ساۋىردە «تازا قازاقستان» دەگەن ۇرانمەن باستالعان رەسپۋبليكالىق ەكولوگيالىق اكتسيا مامىرعا دەيىن جالعاستى. ءوڭىر-وڭىردە قالا, اۋىلدى كۇل-قوقىستان تازارتۋدى ويلاعان تۇرعىندار, ەڭبەك ۇجىمدارى, جاستار سەنبىلىككە بەلسەنە قاتىستى.
ء«ساۋىر بولماي, ءتاۋىر بولماس» دەگەن. كوكەك ايىندا اۋىلداعى اعايىن قۇرال-سايمانىن تۇگەندەپ, ەڭبەككە قامدانادى. وسى مەزگىلدە قالا تۇرعىندارى دا سەنبىلىككە شىعىپ, قالانى كۇل-قوقىستان تازارتۋعا, كوشەت وتىرعىزۋعا كىرىسەدى. بۇل جولى قالامەن قاتار اۋىل تۇرعىندارى دا تازالىق اكتسياسىنان قالىس قالماۋعا تىرىستى. بەس اپتاعا جالعاسقان ەكولوگيالىق ناۋقاننىڭ ءار اپتاسى بەلگىلى ءبىر تاقىرىپقا ارنالدى. وسى ورايدا استانادا «تازا قازاقستان. استانا – تازالىق پەن ءتارتىپتىڭ ۇلگىسى» دەگەن اتاۋمەن جالعاسقان اكتسياعا جۋرناليستەر دە جۇدىرىقتاي جۇمىلىپ, قولداۋ كورسەتتى. سەنبىلىكتە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جۋرناليستيكا جانە ساياساتتانۋ فاكۋلتەتىنىڭ ستۋدەنتتەرى «قازاق گازەتتەرى» سەرىكتەستىگىنە قاراستى «Egemen Qazaqstan» گازەتىنىڭ ۇجىمىمەن بىرگە «جۋرناليستەر ساياباعىن» تازالادى. جۋرناليستيكا جانە ساياساتتانۋ فاكۋلتەتىنىڭ وقىتۋشىلارى جانە ستۋدەنتتەرىمەن بىرگە كەلگەن فاكۋلتەت دەكانى قايرات ساق رەداكتسيامەن ارىپتەستىك بايلانىس ۇزىلمەيتىنىن ايتتى.
«بۇگىن «تازا قازاقستان» رەسپۋبليكالىق اكتسياسى اياسىندا جۋرناليستيكا جانە ساياساتتانۋ فاكۋلتەتى مەن «قازاق گازەتتەرى» جشس ۇجىمىنىڭ اراسىندا بايلانىس بەرىك ەكەنىن تاعى ءبىر كورسەتىپ, «جۋرناليستەر ساياباعىنا» ۇجىمداستارمەن, ستۋدەنتتەرمەن كەلدىك. بيىل جۋرناليستيكا جانە ساياساتتانۋ فاكۋلتەتىنىڭ قۇرىلعانىنا – 14 جىل. ءبىر جاعى فاكۋلتەتكە وزىمىزشە وسىلاي تارتۋ جاساۋدى ۇيعاردىق. «جۋرناليستەر ساياباعى – فاكۋلتەتتىڭ, ۇجىمنىڭ دا ساياباعى. سەنبىلىككە كەلۋگە نيەت بىلدىرگەن ستۋدەنتتەردىڭ كوبى بۇرىن-سوڭدى ساياباققا كەلمەپتى. سايكەسىنشە ولار «جۋرناليستەر ساياباعىنا» بارۋ تۋرالى ۇسىنىستى بىردەن قۋاتتادى», دەدى ق.ساق.
سەنبىلىككە كەلگەن ستۋدەنتتەردىڭ اراسىندا جۋرناليستيكا جانە ساياساتتانۋ فاكۋلتەتىنىڭ 3-كۋرس ستۋدەنتى نۇرايلىم امانگەلدىقىزى بار. ول ءباسپاسوز جانە باسپا ءىسى كافەدراسىندى وقيدى.
«توپتاعى ستۋدەنتتەردىڭ «جۋرناليستەر ساياباعىنا» سەنبىلىككە بارامىز دەگەن ۇيعارىمىن بىردەن قۇپتادىم. ءبىر جاعى اللەيانى تاماشالاپ, ەكىنشىدەن, «Egemen Qazaqstan» گازەتىنىڭ مەكەنجايىن بىلگىم كەلدى. ءباسپاسوز جانە باسپا ءىسى كافەدراسىندا ءبىلىم الىپ جاتقان سوڭ, گازەتتىڭ تاريحىنان حاباردارمىز. بۇگىن باسىلىمدا ەڭبەك ەتەتىن بىرنەشە اعا بۋىنمەن جۇزدەستىك. كەلەشەكتە وسى باسىلىمدا ەڭبەك ەتۋدى قالايتىن قاتارلاستارىم كوپ. مەن دە سولاردىڭ قاتارىندامىن», دەدى ن.امانگەلدىقىزى.
سەنبىلىكتەن كەيىن ۋنيۆەرسيتەت پەن باسىلىم ۇجىمى ەستەلىك سۋرەتكە ءتۇسىپ, جىلى لەبىز, ىقىلاس-نيەت ءبىلدىرىپ تارقاستى.
وسى كۇنى ءماسليحات دەپۋتاتتارى بايقوڭىر اۋدانى ومىرلىك جاعدايى قيىن بالالاردى قولداۋ ورتالىعىنىڭ توڭىرەگىن تازالادى. قوناقتاردى ديرەكتوردىڭ مىندەتىن اتقارىپ جۇرگەن مامان اياگوز نابيەۆا قارسى الىپ, مەكەمەنىڭ جۇمىسى تۋرالى از-كەم اقپارات بەردى.
