مامىردىڭ العاشقى كۇنىندە پەتروپاۆل ماڭىنداعى ەسىلدىڭ سۋى 8 سم-گە تومەندەدى. بىراق سۋ ءالى قاۋىپتى دەڭگەيدە. قاۋىپتى بيىكتىك 960 سم بولسا, قازىرگى بيىكتىگى 1 مامىردا ءالى 1 249 سم-دە بولدى. ايتا كەتەرلىگى, پەتروپاۆلدىڭ سۋ قويماسىنداعى بيىكتىك وسى ۋاقىتتا 10 سم ءتۇسىپ, سۋ دەڭگەيى 1 120 سم دەيىن تارتىلدى. ال سەرگەەۆ سۋ قويماسىنداعى سۋ دەڭگەيى – 949 سم.
ءبىرىنشى مامىردا تابيعات تاعى ءبىر توسىن الەك جاساپ, تۇسكى ساعات 14.00-دەن كەشكى 20.00-گە دەيىن ءۇزىلىسسىز جاۋىن جاۋدى. قالانىڭ ىشىندە ساي-سالانى الىپ كەتكەن سۋ ەسىلدىڭ سۋىن دا ءبىرشاما بيىكتەتتى. سينوپتيكتەر 1 مامىردان باستاپ سۋ تۇراقتى تۇردە تارتىلادى دەگەن ەدى, ەندى اسپاننان بەرىپ, وزەن سۋىن ەسەلەپ كەتتى.
پەتروپاۆلدىڭ سۋ باسقان شاعىن اۋداندارىنىڭ تۇرعىندارى ايعا جۋىق ءوز ءۇيىن كورگەن جوق. دۇنيە-مۇلكى دە سۋ باسقان ۇيلەرىندە تۇر. سوعان الاڭداعان كەيبىر تۇرعىندار سۋ تۇرعان ۇيلەرىنە بارعىسى كەلىپ ءجۇر. «سۋدا تۇرعان ۇيلەرگە ءالى بارۋعا بولمايدى. وندايلاردىڭ توبەسى ءتۇسىپ نەمەسە قابىرعاسى ايىرىلىپ كەتىپ, ادامدار جاپا شەگۋى مۇمكىن. بىراق سوعان قاراماي, ۇيىنە ۇمتىلۋشىلار كوپ. وندايدىڭ كەيبىرىن ءبىز رەزەڭكە قايىقپەن قۋىپ ءجۇرىپ ۇستادىق», دەيدى تجد ءباسپاسوز حاتشىسى ەۆگەني جۋراۆلەۆ.
سۋ باسقان اۋدانداردا ءالى دە 3 مىڭداي ءۇي سۋدا تۇر. ولاردىڭ تۇرعىندارىنىڭ اراسىنان 906 ادام ەۆاكۋاتسيالىق بەكەتتەردە, جاتاقحانالاردا, كەيبىرى تۋىستارىنىڭ ۇيىندە نەمەسە جالدامالى پاتەردە تۇرىپ جاتىر.
دەگەنمەن سۋ كوپ باسپاعان ويقالانىڭ دوڭىندەگى كەيبىر ۇيلەردىڭ ماڭى قۇرعاپ, ءىشى دە كەپكەنى كورىنىپ تۇر. وسىنداي ۇيلەردىڭ تۇرعىندارىن اكىمدىكتىڭ كەلىسىمىمەن پد مەن تجد قىزمەتكەرلەرى وزدەرىمەن بىرگە اپارىپ ءجۇر. ساقتىق ءۇشىن سۋدا تۇرعان باسقا ۇيلەرگە ولاردى جىبەرمەۋ قاراستىرىلىپ جاتىر. «پوليتسيا قىزمەتكەرلەرى مۇنداي جەرلەردە ەكى اۋىسىممەن پاترۋلدىك اتقارادى. سۋى تارتىلىپ, ماڭايى كەبە باستاعان ۇيلەردى پاترۋلدىك ايماققا قوسىپ وتىرامىز. قازىر ۇيىنە كەلگەن تۇرعىندار ءۇي م ۇلىكتەرىن جايىپ, كەپتىرىپ جاتىر. جالپى, جاعداي تىنىش», دەيدى پەتروپاۆل قالاسى پب باستىعىنىڭ ورىنباسارى الىبەك عابدۋلين.
