىرىن ۇلت مۇراسىن تۇگەندەۋگە جۇمساعان ەلىنىڭ ادال پەرزەنتى. عيبراتتى عالىم, ساڭلاق ساناتكەر, قابىرعالى قالامگەر, ونەگەلى ونەرتانۋشى ازامات. ونىڭ «كۇڭگىر-كۇڭگىر كۇمبەزدەر», «ويتولعاق», «كۇي شەجىرە», «مىڭ ءبىر مارجان», «قازاقتىڭ اۋىزشا تاريحى» سياقتى ىرگەلى ەڭبەكتەرى – ۇلتتىڭ رۋحاني قازىناسىن وراسان بايىتقان قۇندى جادىگەرلەر.
ەسكەرتكىشتىڭ اشىلۋ سالتاناتىندا ءسوز سويلەگەن جازۋشى بەكسۇلتان نۇرجەكەەۆ اقسەلەۋ تۇلعاسىنىڭ بەينەلەنۋى – بۇگىنگى كۇنگە ەمەس, بولاشاققا جاسالعان رۋحاني باعدار ەكەنىن اتاپ ءوتتى. «اكەمىزدىڭ ارتىندا قالعان مول مۇرانى ناسيحاتتاۋ شارالارى تۋعان جەرىندە ۇنەمى جالعاسىپ كەلەدى. بۇگىندە جاڭاارقا كەنتىندەگى ورتالىق كوشەنىڭ ءبىرى ونىڭ ەسىمىمەن اتالادى. ەڭسەلى ەسكەرتكىشتىڭ ورناۋى دا ونىڭ ونەگەلى ءومىرىن القالاعان جۇرتشىلىقتىڭ تىلەگى بولاتىن», دەدى ەرنار سەيدىمبەك.
ءىس-شارانىڭ سوڭىندا اقسەلەۋ بيىگىندە مارقۇمنىڭ رۋحىنا قۇران باعىشتالىپ, جينالعان جۇرتشىلىققا قۇدايى اس بەرىلدى.