ۇلتتىق سپورتتىڭ ءورىسىن ۇلعايتىپ, دامۋىنا سەرپىن بەرۋ زاڭ جۇزىندە جۇزەگە اسىرىلىپ, ارنايى كودەكسپەن قورعالعاندا عانا ءىس ىلگەرى باسادى. كەلەشەكتە زاڭ قابىلدانسا, ءتول ونەرىمىزدىڭ وركەندەۋىنە مۇمكىندىك ۇلعايادى دەپ ءۇمىت ەتكەن توپ باس قوستى.
قوڭىر كۇزدە استانا قالاسىندا وتەتىن V دۇنيەجۇزىلىك كوشپەلىلەر ويىندارىنا دايىندىق جان-جاقتى پىسىقتالىپ جاتىر. سونداي ءىس-شارانىڭ ءبىرى الماتىداعى قازاق ۇلتتىق اگرارلىق زەرتتەۋ ۋنيۆەرسيتەتىندە ءوتىپ, «قازاقستانداعى ات سپورتى مەن ۇلتتىق جىلقى شارۋاشىلىعىنىڭ قازىرگى جاعدايى مەن دامۋ پەرسپەكتيۆالارى» دوڭگەلەك ۇستەل ۇستىندە تالقىلاندى.
جيىنعا ۇلتتىق عىلىم اكادەمياسىنىڭ پرەزيدەنتى, قازاق ۇلتتىق اگرارلىق زەرتتەۋ ۋنيۆەرسيتەتىنىڭ رەكتورى اقىلبەك كۇرىشباەۆ, ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ, ءماجىلىس دەپۋتاتى امانجول ءالتاي, سونداي-اق تۋريزم جانە سپورت مينيسترلىگىنىڭ, اۋىل شارۋاشىلىعى مينيسترلىگىنىڭ, عىلىمي قوعامداستىقتىڭ, سپورت كلۋبتارىنىڭ, ۇلتتىق سپورت قاۋىمداستىعىنىڭ وكىلدەرى جانە ونىڭ قۇرامىنا كىرەتىن فەدەراتسيالاردىڭ باسشىلارى مەن اتبەگىلەرى قاتىستى.
ەلىمىزدە سپورتتىق جىلقى شارۋاشىلىعىن دامىتۋ, ات سپورتى مەن ۇلتتىق سپورت تۇرلەرىنەن ماماندار دايارلاۋ ماسەلەلەرى تالقىلانىپ, دوڭگەلەك ۇستەلگە جينالعان قاۋىم ءوز ويىن ورتاعا سالدى. ۇلتتىق سپورت قاۋىمداستىعىنىڭ پرەزيدەنتى ي.سالجانوۆ بىرنەشە فەدەراتسياعا ءبولىنىپ, جۇمىسىن ءوربىتىپ وتىرعان ۇلتتىق سپورت تۇرلەرىن رەتتەۋ ماسەلەلەرىنە جەكە-جەكە توقتالىپ, اۋقىمدى شارۋا اتقارىلۋعا ءتيىس ەكەنىن باسا ايتتى. قازاقستاندا وسىعان دەيىن بۇل سالانى رەتتەيتىن بىردە-ءبىر زاڭ قابىلدانباعاندىقتان دا شارۋانىڭ جۇيەلى جۇرگىزىلۋىنە قولبايلاۋ بولاتىنىن جەتكىزدى.
«2022 جىلى ۇلتتىق سپورت قاۋىمداستىعىن باسقارۋ ماعان جۇكتەلدى. ەكى جىلدان بەرى ەڭسەرىپ كەلە جاتقان نەگىزگى شارۋامىزدىڭ ءبىرى – وسى ۇلتتىق سپورت تۋرالى زاڭ جوباسىن ازىرلەۋ. سونىڭ نەگىزىندە پارلامەنت ءماجىلىسىنىڭ دەپۋتاتتارىمەن بىرلەسىپ ازىرلەنەتىن زاڭدا ەتنوسپورتتى دامىتۋدىڭ اسپەكتىلەرى قامتىلادى», دەدى ي.سالجانوۆ.
مەملەكەت باسشىسىنىڭ تاپسىرماسى بويىنشا ۇلتتىق سپورتتى دامىتۋدىڭ 2024-2029 جىلدارعا ارنالعان تۇجىرىمداماسىنىڭ جوباسىن ازىرلەۋ دە وسى ۇيىمعا جۇكتەلىپ وتىر. ەلىمىزدە ۇلتتىق سپورت تۇرلەرىن دامىتۋ ماسەلەلەرى جانە ولاردى شەشۋ جولدارى جان-جاقتى قامتىلىپ, ىسكە اسىرىلاتىن جوسپارى مەن نىسانالى ينديكاتورلارى ۇسىنىلادى.
