بالاعا انادان اسقان مەيىربان, قامقور, جاناشىر جان جوق شىعار, ءسىرا! سول ءۇشىن دە الەمنىڭ بىرنەشە ەلىندە جىل سايىن انالار كۇنى تويلانادى. بيىل ەلىمىزدە العاش رەت وسىناۋ اتاۋلى مەرەكە كۇنتىزبەگە ەنىپ, تۇرعىندار مامىردىڭ ەكىنشى جەكسەنبىسىندە انالارعا سىي-قۇرمەت كورسەتتى.
مەرەكە قارساڭىندا استانا قالاسىندا وتباسى ينستيتۋتىن نىعايتۋعا باعىتتالعان بىرنەشە ءىس-شارا ۇيىمداستىرىلدى. سونىڭ ءبىرى رەتىندە «وتباسى – باقىت مەكەنى» دەگەن اتاۋمەن ۇلتتىق تاعامدار ازىرلەۋدەن وتكەن شەبەرلىك ساباعىن ايتۋعا بولادى. شەبەرلىك ساباعىنا قاتىسقان انالار تاجىريبەلى اسپازداردان ساباق الىپ, ءبىر كۇندە تاعامنىڭ ءتۇر-ءتۇرىن ازىرلەدى. مەرەكەنى ءوز دەڭگەيىندە اتاپ وتۋگە استانا قالاسى اكىمدىگى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيامەن قاتار جاستار ساياساتى ماسەلەلەرى جونىندەگى باسقارما قولداۋ كورسەتكەن.
شەبەرلىك ساباعىندا استانا قالاسى اكىمدىگى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ حاتشىسى قارلىعاش ساركەنوۆا ءىس-شارانىڭ ءمان-مازمۇنىن ايتىپ, انالاردى قۇتتىقتادى.
«انالار اسپازداردىڭ شەبەرلىك ساباعىنا قىزىعادى. مۇنداي ءىس-شارالار ولاردىڭ تاجىريبە الماسىپ, ءبىرىن-ءبىرى قولداي الاتىن جاس انالار قاۋىمداستىعىن قۇرۋعا ىقپال ەتەدى. قاتىسۋشىلاردىڭ ءوزىن-ءوزى باعالاۋىن, سەنىمدىلىگى مەن كاسىبيلىگىن دامىتۋعا ىقپالداسادى. سونداي-اق ولاردىڭ شىعارماشىلىق الەۋەتىن اشۋعا كومەكتەسەدى. دەمەك ءبىز مۇنداي مازمۇندى, ماڭىزدى باستامالاردى قولداۋىمىز قاجەت», دەدى ق.ساركەنوۆا.
قاتىسۋشىلاردىڭ اراسىندا اعىلشىن ءتىلى ءپانىنىڭ وقىتۋشىسى ءمادينا مىرزانوۆا دا بار. ول شەبەرلىك ساباعىندا تاجىريبەلى اسپازدىڭ جۇمىسىن باقىلاپ, تاعام دايىنداۋدىڭ بۇرىن-سوڭدى ەلەمەگەن قىر-سىرىنا قانىققانىن ايتتى.
– بۇگىن مەرەكە قارساڭىندا ۇيىمداستىرىلعان شەبەرلىك ساباعىنا 12 جاس انا كەلدىك. ارينە, ارقايسىمىز اس ازىرلەۋدەن تاجىريبەمىز بولعانىمەن, كەيدە وڭاي نارسەنى ەلەپ-ەسكەرە بەرمەيتىن تۇستارىمىز بولادى ەكەن. ءبىر تاعامدى دايىنداۋدىڭ ءبىر ەمەس, بىرنەشە جولى بولۋى مۇمكىن. مىنە, وسى سەكىلدى سۇراقتارىمىزدى بۇگىن استانا قالاسىنىڭ شەف-اسپازدار قاۋىمداستىعىنىڭ مۇشەسى ارايلىم قالباەۆاعا قويدىق. نەبىر ءدامدى تاعامداردى دايىنداۋدىڭ قۇپياسىن مەڭگەرۋگە تىرىستىق, – دەيدى م.مىرزانوۆا.
شەبەرلىك ساباعىنا كەلگەن انالار مەرەكەلىك تاعامداردى دايىنداۋدىڭ قىر-سىرىن ۇيرەتكەن تاجىريبەلى تالىمگەرلەرگە العىس ايتۋدى ۇمىتپادى. مەرەكەگە وراي استانا قالاسىندا كاسىبي وتباسىلىق پسيحولوگتەرىنىڭ قاتىسۋىمەن جاس وتباسىلارعا ارنالعان سەمينار-ترەنينگتەر, اسپازدىقتان, سۋرەت سالۋمەن قاتار قىش-قۇمىرا جاساۋدان كۋرس ءوتتى. سونداي-اق «كوڭىلدى ستارت» سپورتتىق وتباسىلىق ەستافەتاسى, «ۇزدىك جاس وتباسى» بايقاۋى ۇيىمداستىرىلدى.