قازاق قىزى تاريحتا العاش رەت ەۆەرەست شىڭىنا شىعىپ, رەكورد ورناتتى

قۇرامىندا انار بۋراشەۆا مەن ماقسات جۇماەۆ بار «Kazakh Everest Team» قازاقستاندىق كوماندا الەمنىڭ ەڭ بيىك شىڭى – ەۆەرەست شىڭىنا (8 848 م) ءساتتى كوتەرىلدى. بۇل تۋرالى «Kazakh Everest Team» ءباسپاسوز قىزمەتى مالىمدەدى.

نەپالدىڭ گيمالايدا كوتەرىلۋگە ماماندانعان جانە قازاقستاندىق ەكسپەديتسيانىڭ رەسمي جولسەرىگى «Seven Summit Treks» كومپانياسىنىڭ حابارلاۋىنشا, قازاقستاندىق كوماندا 12 مامىر كۇنى نەپال ۋاقىتىمەن تاڭعى ساعات 07:25-تە ەۆەرەست شىڭىن باعىندىردى.

8 000 مەتردەن جوعارى بيىكتىكتەگى داۋىل مەن بوران تۇرىندەگى كۇردەلى اۋا رايىنا بايلانىستى شىڭدى باعىندىرۋعا نيەتتەنگەن ەكسپەديتسيالاردىڭ كوپشىلىگى باعىتىنان كەرى قايتتى. تەك بەس ەلدىڭ الپينيستەرى ەۆەرەستكە ءساتتى كوتەرىلە الدى. ولاردىڭ اراسىندا ءبىزدىڭ وتانداستارىمىز بار. تاريحتا الەمنىڭ ەڭ بيىك شىڭىنا شىققان تۇڭعىش قازاق قىزى انار بۋراشەۆا جانە ەڭبەگى سىڭگەن قازاقستاندىق الپينيست ماقسۇت جۇماەۆ. بۇل ونىڭ ەۆەرەست شىڭىنا وسىمەن ءۇشىنشى رەت شىعۋى.

ەۆەرەست شىڭىنا انار بۋراشەۆا مەن ماقسات جۇماەۆ قازاقستان رەسپۋبليكاسىنىڭ مەملەكەتتىك تۋىن ورناتتى.