پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن وتكەن كەڭەستە ەلدىڭ ىشكى نارىعىن جانار-جاعارمايمەن قامتاماسىز ەتۋ ماسەلەلەرى قارالدى. جيىنعا ەنەرگەتيكا مينيسترلىگى, قارجىلىق مونيتورينگ اگەنتتىگى, ۇقك شەكارا قىزمەتى, مەملەكەتتىك كىرىستەر كوميتەتى جانە «قازمۇنايگاز» ۇك» اق باسشىلىعى قاتىستى.
ەنەرگەتيكا ءمينيسترى الماسادام ساتقاليەۆ پەن «قازمۇنايگاز» اق باسقارما توراعاسى ماعزۇم مىرزاعاليەۆتىڭ ايتۋىنشا, نارىقتاعى جاعداي تۇراقتى جانە بارلىق جانار-جاعارماي ءتۇرىنىڭ قورى جەتكىلىكتى. كوكتەمگى ەگىس جۇمىستارى ءۇشىن اۋىل شارۋاشىلىعى تاۋارىن وندىرۋشىلەرگە ديزەلدىك وتىن جەتكىزۋ ءبىرىنشى كەزەكتە جۇرگىزىلىپ جاتقانى اتاپ ءوتىلدى.
ۇقك شەكارا قىزمەتى ديرەكتورىنىڭ ورىنباسارى باۋىرجان ءابساماتوۆ مۇناي ونىمدەرىنىڭ كولەڭكەلى اعىنى مەن زاڭسىز ەكسپورتىن بولدىرماۋ بويىنشا بەلسەندى جۇمىس جۇرگىزىلىپ جاتقانىن حابارلادى. اتاپ ايتقاندا, مەملەكەتتىك كىرىستەر كوميتەتىمەن بىرلەسە وتىرىپ, جىل باسىنان بەرى باقىلاۋ-وتكىزۋ بەكەتتەرىندە شامامەن 130 مىڭ ليتر كولەمىندە جانار-جاعارمايدى زاڭسىز اكەتۋدىڭ 900-گە جۋىق دەرەگى انىقتالىپ, جولى كەسىلدى.
بۇدان بولەك, جىل باسىنان بەرى قارجىلىق مونيتورينگ اگەنتتىگىندە جالپى قۇنى 1,6 ملرد تەڭگە بولاتىن 6 مىڭ توننا جانار-جاعارمايدىڭ زاڭسىز ساتىلۋى بويىنشا 13 ماتەريال تىركەلدى.
سونداي-اق كەڭەستە رەسەيلىك تاراپپەن قاجەت بولعان جاعدايدا جانار-جاعارماي جەتكىزۋ تۋرالى ۇكىمەت دەڭگەيىندەگى كەلىسىم بار ەكەنى اتاپ ءوتىلدى.
كەڭەس قورىتىندىسىندا پرەمەر-ءمينيستردىڭ ءبىرىنشى ورىنباسارى ىشكى نارىقتا جانار-جاعارماي تاپشىلىعىن بولدىرماۋ, ونى ەلدەن زاڭسىز شىعارۋ ارەكەتتەرىنىڭ جولىن كەسۋ بويىنشا ناقتى تاپسىرمالار بەردى.