پەتروپاۆل تۇرعىندارى بيىل قازاقستان حالقىنىڭ بىرلىگى كۇنىن اتاپ ءوتۋ كەزىندە ءان مەن بيدەن باس تارتىپ, مەرەكەنى ەرەكشە فورماتتا اتاپ ءوتۋدى ءجون كوردى. مەرەكە قارساڭىندا وبلىس ورتالىعىندا جالپىقالالىق سەنبىلىك وتەدى, دەپ حابارلايدى Egemen.kz.
پەتروپاۆل قالاسى اكىمدىگىنىڭ حابارلاۋىنشا, وڭىردە ەنگىزىلگەن توتەنشە جاعداي مەن سۋ تاسقىنىنا بايلانىستى وبلىس ورتالىعىندا جالپىقالالىق سەنبىلىك وتەدى. بۇل - قازاقستان حالقى اسسامبلەياسىنىڭ باستاماسى.
قالا تۇرعىندارى بىرىگىپ, 1 مامىردا «تازا قازاقستان» اكتسياسىن قولداۋ ماقساتىندا ەڭبەك پەن تازالىقتى دارىپتەيدى. سونداي-اق اكىمدىك قالا تۇرعىندارىن ءوز اۋلالارىن تازالاۋعا شاقىردى. سونىمەن قاتار سۋ باسقان ايماقتاردى دا تازالاۋ جۇمىستارى جۇرگىزىلەدى.
ايتا كەتسەك, پەتروپاۆلدا تاسقىن سۋدىڭ بەتى قايتىپ, ەسىل وزەنىنىڭ سۋ دەڭگەيى تومەندەپ جاتىر. سەرگەەۆ سۋ قويماسىنداعى سۋ دەڭگەيى 89 سم-گە تومەندەسە, پەتروپاۆلدا 19 سم-گە ءتۇستى.
قىرمىزى جۇماعاليقىزى,
ەۇۋ ستۋدەنتى