«قازگيدرومەت» مالىمەتىنە قاراعاندا, ەسىلدىڭ سۋى تۇراقتى تۇردە تارتىلىپ كەلەدى. مۇنىڭ ءوزى تاسقىننىڭ سوڭعى فازاعا تۇسكەنىن بىلدىرەدى دەيدى ماماندار. مىسالى, سەرگەەۆكا تۇبىندەگى وزەننىڭ دەڭگەيى 57 سم-گە ءتۇسىپ, قاۋىپتى دەڭگەيدەن ەكى ەسەگە جۋىق تومەندەگەن. ال سەرگەەۆ سۋ قويماسىنداعى بيىكتىك قازىر 926 سم-گە تۇسكەن. ەڭ بيىك نۇكتەسى 1425 سم ەدى.
سول سياقتى پوكروۆكا, نوۆونيكولسك اۋىلدارىنىڭ تۇبىندەگى دەڭگەي دە تومەن تۇسە باستاعان. رەسەيمەن ەكى ورتادا ورنالاسقان دولماتوۆ اۋلىنداعى ەسىلدىڭ دەڭگەيى 11 سم-گە تومەندەگەن. پەتروپاۆل سۋ قويماسىندا ەسىلدىڭ دەڭگەيى 28 سم-گە ءتۇسىپ, 16 ساۋىردە بولعان 12 مەتردەن اسقان بيىكتىكتەن قۇلدىراپ, قازىر 10,8 مەتردىڭ ماڭايىنا ءتۇستى.
قازىر نەگىزگى كۇش تاسقىننىڭ زاردابىن جويۋعا جۇمىلدىرىلعان. سۋ باسقان ۇيلەردىڭ سۋىن اۆتوبوشكەلەرگە سورعىزىپ, دالاعا تاسۋدىڭ جۇمىستارى قىزۋ جۇرگىزىلىپ جاتىر. زارداپ شەگۋشىلەرگە ارنالىپ وبلىس اۋماعىندا 500 ءۇي سالىنادى. سۋ باسقان ويقالا, تەرى زاۋىتى, تەپليچنىي شاعىن اۋداندارىنا بارعان ءوڭىر اكىمى عاۋەز نۇرمۇحامبەتوۆ ۇيلەرى قۇلاۋدىڭ از-اق الدىندا قالعان تۇرعىندارعا جاڭادان ءۇي سالىناتىنىن ايتتى. قازىر بۇل اۋدانداردا مەحانيكالىق بريگادالار قالپىنا كەلتىرۋگە بولمايدى دەپ باعالانعان ۇيلەردى ءسۇرىپ, ورىندارىن تازالاپ جاتىر.
قازىر قالانىڭ «سولنەچنىي-2» شاعىن اۋدانىندا «قازاقستان حالقىنا» قورىنىڭ بولگەن قاراجاتىنا 100 ءۇيدىڭ قۇرىلىسى باستالىپ كەتتى. سونىمەن قاتار وسى جەرگە «Kaspi» اق – 300 ءۇي, «Kazakhmys» كورپوراتسياسى 100 ءۇي تۇرعىزباقشى. ونى سالۋشى جەرگىلىكتى 10 قۇرىلىس كومپانيالارى دا بەلگىلەنگەن. «بۇل – وراسان زور جۇمىس. الايدا ءبىز الدىمىزداعى جىلىتۋ ماۋسىمى باستالعانشا زارداپ شەككەندەردى جىلى ۇيلەرگە كىرگىزۋىمىز كەرەك», دەدى وبلىس اكىمى.
سۋدان زارداپ شەككەن شاعىن اۋدانداردىڭ ءبىرى – «زارەچنىي». بۇل اۋداننىڭ تۇرعىندارى دا تەگىس ەۆاكۋاتسيالانعان ەدى. مۇنداعى باس بوستاندىعىنان ايىرىلعان ەرلەر مەن ايەلدەر زونالارى دا كوشىرىلگەن. جۋىردا وسى اۋداننىڭ تۇرعىندارىمەن قالا اكىمى سەرىك مۇحامەديەۆ كەزدەسىپ, كوپتەگەن ماسەلەنىڭ ءمان-جايىنا قانىقتى. وسىنداعى ساياجايلاردىڭ بىرىندە تۇرىپ كەلگەن اقمارال رۇستەموۆا بيىل ساياجايداعى ءۇيىن كەڭەيتىپ, ەكى بولمە قوسپاقشى بولعان ەكەن. قاجەتتى ماتەريالداردى الىپ تا قويعان. بىراق سونىڭ ءبارى سۋدا قالىپتى. ەندى ول وسىنداي ساياجايدا تۇرعاندارعا ءۇي بەرۋ قاراستىرىلماعانىن ايتىپ شاعىمداندى. بۇعان قالا اكىمىنىڭ وندايلارعا جاۋابى قىسقا بولدى. «مۇنداي ماسەلەلەردى سوت ارقىلى شەشۋ كەرەك. ەگەر سوتقا باسپاناسىز قالعاندارىڭىزدى دالەلدەسەڭىزدەر جانە سوت ءۇي بەرۋ تۋرالى شەشىم شىعارسا, ءبىز تۇرعىن ۇيمەن قامتاماسىز ەتۋگە مىندەتتىمىز», دەدى ول.
جۇرتتىڭ ءبارى زارداپ شەككەندەرگە بولىسىپ, كومەكتەسىپ جاتقاندا الاياقتار دا سۇمپايى قىلىقتارىن قويمايدى. جۋىردا جەرگىلىكتى چاتتاردىڭ بىرىنە شەتەلدىك نومىرمەن پوست جاريالاعان ءبىر الاياق زارداپ شەككەن تۇرعىندارعا 5 ملن تەڭگە الىپ بەرە الاتىنىن حابارلاپ, سىلتەمەسىن كورسەتىپتى. پوليتسيا بۇعان دەر كەزىندە ءمان بەرىپ, ارناۋلى قۇرالدارمەن تەكسەرىپ, سىلتەمەگە كىرگەن ادامنىڭ دەرەكتەرى الاياقتىڭ قولىنا تۇسەتىنىن جانە تەلەفونىنا ۆيرۋس كىرەتىنىن انىقتادى. الاياق بۇل دەرەكتەردى پايدالانىپ, نەسيە رەسىمدەۋى مۇمكىن ەكەن. سوندىقتان مۇنداي كەلەڭسىزدىكتەن بارىنشا اباي بولعان ءجون.
سولتۇستىك قازاقستان وبلىسى