ساكەن سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ عالىمدارى رەكومبينانتتى اقۋىزداردىڭ نەگىزىندە برۋتسەللەزدى دياگنوستيكالاۋعا ارنالعان جاناما گەماگگليۋتيناتسيا رەاكتسياسى-جيناعىن ازىرلەدى.
عىلىمي جوبانىڭ جەتەكشىسى, ۆەتەريناريا عىلىمدارىنىڭ دوكتورى, قازاتزۋ ميكروبيولوگيا جانە بيوتەحنولوگيا كافەدراسىنىڭ پروفەسسورى ايتباي بۋلاشەۆتىڭ ايتۋىنشا, برۋتسەللەزدى دياگنوستيكالاۋدىڭ جاڭاشا ادىسىندە ارتىقشىلىقتار بار.
– وتاندىق قۇرامداس بولىكتەردەن جاسالعان جاناما گەماگگليۋتيناتسيا رەاكتسياسى-جيناعىن دياگنوستيكالىق تاجىريبەگە ەنگىزۋ دياگنوستيكۋمنىڭ قاراپايىمدىعى مەن قۇنىنىڭ تومەن بولۋى ەسەبىنەن ۆەتەريناريالىق ءىس-شارالاردىڭ تيىمدىلىگىن ەداۋىر ارتتىرادى. ال الەمدىك ۆەتەريناريالىق تاجىريبەدە العاش رەت ەريتروتسيتتىك انتيگەن رەتىندە پايدالاناتىن رەكومبينانتتى اقۋىزدار سەرولوگيالىق زەرتتەۋلەردىڭ ەرەكشەلىگىن ارتتىرۋعا مۇمكىندىك بەرەدى. بۇل ءادىس-ءتاسىلدىڭ كومەگىمەن ادامعا جۇققان برۋتسەللەزدى دياگنوستيكالاۋعا دا قولدانۋعا بولادى, – دەيدى ا.بۋلاشەۆ.
برۋتسەللەزدىڭ دياگنوستيكاسى جانۋارلاردىڭ باسقا دا اسا قاۋىپتى اۋرۋلارىنىڭ دياگنوستيكاسى سەكىلدى مەملەكەتتىك مونوپولياعا كىرەدى. سوندىقتان جاناما گەماگگليۋتيناتسيا رەاكتسياسى-جيناعىنىڭ نەگىزگى تۇتىنۋشىلارى – رەسپۋبليكالىق ۆەتەريناريالىق زەرتحانا, ونىڭ وبلىستىق جانە اۋداندىق بولىمشەلەرى, سونداي-اق اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتىنىڭ ۆەتەريناريا جونىندەگى ۇلتتىق رەفەرەنتتىك ورتالىعى.
جوبا ناتيجەسىندە ەريتروتسيتتەردىڭ (قاتتى فازانىڭ) سىرتقى مەمبرانانىڭ جالعىز رەكومبينانتتى اقۋىزدارمەن (Omp19, Omp25, Omp31), Brucella تەكتەس باكتەريالاردىڭ پەريپلازمالىق كەڭىستىگىمەن سونداي-اق حيمەريكالىق اقۋىزدارمەن سەنسيبيليزاتسياسى ءۇشىن وڭتايلى جاعداي جاسالعان. جەكە اقۋىزداردان ەريتروتسيتتىك انتيگەن دايىندالىپ, ولاردىڭ جاناما گەماگگليۋتيناتسيا رەاكتسياسى-جيناعىنداعى گومولوگيالىق جانە گەتەرولوگيالىق سارىسۋلارداعى انتيگەندەرى زەرتتەلگەن. اتالعان رەكومبينانتتى برۋتسەللا اقۋىزدارىنىڭ E. coli-پرودۋتسەنتتەرى شتاممدارىنىڭ باكتەريالىق ماسساسى ازىرلەنگەن.