استاناعا سينگاپۋر رەسپۋبليكاسى پارلامەنتىنىڭ سپيكەرى سەا كيان پەن رەسمي ساپارمەن كەلدى. ماجىلىستە مەيماندى پالاتا توراعاسى ەرلان قوشانوۆ قابىلدادى.
كەزدەسۋدە ءماجىلىس توراعاسى سينگاپۋر قازاقستاننىڭ وڭتۇستىك-شىعىس ازياداعى ماڭىزدى ءارى سەنىمدى سەرىكتەستەرىنىڭ ءبىرى ەكەنىن اتاپ ءوتتى. سونىمەن قاتار سەا كيان پەن مىرزانىڭ بۇل ساپارى قازاقستان-سينگاپۋر قاتىناستارىن جان-جاقتى نىعايتۋعا جانە كەڭەيتۋگە زور سەرپىن بەرىپ, پارلامەنتارالىق ىنتىماقتاستىقتى دامىتۋعا ىقپال ەتەتىنىنە سەنىم ءبىلدىردى.
– بيىل قازاقستان مەن سينگاپۋر اراسىندا ديپلوماتيالىق قارىم-قاتىناس ورناعانىنا 31 جىل تولدى. وسى ۋاقىت ىشىندە سەنىم مەن سىيلاستىققا نەگىزدەلگەن ەكىجاقتى ىنتىماقتاستىعىمىز قارقىندى دامىپ كەلەدى. بۇعان پرەزيدەنت قاسىم-جومارت توقاەۆ پەن سينگاپۋردىڭ بۇرىنعى باسشىسى حاليما ياكوبتىڭ بىلتىرعى قازاقستانعا جاساعان رەسمي ساپارى كەزىندەگى كەزدەسۋى سەپتىگىن تيگىزدى. پارلامەنتاريلەر رەتىندە ءبىزدىڭ مىندەتىمىز – كوشباسشىلارىمىز قول جەتكىزگەن بارلىق كەلىسىمدى جۇزەگە اسىرۋ ءۇشىن جاعداي جاساۋ, – دەدى ءماجىلىس سپيكەرى.
ەرلان قوشانوۆ ارىپتەسىنە قازاقستاندا مەملەكەت باسشىسىنىڭ باستاماسىمەن بولىپ جاتقان وزگەرىستەر تۋرالى ايتىپ بەردى. وسى ورايدا سينگاپۋر مەن قازاقستاننىڭ ىشكى ساياسي باعىتىنىڭ ۇقساستىعىنا نازار اۋداردى. اتاپ ايتقاندا, پرەزيدەنت قاسىم-جومارت توقاەۆ باسشىلىققا الاتان ء«ارتۇرلى پىكىرلەر, بىراق ءبىرتۇتاس ۇلت» قاعيداتىنىڭ مىزعىماستىعىنا ءمان بەردى.
سينگاپۋر پارلامەنتىنىڭ سپيكەرى ەكى ەل ىنتىماقتاستىعىن دامىتۋداعى بولاشاعى زور سالالاردىڭ قاتارىندا ەكونوميكا, ءبىلىم بەرۋ مەن دەنساۋلىق ساقتاۋدى اتاپ ءوتتى. سەا كيان پەن سينگاپۋردىڭ دامۋ جىلدارىندا جيعان قۇندى تاجىريبەلەرىمەن قازاقستانمەن بولىسۋگە دايىن ەكەنىن جەتكىزدى.
مارتەبەلى مەيمان قاسىم-جومارت توقاەۆتىڭ ساياسي جانە ەكونوميكالىق رەفورمالارىن جوعارى باعالادى.
– بۇل ستراتەگيا ادىلەتتى قازاقستان, پروگرەسسيۆتى مەملەكەت قۇرۋعا جانە حالىقتىڭ مۇمكىندىكتەرىن ارتتىرۋعا باعىتتالعان. ءتۇرلى وزگەرىستەرگە, يننوۆاتسيالارعا بەيىمدەلۋ, رەفورمالار قابىلداۋ – دامىعان ۇلتتىڭ وزەگى. بىراق ودان دا ماڭىزدىسى – حالىقتىڭ جاۋاپكەرشىلىگى مەن جاسامپازدىعى. وسى قۇندىلىقتار الەۋمەتتىك ادىلدىكتى قالىپتاستىرۋدىڭ نەگىزىندە جاتىر, – دەدى سەا كيان پەن.
كەزدەسۋ سوڭىندا تاراپتار پارلامەنتارالىق ىنتىماقتاستىقتى, سونىڭ ىشىندە دوستىق توپتارى اراسىنداعى ىقپالداستىقتى ودان ءارى دامىتۋعا كەلىستى.