قانت ەكسپورتىنا تىيىم سالىنادى

6 مامىردا ۆيتسە-پرەمەر سەرىك جۇمانعاريننىڭ توراعالىعىمەن وتكەن سىرتقى ساۋدا ساياساتى جانە حالىق­ارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆو­ارالىق كوميسسيانىڭ وتىرىسىندا قانت قىزىلشاسىنىڭ جاڭا ءونىمى جينالعانعا دەيىن ىشكى نارىقتى قانتپەن قامتاماسىز ەتۋ ماسەلەلەرى قارالدى.

قازiرگi ۋاقىتتا قويمالارداعى قانت قورىنىڭ جانە قازاقستانعا يمپورت كولەمiنiڭ تەڭگەرiمi شامامەن 256 مىڭ توننا, بۇل ەلدiڭ جىلدىق قاجەتتiلiگiنiڭ جارتىسى (500-550 مىڭ توننا).

«بۇگىندە قويمالارداعى قانت پەن شيكى قۇراق قورى 136 مىڭ توننا. 2024 جىلدىڭ 31 تامىزىنا دەيىن كۆوتامەن رەسەيلىك قانتتىڭ 120 مىڭ توننا كولەمىندەگى يمپورتىن قوسقاندا, بۇل شامامەن 256 مىڭ تونناعا دەيىن جەتەدى. سونىمەن قاتار قازاقستاندا 2024 جىلدىڭ سوڭىنا دەيىن وڭدەۋگە ارنالعان 300 مىڭ توننا شيكى قۇراقتى باجسىز اكەلۋگە كۆوتا بار. ورتا ەسەپپەن ايلىق تۇتىنۋ جازدا 46 مىڭ توننا, سۇرانىس 60 مىڭ تونناعا جەتەدى. قولدانىستاعى قانت قورى جاڭا ونىمگە دەيىن قانتقا دەگەن سۇرانىستى وتەۋگە جەتكىلىكتى»,  دەدى اۋىل شارۋاشىلىعى ۆيتسە-ءمينيسترى ەربول تاسجۇرەكوۆ.

جاقىن ارادا قازاقستان تاراپى رەسەيلىك ارىپتەستەرىمەن قانت جەتكىزۋ كۆوتاسىن جىل سوڭىنا دەيىن تاعى دا 100 مىڭ تونناعا ۇلعايتۋ بويىنشا كەلىسسوزدەر جۇرگىزۋدى جوسپارلاپ وتىر. سونىمەن قاتار قازاقستاندىقتاردى قانتپەن ۇزدىكسىز قامتاماسىز ەتۋ ءۇشىن ۆەدومستۆوارالىق كوميسسيامەن 2024 جىلعى 31 تامىزعا دەيىن قازاقستاننان ءۇشىنشى ەلدەرگە, ونىڭ ىشىندە حالىقارالىق ءترانزيتتى قوسپاعاندا, ەاەو-عا قاتىسۋشى ەلدەرگە قانت ەكسپورتىنا ۋاقىتشا تىيىم سالۋدى ەنگىزۋ تۋرالى ۇجىمدىق شەشىم قابىلداندى.