قىزىلجار اۋدانىنىڭ ارالدا قالعان پريبرەجنىي اۋلى تۋرالى بۇرىن جازعانبىز. بۇل اۋىلدىڭ ءوزى دوڭدە ورنالاسقاندىقتان, سۋ تەك شەتكى ۇيلەرىن باسقان. اۋىلدىڭ ءوزى قازىرگى كوزقاراسپەن قاراعاندا, ۇلكەن 600-گە جۋىق اۋلاسى بار. سونىڭ 200-دەيىنە سۋ كىرىپتى. وبلىس اكىمى انەبىر كۇندەردە بۇل اۋىلعا تىكۇشاقپەن جەتىپ, جاعدايىن بىلگەن. قازىر بۇل اۋىلدىڭ تىرلىگى قالىپتى جاعدايعا ءتۇسىپ كەلەدى. الايدا حالىق «ۇلكەن جەرگە» ءالى دە قايىقپەن شىعۋعا ءماجبۇر. بۇل, اسىرەسە, پەتروپاۆلدا قىزمەت ىستەيتىن جاندارعا قيىن. سونىڭ ءبىرى – ناتاليا پەتروۆا. «بۇرىن جۇمىسقا 30-40 مينۋتتا جەتەتىن ەدىك, قازىر ءبىر جارىم ساعاتتا جەتەمىز. قايىقپەن ارعى جاعاعا شىققانشا سونشالىق ۋاقىت كەتەدى. بىراق كۇننەن-كۇنگە سۋدىڭ تارتىلىپ كەلە جاتقانىن كورىپ وتىرمىز», دەيدى ول.
تاعى ءبىر اليك ءمۇرسالىم ەسىمدى تۇرعىن دا ءوزىنىڭ كۇنىنە قايىقپەن ەكى رەت وتەتىنىن ايتتى. «قۇتقارۋشىلارعا راحمەت, ولار ۇنەمى جانىمىزدا. قايىقتار تاڭعى 08.00-دەن كەشكى 19.00-گە دەيىن تاسيدى. ءبىر رەزەڭكە قايىق ءتورت ادامدى الادى, ال تەمىر قايىق بەس ادامدى الادى», دەيدى ول.
تجد باستىعىنىڭ ورىنباسارى ناريمان اشامەۆ پانتوندى وتكەل سالعانىن ايتتى. الايدا ونىمەن ادامداردى تاسىمالداۋعا رۇقسات ەتىلمەيدى ەكەن. ول تەك جۇك تاسۋعا, سونىڭ ىشىندە مالعا جەمشوپ تاسۋعا پايدالانىلادى. «ادامداردى وتكىزگەندە بارلىق قاۋىپسىزدىك تالابىن ورىندايمىز. ءاربىر جولاۋشىعا قۇتقارۋ جيلەتى بەرىلەدى. سونىمەن بىرگە قايىقتا وزدەرىن قالاي ۇستاۋ كەرەگىن دە ايتىپ وتىرامىز. كەيدە جاستار قايىقتىڭ شەتىنە وتىرىپ, ونىڭ اۋدارىلىپ كەتۋ قاۋپىن تۋدىرادى. اسىرەسە وسىنداي ادامدارعا قاۋىپسىزدىك نۇسقاماسىن ءبىلدىرىپ وتىرماسا بولمايدى», دەيدى ن.اشاماەۆ.
تاسقىننىڭ كۇشتى بولعان كۇندەرىندە اققان سەڭدەر اۋىلعا تارتىلعان ەلەكتر باعاندارىن قيراتىپ, جارىقسىز قالدىرعان. ول كۇندەردە گەنەراتورلار اكەلىپ, اۋىلدىڭ جارتىسىنا عانا جارىق بەرىلگەن ەدى, قازىر ەلەكتر باعاندارى جوندەلىپ, جارىق ءۇزىلىسسىز بەرىلىپ تۇر.
سولتۇستىك قازاقستان وبلىسى