«بىزگە زورلىق-زومبىلىق كورگەن بالالار, دەۆيانتتى مىنەز-قۇلقى بار بالالار دا كەلەدى. بۇگىندە ورتالىقتا 70 بالا تىركەلگەن, ونىڭ 44-ءى – تۇراقتى, 36-سى – ۋاقىتشا تۇراتىندار. بۇگىنگى سەنبىلىككە قالالىق ءماسليحاتتىڭ دەپۋتاتتارى كەلىپ, بالالارمەن بىرگە كوشەت وتىرعىزدى. مەكەمەنىڭ اۋلاسىن تازالاۋعا جاردەمدەستى. قالالىق ءماسليحاتتىڭ, ءبىزدىڭ باستامامىزبەن ىسكە اسىپ جاتقان بۇدان وزگە دە ءىس-شارالار كوپ», دەدى ا.نابيەۆا.
ەكولوگيالىق اكتسيادا ەلوردا تۇرعىندارى «نۇرلى جۇرەك» الەۋمەتتىك قىزمەت كورسەتۋ ورتالىعىنىڭ اۋماعىنا اعاش وتىرعىزدى. بۇل ءىس-شاراعا اتالعان مەكەمەنىڭ, الماتى اۋدانى اكىمدىگىنىڭ قىزمەتكەرلەرى, «جاس سارباز» قوزعالىسىنىڭ تاربيەلەنۋشىلەرى, جاستار ۇيىمىنىڭ وكىلدەرى, قوعام قايراتكەرلەرى مەن ەرىكتىلەر جيىلدى. وسى تۇستا «نۇرلى جۇرەك» الەۋمەتتىك قىزمەت كورسەتۋ ورتالىعىنىڭ ديرەكتورى نۇربول زۇلقارناەۆ قالا تۇرعىندارىن ەكولوگيالىق اكتسيادان قۇر قالماۋعا شاقىردى.
ء«اربىر ازامات قالانىڭ كوركەيۋىنە ۇلەس قوسۋعا مىندەتتى دەپ بىلەمىز. بۇگىن «تازا قازاقستان» اكتسياسى اياسىندا «نۇرلى جۇرەك» ورتالىعىنىڭ اۋماعىندا 40 الما اعاشى وتىرعىزىلدى. ءبىزدىڭ ورتالىقتا 271 بالا ارنايى الەۋمەتتىك قىزمەت الادى. ەندى كەلەشەكتە ولاردىڭ ءوز الما باعى بولادى دەپ ۇمىتتەنەمىز. ءبىز ءار بەيسەنبىدە قوسىمشا ەكواكتسيا وتكىزىپ, اۋماقتى تازالايمىز. ارقايسىمىزدا ازاماتتىق سانا بولۋى كەرەك. تازالىق ساقتاپ, قالانى رەتكە كەلتىرۋىمىز قاجەت», دەدى ن.زۇلقارناەۆ.
«ونەگەلى ۇرپاق» دەپ اتالاتىن اپتالىقتا قالا تۇرعىندارى ارداگەرلەردىڭ, قارتتار ءۇيىنىڭ اۋماعىن اباتتاندىرۋعا جاردەمدەستى. مىسالى, جاستار ساياساتى ماسەلەلەرى باسقارماسىنىڭ مامانى الىبەك ءجۇسىپوۆ باستاعان جاستار ەكواپتا اياسىندا 4 مەكتەپتىڭ اۋلاسىمەن قاتار الەۋمەتتىك قىزمەت كورسەتۋ ورتالىعىندا اعاش وتىرعىزعان. وسى اپتالىقتا دەنە شىنىقتىرۋ جانە سپورت باسقارماسىنىڭ باسشىسى ۆاسيلي لەۆيت, ەلگە تانىمال كاسىپقوي بوكسشى, ريو وليمپياداسىنىڭ چەمپيونى دانيار ەلەۋسىنوۆ, اۋىر اتلەتيكادان الەم چەمپيونى ەدىگە ەمبەردى توبە كورسەتتى. بەلگىلى سپورتشىلار استانا ماڭىنداعى «سۆەتوچ» بالالار ءۇيىنىڭ جانىنداعى ورتا مەكتەپتە سەنبىلىك ۇيىمداستىردى.
«تازا قازاقستان» دەپ اتالاتىن اۋقىمدى ەكولوگيالىق اكتسيانىڭ ءتورتىنشى اپتاسى «ونەگەلى ۇرپاق» ۇرانىمەن ءوتىپ جاتىر. ەلوردا تۇرعىندارى ارداگەرلەردىڭ, بالالار مەن قارتتار ءۇيىنىڭ اۋلالارىن تازالاپ, اباتتاندىردى. ەكولوگيالىق اكتسياعا ءبىز دە ءوز ۇلەسىمىزدى قوسۋعا تىرىسىپ جاتىرمىز. ارىپتەستەرمەن اقىلداسا كەلە, استانا ماڭىندا ورنالاسقان «سۆەتوچ» بالالار ۇيىنە كەلدىك. بۇل بالالار ۇيىندە قازىر 19 بالا تاربيەلەنەدى ەكەن», دەدى ۆ.لەۆيت.
«تازالىق تازا جەردە ەمەس, تازالىق ساقتاعان جەردە بولادى» دەگەن. ءبىر ەمەس, بىرنەشە اپتاعا جالعاسقان سەنبىلىكتەردىڭ باستى ماقسات-مۇراتى دا تۇرعىنداردى تازالىق ساقتاۋعا شاقىرۋ بولعانى بەلگىلى.