وتىز جەتى جاستاعى وكسانا وسكەمەن قالاسىندا دۇنيەگە كەلگەن. ونىڭ اكەسى – تاتار, اناسى – ورىس, كۇيەۋى – قازاق. ىنتىماعى جاراسقان شاڭىراقتا قازاقتىڭ سالت-ءداستۇرى ەرەكشە مانگە يە.
– اكەم انامدى قاتتى ۇناتىپ قالىپ, سەزىمىن بىلدىرگەن ەكەن. ءا دەگەندە اتام مەن اپام ەكەۋىنىڭ ۇيلەنۋىنە قارسى بولىپتى. سەبەبى بالالارىنىڭ تاتار قىزىن عانا ايەلدىككە العانىن قالاعان. بىراق, ۋاقىت وتە انامدى ولار دا ۇناتىپ, كەلىسىمدەرىن بەرگەن. سەنىمدەرىنە قاراي انام اۋلەتتىڭ ەڭ سۇيىكتى كەلىندەرىنە اينالعان. مەن – ءۇيدىڭ تۇڭعىشىمىن. وزىمنەن كەيىن راۆيل ەسىمدى ءىنىم بار. كۇيەۋىم ميراسپەن 2007 جىلى قىزمەت بابىمەن ءجۇرىپ تانىستىق. قالاداعى «كالكەن تۆ» تەلەارناسىندا ۆيدەومونتاجەر بولىپ جۇمىس ىستەپ ءجۇردىم. ول بىزگە وپەراتور بولىپ جۇمىسقا ورنالاسۋ ءۇشىن تاعىلىمدامادان وتۋگە كەلدى. باسشىلىق ماعان «وعان كامەرانى قالاي ۇستاۋدى, جارىقتى قوسۋدى, راكۋرستى اۋىستىرۋدى ۇيرەت», دەدى. وسىلايشا, ارىپتەس رەتىندە سويلەسىپ جۇردىك. 2008 جىلى كوڭىلىمىز جاراسقان سوڭ كەزدەسە باستاپ, 5 جىلدان كەيىن ۇيلەندىك. ميراس – اقكوڭىل ازامات. ۇيلەنگەندە قازاق, تاتار, ورىس حالقىنىڭ سالت-داستۇرلەرىن ساقتاپ, توي جاسادىق. بەتاشار دا بولدى, – دەيدى وكسانا باقىتتى ساتتەرىن ەسكە الىپ.
بۇگىندە ينتەرناتسيونالدى وتباسى ءبىر ۇل, ءبىر قىز تاربيەلەپ وتىر. قىزدارى سامينا ون جاستا, ال ۇلدارى باحتيار جەتىگە كەلگەن. ءار مەرەكەگە ءمان بەرەتىن ولار جىل سايىن ناۋرىز, قازاقستان حالقىنىڭ بىرلىگى كۇنىن, قۇربان ايت, سابانتوي, ماسلەنيتسا, پاسحا مەيرامدارىن ەرەكشە اتاپ وتەدى. بالالارىنا تۇساۋكەسەر جاساپ, ۇلدارىن سۇندەتكە وتىرعىزعان.
– كوكتەمنىڭ شۋاقتى مەيرامىندا ۇيدە ەت اسىپ, ناۋرىز كوجە, باۋىرساق پىسىرەدى. اق داستارقان جايىلىپ, ءۇش ۇلتتىڭ باسى قوسىلادى, ەمەن-جارقىن اڭگىمەلەسىپ, كوڭىلدى كەش وتكىزەمىز. ءان دە ايتىلادى, بي دە بيلەيمىز. انالارىمىز ءبىر-بىرىمەن وتە جاقىن ارالاسىپ كەتتى. كەزدەسكەن سايىن قۇشاقتاسىپ, سىر اقتارىسادى. وتباسىلىق وتىرىستاردا ەكەۋى دە, اكەم دە ۇنەمى ك ۇلىپ, ءماز-مەيرام بولادى. اكەم – وتە قاراپايىم ادام. ءبارىمىز ديماشتى تىڭداعاندى جاقسى كورەمىز. ونىڭ اندەرى ۇنەمى قوسىلىپ تۇرادى, – دەيدى وكسانا.
قىزدارى تەلەارنادا بالالارعا ارنالعان «TV-Kids» باعدارلاماسىن جۇرگىزەدى. سونداي-اق 2021 جىلى «ناۋرىز Party» اتتى قالالىق بايقاۋعا قاتىسىپ, جەڭىمپاز اتانعان. بايقاۋدا ءوز ونەرىن كورسەتىپ, قازاق حالقىنىڭ سالت-داستۇرىنە, تاريحىنا قاتىستى سۇراقتارعا جاۋاپ بەرگەن.
ال وكسانا ءوزى بوس ۋاقىتىندا سۋرەت سالادى, فيتنەسپەن اينالىسادى. ميراس بولسا, فۋتبول ويناعاندى جاقسى كورەدى. ايتۋلارىنشا, جىل سايىن قايىرىمدىلىق اكتسيالارىنا قاتىسادى. مىسالى, 1 قىركۇيەكتە تۇرمىسى تومەن شاڭىراقتان شىققان جەتى بالاعا وقۋ-قۇرالدارىن الىپ بەرگەن. جالپى, ەرلى-زايىپتى جىل كولەمىندە مۇمكىندىكتەرىنە قاراي مۇقتاج جاندارعا قارجىلاي كومەك كورسەتىپ, جۇما كۇندەرى ساداقا بەرەدى.
وسكەمەن