دوڭگەلەك ۇستەلگە جينالعاندار قازاقستانداعى جىلقى زاۋىتتارىنىڭ قازىرگى جاي-كۇيىن, ونداعى ات سپورتى يندۋسترياسىن دامىتۋدىڭ حالىقارالىق تالاپقا ساي كەلمەيتىنىن, ينفراقۇرىلىمدى الدىمەن قولعا الۋ قاجەتتىگىن ەسكەرتتى. سونىمەن قاتار ۇلتتىق ويىندارعا بەيىمدەلگەن جىلقىلاردىڭ سانىن كوبەيتپەيىنشە, تەڭگە ءىلۋ, كوكپار, بايگە, اۋدارىسپاق, جامبى اتۋ سىندى ات ۇستىندە وتەتىن بەكزادا ونەردى دامىتۋ مۇمكىن ەمەس. تاعى ءبىر كىلتيپان, سپورت عىلىمى مەن سپورتتىق مەديتسينانى دامىتۋ اقساپ تۇر. بۇعان دا باسا كوڭىل ءبولىپ, نازار اۋدارماسا, قولىمىزدى مەزگىلىنەن كەش سەرمەپ قالامىز دەستى جيىلعان قاۋىم.
ەلوردادا وتەتىن دۇنيەجۇزىلىك كوشپەلىلەر ويىندارىنىڭ قارساڭىندا ۇلتتىق سپورت قاۋىمداستىعىنىڭ باستاماسىمەن ۇلتتىق سپورت جوعارى مەكتەبى قۇرىلدى. الماتىداعى سپورت جانە تۋريزم اكادەمياسىنا العاش رەت «ات سپورتى تۇرلەرىنىڭ جاتتىقتىرۋشىسى» ماماندىعىنا جانە قازاق ۇلتتىق اگرارلىق زەرتتەۋ ۋنيۆەرسيتەتىنىڭ بازاسىندا «سپورتتىق جىلقى شارۋاشىلىعىنداعى ۆەتەرينار» ماماندىعى بويىنشا تالاپكەرلەردى قابىلداۋ باستالماق.
ءوز كەزەگىندە اقىلبەك كۇرىشباەۆ قازاقستاندا ۇلتتىق سپورت تۇرلەرى قارقىندى دامىپ كەلە جاتقانىنا, اتتى كۇتۋ, باپتاۋ وزىندىك ءبىر عىلىم ەكەنىنە توقتالدى.
«ات سپورتىندا جىلقىنىڭ كۇيىن باقىلاۋ, راتسيونالدى ازىقتاندىرىلۋىن قاداعالاۋ, كۇتىپ-باپتاۋدى دۇرىس ۇيىمداستىرۋ جانە ينفەكتسيالىق اۋرۋلارعا قارسى ۋاقتىلى ەكپە جاساۋ – تىكەلەي ۆەتەرينارلاردىڭ مىندەتى. ءتول ونەردى الەمدىك دەڭگەيگە شىعارۋ باعىتىندا كاسىبي مامانداردى, سونىڭ ىشىندە جىلقى باپتاۋ جونىندەگى ۆەتەرينارلاردى دايارلاۋدىڭ جەتىسپەۋى كۇردەلى ماسەلەلەردىڭ ءبىرى بولىپ وتىر. وسىعان وراي, 2024-2025 وقۋ جىلىنان باستاپ, ءبىزدىڭ ۋنيۆەرسيتەتتە «ات سپورتىنىڭ ۆەتەرينارياسى» ماماندارىن دايارلاۋ ەلىمىزدە ءبىرىنشى رەت جۇزەگە اسىرىلماق», دەدى ۋنيۆەرسيتەت رەكتورى.
ۇلتتىق سپورت قاۋىمداستىعىنىڭ قولداۋ كومەگىمەن سەنات دەپۋتاتتارى قوستانايلىق جىلقى تۇقىمىن ساقتاۋ جانە ءوسىمىن مولايتۋ جونىندەگى زاڭعا باستاماشى بولدى. بۇل بۇگىندە ماجىلىستە قارالۋ ساتىسىندا تۇر.
دوڭگەلەك ۇستەلگە جينالعان ماماندار قازاق ۇلتتىق اگرارلىق زەرتتەۋ ۋنيۆەرسيتەتى بازاسىندا سپورتتىق جىلقىلاردى باقىلاۋ باعىتىندا دوپينگ زەرتحاناسىن اشۋ, مال شارۋاشىلىعىنىڭ وزەكتى سالاسى رەتىندە سپورتتىق جىلقى باسىن كوبەيتۋگە قاتىستى ۇسىنىستارى قابىلدانىپ, زاڭ جوباسىنا قوسىلدى.